U Biełarusi pačynajucca zaniatki pa mabilizacyjnaj hatoŭnaści
Budzie navat pryzyŭ z zapasu na adzin dzień.
08.10.2024 / 08:54
Ilustracyjnaje fota Minabarony
Štohadovyja zaniatki pa mabilizacyjnaj hatoŭnaści projduć u Biełarusi z 8 pa 11 kastryčnika, paviedamlaje pres-słužba Minabarony.
Mierapryjemstvy projduć pad kiraŭnictvam staršyń abłvykankamaŭ. Jany nakiravany na pavyšeńnie ŭzroŭniu padrychtoŭki i zładžanaści orhanaŭ kiravańnia terytaryjalnaj abarony da farmiravańnia terytaryjalnych vojskaŭ.
U pryvatnaści, va ŭsich administracyjnych rajonach krainy projduć płanavyja tearetyčnyja i praktyčnyja mierapryjemstvy. Asablivuju ŭvahu płanujecca nadać udaskanaleńniu navykaŭ słužbovych asob vykankamaŭ, vajennych kamisaryjataŭ i administracyj punktaŭ pryjomu mabilizacyjnych resursaŭ.
«Taksama ŭ ramkach zaniatkaŭ praduhledžany pryzyŭ vajennaabaviazanych na adnadzionny zbor, na jakim buduć daviedzieny asnovy i paradak dziejańniaŭ u chodzie farmiravańnia terytaryjalnych vojskaŭ», — havorycca ŭ paviedamleńni viedamstva.