Valfovič raskazaŭ pra novuju ideju pryzyvu z zapasu
Byłyja vajskoŭcy mohuć być pryzvanyja z zapasu ŭ samyja karotkija terminy na słužbu, abychodziačy sistemu vajennych kamisaryjataŭ.
09.10.2024 / 08:40
Ilustracyjnaje fota: Minabarony
Dośvied vajny va Ukrainie analizujecca na zborach z vajennaabaviazanymi, paviedamiŭ dziaržaŭny sakratar Rady biaśpieki Biełarusi Alaksandr Valfovič.
U aŭtorak, 8 kastryčnika, adbylisia zaniatki z vajennaabaviazanymi, jakija raniej słužyli ŭ śpiecpadraździaleńniach MUS, i dobraachvotnikami z atrada «Śmierč». U zbory ŭziali ŭdzieł aficery i sałdaty, jakija słužyli ŭ padraździaleńniach AMAP, SACHR, «Ałmaz», unutranych vojskaŭ.
«Heta novaja forma pryzyvu vajennaabaviazanych: na dzień, na dva, u vychadny dzień, biez vykarystańnia sistemy mabilizacyi, jakaja adpracavanaja ŭ Biełarusi», — cytuje dziaržsakratara BiełTA.
Valfovič adznačyŭ, što vajennaabaviazanyja nie stracili navyki, jakija jany zdabyli padčas słužby.
«Kali chtości pakvapicca na naš suvierenitet, terytaryjalnuju cełasnaść, to pa sihnale prezidenta kiraŭniki siłavoha błoka daduć kamandu, i ŭ dziejučyja padraździaleńni, abminajučy vajenkamaty, na praciahu litaralna niekalkich hadzin prybuduć tyja, chto vydatna vałodaje navykami i sposabami viadzieńnia bajavych dziejańniaŭ», — raspavioŭ jon.
Pa słovach Valfoviča, dla vajennaabaviazanych užo padrychtavany forma i kamplekty ŭzbrajeńnia. Heta dazvolić im pry nieabchodnaści ŭzmacnić bajavy patencyjał śpiecpadraździaleńniaŭ u dva ci try razy, a praviadzieńnie takich zboraŭ — adpracavać apieratyŭnaść nieabchodnych dziejańniaŭ.