Byłomu prezidentu Biełarusi da pakieta harantyj daduć padatkovyja lhoty
Urad 3 kastryčnika ŭnios u Pałatu pradstaŭnikoŭ Nacschodu Biełarusi prajekt zakona «Ab źmienie zakonaŭ», adno z pałažeńniaŭ jakoha praduhledžvaje padatkovyja lhoty dla byłoha prezidenta Biełarusi, zaŭvažyŭ reformby.org.
06.10.2024 / 09:33
Alaksandr Łukašenka. Fota: Sergei Guneyev, Sputnik, Kremlin Pool Photo via AP, File
Prajektam prapanujecca dapoŭnić artykuł Padatkovaha kodeksa, u jakim apisvajucca asablivaści pravavoha rehulavańnia pytańniaŭ padatkaabkładańnia. U pryvatnaści, prapanujecca pašyryć prymianieńnie artykuła da śfiery «zabieśpiačeńnia harantyj Prezidentu Respubliki Biełaruś, jaki spyniŭ vykanańnie paŭnamoctvaŭ u suviazi z zakančeńniem terminu jaho znachodžańnia na pasadzie abo daterminova ŭ vypadku jaho adstaŭki abo stojkaj niazdolnaści pa stanie zdaroŭja ažyćciaŭlać abaviazki Prezidenta Respubliki Biełaruś».
Ab jakich mienavita lhotach idzie havorka, z tekstu zrazumieć nielha. Heta budzie vyznačana «inšymi zakonami, jakija ŭ hetaj častcy majuć bolšuju jurydyčnuju siłu» ŭ adnosinach da Padatkovaha kodeksa. Pry hetym prezident Biełarusi moža ŭstanaŭlivać asablivaści pravavoha rehulavańnia adnosin, rehłamientavanych hetym kodeksam.
U kancy minułaha hoda byli pryniaty papraŭki ŭ zakon «Ab Prezidencie Respubliki Biełaruś». U zakon dadali całkam novy raździeł ab harantyjach dla eks-prezidenta i členaŭ jaho siamji.
Pavodle dakumienta, naprykład, eks-prezidenta nielha budzie pryciahnuć da adkaznaści za dziejańni, «učynienyja ŭ suviazi z ažyćciaŭleńniem im prezidenckich paŭnamoctvaŭ». Jaho nielha zatrymać, niejak inakš pazbavić asabistaj svabody, padvierhnuć śledčym i inšym pracesualnym dziejańniam.
Takaja ž niedatykalnaść raspaŭsiudžvajecca na členaŭ siamji byłoha prezidenta, na ich žyłyja i słužbovyja pamiaškańni, transpartnyja srodki, srodki suviazi, asabistyja archivy, pierapisku i hetak dalej.
Byłoha kiraŭnika dziaržavy buduć achoŭvać «u poŭnym abjomie mier, praduhledžanych zakanadaŭstvam ab dziaržaŭnaj achovie». Členy siamji taksama atrymlivajuć dziaržachovu «ŭ adpaviednaści z zakanadaŭstvam».
Paśla śmierci byłoha prezidenta kožnamu z čalcoŭ jaho siamji pažyćciova pryznačajecca hrašovaje ŭtrymańnie, taksama niezaležna ad inšych krynic prybytku. Jaho pamier — na ŭzroŭni pryžyćciovaha zarobku prezidenta.
Na ciapierašni momant u Biełarusi niama byłych prezidentaŭ. Pieršy prezident Biełarusi Alaksandr Łukašenka siłaj utrymlivaje ŭładu i zachoŭvaje hetu pasadu ŭžo bolš za 30 hadoŭ.