U Hrodnie ŭvadnačas zakryli pałovu kijoskaŭ, dzie možna nabyć kvitki na hramadski transpart. U aŭtaparku prablemy nie bačać
Žychary Hrodna paskardzilisia, što im stała składana kupić kvitki na prajezd u hramadskim transparcie, bo zakrylisia adrazu 70 kijoskaŭ, dzie raniej ich pradavali — a heta pałova ŭsich, što byli.
07.10.2024 / 22:05
Zdymak ilustracyjny. Fota: s13.ru
U aŭtaparku, adnak, prablemy nie bačać, źviartajučy ŭvahu, što jość i inšyja mahčymaści, kab nabyć kvitki.
«U horadzie Hrodna, jak ni ŭ jakim inšym horadzie, samaja vialikaja kolkaść vidaŭ prajaznych. Kvitki na miesiac možna kupić u adździaleńniach Biełpošty, usie vidy i adnarazovyja tałončyki — na astraŭkach «Biełaruskija łatarei», «Nacyjanalnyja łatarei». Taksama možna apłacić pa QR-kodach. Darečy, 23,7% haradžan mienavita tak i apłačvajuć pajezdku, 3,7% kuplajuć elektronnyja prajaznyja. U kiroŭcy taksama možna nabyć kvitok», — kamientuje situacyju Andrej Ejsmant, namieśnik dyrektara aŭtobusnaha parku.
Kijoski nie pracujuć, jak zapeŭnivajuć, časova, i pačnuć znoŭ adkryvacca — ale nie ŭdakładniena, ź jakoj intensiŭnaściu, — z 10 kastryčnika. Zakryćcio kijoskaŭ, pavodle infarmacyi vydańnia Newgrodno.by, źviazana sa źmienaj ich ułaśnika, i afarmleńnie dakumientaŭ zojmie kala 2 tydniaŭ.
Tłumačeńnie aŭtaparku miascovy telekanał «Hrodna Plus» padaje čamuści z paznakaj «Antyfejk», choć nijakija fakty ŭ jahonym paviedamleńni nie abviarhajucca, a tolki dajecca subjektyŭnaja acenka ŭźnikłych ciažkaściaŭ jak nibyta niesurjoznych.
Hramadzian ža prosiać «pakłapacicca pra apłatu prajezdu ŭ aŭtobusach i tralejbusach zahadzia» i «šukać mahčymaściaŭ, a nie apraŭdańnia».
Maršrutki ŭ Minsku padaražejuć na 20 pracentaŭ?
U Biełarusi źjavicca adzinaja mabilnaja prahrama dla prodažu kvitkoŭ na hramadski transpart
Prypynki hramadskaha transpartu ŭ Viciebsku ŭpryhožyli cytatami z Łukašenki