EPAM купляе кансалтынгавую кампанію, якая працуе з 20 найбуйнейшымі сусветнымі банкамі
EPAM заявіў пра куплю кансалтынгавай кампаніі First Derivative, якая спецыялізуецца на аказанні інжынерных, тэхнічных і бізнэс-паслуг фінансавым установам, уключаючы 20 найбуйнейшых сусветных банкаў, піша Devby.io.
07.10.2024 / 21:33
Фота: brianconlonfoundation.com
Штаб-кватэра кампаніі знаходзіцца ў Паўночнай Ірландыі, а штат налічвае больш за 1800 супрацоўнікаў. Кампанія ў асноўным працуе ў Вялікабрытаніі, Ірландыі, Паўночнай Амерыцы і Азіяцка-Ціхаакіянскім рэгіёне.
«Мы радыя пашырыць наш партфель фінансавых паслуг і дыверсіфікаваць нашу глабальную прысутнасць у ключавых рэгіёнах дзякуючы глыбокаму вопыту First Derivative ў галіне рынкаў капіталу, банкаўскіх аперацый і абслугоўвання актываў», — пракаментаваў пагадненне аб куплі прэзідэнт глабальнага бізнэсу EPAM Балаж Фееш.
First Derivative з'яўляецца падраздзяленнем тэхналагічнай кампаніі FD Technologies, акцыі якой каціруюцца на альтэрнатыўным інвестыцыйным рынку (AIM) пры Лонданскай фондавай біржы.
У FD Technologies заявілі, што сума здзелкі складзе 230 мільёнаў фунтаў стэрлінгаў (блізу 300 млн даляраў). Яе плануецца закрыць да канца гэтага года.
Гэта ўжо другая падобная здзелка EPAM бягучай восенню. У пачатку верасня стала вядома, што EPAM купляе амерыканскую кансалтынгавую кампанію Neoris за 630 млн даляраў. Абедзве пакупкі абыдуцца кампаніі амаль у 1 мільярд даляраў.
У беларускага офіса EPAM выручка ўпала на 42%, а прыбытак — у 5 разоў
Айцішнікі з Беларусі знялі палову офіснай Вільні — але цяпер трацяць цікавасць
У EPAM пакрысе скарачаецца выручка і штат
Колькі падаткаў заплацілі ў бюджэт Літвы фірмы з беларускімі каранямі