Što viadoma pra hihancki dron S-70 «Achotnik», źbity nad Kanstancinaŭkaj
Dniom 5 kastryčnika vialiki latalny aparat byŭ źbity pobač z horadam Kanstancinaŭka ŭ Danieckaj vobłaści. Na dumku śpiecyjalistaŭ, heta najnoŭšy rasijski reaktyŭny BPŁA S-70 «Achotnik». U čym jaho admietnaść, piša VVS.
06.10.2024 / 13:00
Kadry źbićcia aparata, jaki pieršapačatkova pryniali za rasijski źniščalnik, pačali raspaŭsiudžvacca ŭ sacsietkach kala 13:00 u subotu, 5 kastryčnika.
Na videa źniaty momant paražeńnia hetaha BPŁA avijacyjnaj rakietaj, jakuju imavierna, vypuściŭ rasijski samalot.
«Na terytoryi Kanstancinaŭskaj abščyny ŭpaŭ latalny aparat», — paviedamiŭ kiraŭnik Danieckaj abłasnoj vajskovaj administracyi Vadzim Fiłaškin.
«U vyniku padzieńnia abłomkaŭ u pryvatnym siektary ŭźnik pažar, paškodžanyja pryvatnyja damy… Papiarednie — biez paciarpiełych».
Adrazu paśla incydentu kiraŭnik Kanstancinaŭskaj haradskoj administracyi Siarhiej Harbunoŭ paviedamiŭ, što heta ŭkrainskija vajskoŭcy źbili varožy samalot.
Kavałak fiuzielaža źbitaha latalnaha aparata na ŭskrainie Kanstancinaŭki
Kiraŭnik AVA taksama vykłaŭ fota nastupstvaŭ padzieńnia latalnaha aparata i častku jaho fiuzielaža z čyrvonaj zorkaj, jakaja źjaŭlajecca simvałam armii RF.
Kiraŭnik Centra procidziejańnia dezinfarmacyi pry RNBA Andrej Kavalenka napisaŭ, što heta moža być ci samalot Su-34 abo najnoŭšy rasijski BPŁA S-70 «Achotnik».
«Kančatkova stanie zrazumieła paśla daśledavańnia abłomkaŭ», — dadaŭ jon.
Ekśpierymientalnaja zbroja
Rasijskija vajennyja błohiery ŭpeŭnienyja, što źbity aparat — heta najnoŭšy BPŁA S-70.
Tak, telehram-kanał Figterbomer, jaki śpiecyjalizujecca na rasijskaj vajskovaj avijacyi, napisaŭ niekalki viersij taho, što mahło adbycca ŭ niebie nad Kanstancinaŭkaj. Heta, u pryvatnaści, mahła być strata kiravańnia BPŁA, uździejańnie REB i admova elektroniki aparata.
Ukrainski partał «Militarnij» paćviardžaje, što heta byŭ BPŁA «Achotnik».
Profilnaje vydańnie Defense Express adznačaje, što z vysokaj dolaj vierahodnaści na videa zafiksavana pieršaje źbićcio hetaha najnoŭšaha rasijskaha ŭdarnaha drona.
Heta faktyčna bieśpiłotny źniščalnik supravadžeńnia, jon supravadžaje bajavy samalot i niasie ŭzbrajeńnie, pašyrajučy takim čynam mahčymaści asnoŭnaha źniščalnika.
Na kadrach, jakija trapili ŭ sietku, vidać, što S-70 lacieŭ u pary ź inšym samalotam, jaki ŭ peŭny momant vypuściŭ rakietu.
«Achotnik» upaŭ u rajonie Kanstancinaŭki, što prykładna za 12 kiłamietraŭ ad linii bajavoha sutyknieńnia. Takim čynam, ekśpierymientalny aparat lacieŭ užo ŭ pavietranaj prastory, jakuju kantralujuć USU.
S-70 raspracoŭvaje rasijskaja avijakarparacyja «Suchoj» z 2012 hoda. Dakładnyja charaktarystyki BPŁA nieviadomyja. Jak miarkujecca, heta moža być dahukavy aparat, jaki moža lacieć u pary ź źniščalnikami Su-57 i Su-35.
Fota: Minabarony RF
Pamiery BPŁA dosyć uražlivyja: daŭžynia — 14 m, razmach kryła — 19 m, uźlotnaja masa bieśpiłotnika składaje bolš za 20 ton.
Jon moža nieści va ŭnutranych adsiekach rakiety i avijabomby ahulnaj masaj da 2,8 tony.
Pa płanach raspracoŭščykaŭ, reaktyŭny «Achotnik» budzie vykarystoŭvacca dla ŭdaraŭ pa abjektach praciŭnika biez zachodu piłatujemych samalotaŭ u zonu dziejańnia sistem supraćpavietranaj abarony.
Zajaŭlenaja dalokaść palotu — kala 5-6 tysiač kiłamietraŭ z chutkaściu 1400 km/h.
27 vieraśnia 2019 hoda Minabarony Rasii paviedamiła pra pieršy sumiesny palot «Achotnika» i Su-57, jaki doŭžyŭsia bolš za 30 chvilin. Paźniej rasijskija ŭłady zajavili ab pačatku sieryjnaj vytvorčaści ciažkaha reaktyŭnaha BPŁA z 2023 hoda.
Paśla hetyja terminy pieranosilisia. Apošnija ahučanyja abiacańni — start sieryi ŭžo ŭ druhoj pałovie biahučaha hoda.
Uzor «Achotnika», pradstaŭleny ŭ 2021 hodzie. Fota: pres-słužba AAK RF
Pa niekatorych danych, siońnia RF maje tolki čatyry pratatypy «Achotnika» i jašče niekalki budujuć.
«Možna aściarožna vykazać zdahadku, što pierad startam sieryjnaha vytvorčaści rasiejcy vyrašyli pratestavać svaje pratatypy niepasredna na pole boju», — ličać analityki Defense Express.
Kali Rasii ŭsio ž udasca zapuścić sieryjnuju vytvorčaść hetaha najnoŭšaha BPŁA, to heta budzie surjoznym vyklikam dla ŭkrainskaj supraćpavietranaj abarony.
Pavodle zadumy raspracoŭščykaŭ, hety ciažki dron źjaŭlajecca małaprykmietnym dla SPA i maje nadzvyčaj šyrokuju namienkłaturu ŭzbrajeńnia na borcie.
Tak, zhodna z ahučanymi rasijskimi ŭładami zajavami, «Achotnik» zmoža nieści kiravanyja avijabomby i vysokadakładnyja rakiety z karekciroŭkaj kursu palotu.
Faktyčna, rasijskaja armija atrymaje ŭ svajo rasparadžeńnie bieśpiłotny samalot, jaki zmoža zalatać uhłyb terytoryi praciŭnika, vieści raźviedku i źniščać abjekty vysokadakładnymi bojeprypasami.
Praŭda, padzieńnie «Achotnika» nad Kanstancinaŭkaj ad nieŭstanoŭlenych abstavin stavić pad sumnieŭ hatoŭnaść hetaha vyrabu da praktyčnaha vykarystańnia.