Prabiełaruskija łukašysty jadnajucca suprać prarasijskich
Uniasieńnie telehram-kanała «Za Sajuznuju dziaržavu Biełarusi i Rasii» ŭ śpis ekstremisckich vyklikała šyrokaje ŭchvaleńnie siarod adnych prychilnikaŭ Łukašenki i hnieŭnuju reakcyju siarod inšych. Praŭładnyja praciŭniki Bondaravaj uzbadziorylisia.
13.10.2024 / 12:04
Zoja Sierada, Siarhiej Šyptenka i Volha Bondarava. Kałaž «Naša Niva»
Rašeńnie ab pryznańni materyjałaŭ telehram-kanała ekstremisckimi pryniaŭ sud Miadzielskaha rajona Minskaj vobłaści 9 kastryčnika. Jano padkreśliła najaŭnaść supiarečnaściaŭ u bačańni budučyni pamiž roznymi kryłami łukašystaŭ.
Tutejšyja impiercy
Siarhiej Šyptenka, były karespandent Regnum i aŭtar pryznanaha ekstremisckim kanała «Tutejšyja», jaki paśla staŭ «Za Sajuznuju dziaržavu Biełarusi i Rasii»
Kanał, jaki raniej nazyvaŭsia «Tutejšyja», mieŭ vyraznuju antybiełaruskuju skiravanaść. Jon davodziŭ ideju źlićcia Biełarusi z Rasijaj, admaŭlaŭ asobnaść biełaruskaha narodu i isnavańnie biełaruskaj movy.
Jak kaliści Regnum, kanał Šyptenki całkam admaŭlaje biełarusam u isnavańni
Jaho aŭtaram, jak vyjaviłasia, byŭ prychilnik «ruskaha śvietu» publicyst Siarhiej Šyptenka. U svoj čas jon byŭ karespandentam rasijskaha impierskaha partała Regnum, dzie drukavaŭsia pad psieŭdanimam Artur Hryhorjeŭ. U śniežni 2016 hoda jon byŭ aryštavany razam ź inšymi aŭtarami partała — Juryjem Paŭłaŭcom i Dźmitryjem Alimkinym — pa abvinavačvańni ŭ raspalvańni nacyjanalnaj varožaści.
U lutym 2018 hoda Minski haradski sud pryznaŭ Šyptenku vinavatym i asudziŭ jaho na 5 hadoŭ pazbaŭleńnia voli z adterminoŭkaj vykanańnia prysudu na try hady.
Kanały, jakija aktyŭna repościli «Za Sajuznuju dziaržavu Biełarusi i Rasii» (źleva), i kanały, jakija aktyŭna repościŭ sam Šyptenka. Danyja z tgstat.com
Ale svajoj spravy jon nie kinuŭ. Jašče ŭ lipieni 2021 hoda zavioŭ svoj ułasny kanał, u jakim staŭ prasoŭvać znajomy paradak dnia. U kanale jon časta repościŭ rodnasnyja prajekty: kanał «Litoŭskaja Ruś», jaki pradstaŭlaŭ Vialikaje Kniastva Litoŭskaje jak zachodnieruskuju dziaržavu, «Zachodnieruskaja Atłantyda» i kanał rasijskaha historyka Alaksandr Dziukava, kiraŭnika rasijskaha fonda «Histaryčnaja pamiać».
Antybiełaruskija pohlady Šyptenki raspaŭsiudžvali nie tolki kanały z takimi pramovistymi nazvami jak «Ruś Dieržavnaja. My Za Objedinienije: Rośsii, Ukrainy, Biełoruśsii», ale i viadomyja biełaruskija jabaćki — Elvira Mirsalimava i Volha Bondarava. Kali ŭ viciebskaj prarasijskaj aktyvistki tolki 82 reposty z kanała Šyptenki, to ŭ hrodzienskaj danosčycy — až 226.
Zoja Sierada, aŭtarka kulturnaha kanała «Vieraščaka», dazvalaje sabie publična vyśmiejvać antybiełaruskuju pazicyju «bondaraŭcaŭ». «Babie Zoi» prypisvajuć pryznańnie telehram-kanała «Za Sajuznuju dziaržavu Biełarusi i Rasii» ekstremisckim. Fota z sacsietak
Prarasijskija aktyvisty abvinavacili ŭ zabaronie kanała Zoju Sieradu, aŭtarku kulturnaha kanała «Vieraščaka». Sierada žyvie ŭ ahraharadku Narač Miadzielskaha rajona, pracuje ŭ dziciačym sadzie i zachaplajecca lalečnym mastactvam. U svaim kanale jana niaredka vyśmiejvaje Bondaravu i jaje pamahatych, jakija nie tolki zaklikajuć źniščać usio biełaruskaje, ale i niaredka vykazvajuć z hetaj nahody i kramolnyja dumki nakont biełaruskich uładaŭ.
U prarasijskich kołach Biełarusi sioleta namieciłasia čornaja pałasa: u mai spyniŭ svaju dziejnaść telehram-kanał «Zachodnieruskaja Atłantyda», u sakaviku za niezakonnaje pikietavańnie BČB-ściaham asudzili Elviru Mirsalimavu, a ŭ žniŭni zatrymali jaje idejnaha paśladoŭnika Arcioma Ahafonava.
Niepataplalnaj zastajecca tolki Volha Bondarava, jakaja praciahvaje ahresiŭnyja napadki na biełaruskuju kulturu i historyju. Praŭda, na parłamienckich vybarach u pačatku hoda jaje pakazalna prakacili mima deputackaha kresła i vyklučyli z Kamunistyčnaj partyi.
Ciapier vybryki Bondaravaj jabaćkami ŭsprymajucca ŭžo nie jak zahad da nieadkładnaj raspravy nad tymi, chto joj nie padabajecca, a tolki jak čarhovyja dzivactvy.
Novyja abliččy «ruskaha śvietu»
Zrešty, kolkaść padpisčykaŭ na kanale Bondaravaj raście, a taksama źjaŭlajucca novyja paplečniki ŭ baraćbie suprać usiaho biełaruskaha. Takim staŭ Michaił Juspa, jaki stvaryŭ na roznych servisach cełuju sietku svaich kanałaŭ.
Michaił Juspa ŭ repartažy telekanała «Biełaruś 1». Skrynšot videa
Miarkujučy pa kolkaści repostaŭ na kanale Bondaravaj, Juspa zaniaŭ miesca hałoŭnaha favaryta danosčycy, padcisnuŭšy jaje siabrovak Taćcianu Sidarovič i Śviatłanu Žyhimont.
Michaił Michajłavič Juspa siońnia pracuje navukovym supracoŭnikam kafiedry fiłasofii i mietadałohii ŭniviersiteckaj adukacyi Respublikanskaha instytuta vyšejšaj škoły. Siabie jon nazyvaje palitołaham i mižnarodnikam, vidać, na toj padstavie, što skončyŭ u 2007 hodzie fakultet mižnarodnych adnosin BDU.
Nijakich navukovych publikacyj až da apošniaha času nie mieŭ, bo byŭ zaniaty inšym. Raniej, jak usia jahonaja siamja, jon zajmaŭsia spartyŭnym funkcyjanierstvam. Jahony baćka Michaił Barysavič Juspa siońnia zajmaje pasadu dyrektara Instytuta pavyšeńnia kvalifikacyi i pierapadrychtoŭki BDUFK, Taćciana Juspa, jakaja, vidać, davodzicca jamu maci, pracuje staršaj vykładčycaj kafiedry azdaraŭlenčaj fizičnaj kultury BDUFK, a brat Anton Juspa źjaŭlajecca členam Vykankama NAK Biełarusi i dyrektaram Biełaruskaj tenisnaj fiederacyi.
Niešta sprabavaŭ stvaryć i małodšy Michaił Juspa. U lutym 2019 hodzie jon zarehistravaŭ adrazu try maładziožnyja arhanizacyi — Fiederacyja siorfinha i kajtsportu, Fiederacyju vuličnaha sportu i Fiederacyju kampjutarnaha i roba sportu. Dziejnaść pieršych dźviuch była prypyniena ŭ 2024 hodzie.
«Pra rolu dziarždepa ZŠA ŭ biełarusizacyi i derusifikacyi». Michaił Juspa aktyŭna zmahajecca z usim biełaruskim u Biełarusi, u čym jaho horača padtrymlivaje i Bondarava, i Mirsalimava. Skrynšot kanała
U 2022 hodzie Juspa pracavaŭ namieśnikam načalnika centra prasoŭvańnia adukacyjnych pasłuh BDUIR, tady ž jon zavioŭ ułasny telehram-kanał, kab prasoŭvać svaje antybiełaruskija naratyvy. U 2023 hodzie staŭ aśpirantam RIVŠ i vyjšaŭ z tymi ž marhinalnymi tezisami ŭ biełaruskuju navuku.
Na Husieŭskich čytańniach joj vystupaŭ z temaj «Vykliki novaha času dla kalektyŭnaha simvaličnaha kapitału armii Rasii», na simpoziumie ŭ maskoŭskim MDŁU — z dakładam «Faktar movy ŭ kalektyŭnym simvaličnym kapitale cyvilizacyi», dzie raspaviadaŭ, što biełaruskaja mova sfarmiravałasia pieršapačatkova jak ruskaja, ale za košt zapazyčańniaŭ stała vidaźmianiacca, a značyć jana pradukt cyvilizacyjnaha sutyknieńnia i zamiaščeńnia śvietapohladaŭ.
Supraćstajańnie «ruskaha śvietu» i «litvinskaj inicyjatyvy» Michaił Juspa bačyć na palicach vina-harełačnych adździełaŭ. Skrynšot kanała
Jak i Bondarava, Juspa ŭ svaim kanale staranna vyšukvaje «šlachieckuju kramołu» na palicach vina-harełačnych adździełaŭ u kramach, u adzieńni pasažyraŭ mietro, na vyvieskach i ŭ publikacyjach umieranych łukašystaŭ. Vorahami i pamahatymi prychilnikaŭ pieramien u baraćbie ź ichnim «ruskim śvietam» abvieščany Piatroŭski, Špakoŭski, Dziermant, Marzaluk, Tur, Varanica, Sierada i mnohija inšyja.
Zrešty, vialikaj papularnaści jahony kanał pakul nie zajmieŭ.
Trunary Bondaravaj
Paśla błakavańnia kanała «Za Sajuznuju dziaržavu Biełarusi i Rasii» praciŭniki Bondaravaj ź liku jabaciek pahražajuć pieraśledam joj i jaje prychilnikam («vambatam»), jakija aktyŭna repościli hety kanał
Nasuprać, u piku im stali ŭźnikać kanały, dziejnaść jakich skiravana kali nie na padtrymku biełaruščyny i idei niezaležnaści, to prynamsi suprać antybiełaruskaj kodły.
Takija kanały jak Paganus, «Borŝ s kapustoj, no nie krasnyj» i asabliva «Dla słužiebnoho polzovanija» padrabiazna fiksujuć usie antybiełaruskija i antydziaržaŭnyja vykazvańni, jakija źjaŭlajucca ŭ kanałach i čatach «bondaraŭcaŭ».
Mietady baraćby suprać Bondaravaj dakładna paŭtarajuć tyja, što jana sama vykarystoŭvała suprać inšych. Čyja zbroja akažacca macniejšaj?
Pryznańnie ekstremisckim kanała «Za Sajuznuju Dziaržavu Biełarusi i Rasii» stała dla ich sapraŭdnym padarunkam.
Kali Bondarava dystancyjanavałasia ad «ekstremistki» Mirsalimavaj (niezrazumieła čamu, ale ŭ dopisach svaich apanientaŭ jana časta fihuruje jak «śvińnia-kapiłka») i abvinavačvała jaje ŭ roznych hrachach, to kanał Šyptenki — heta toje, što abjadnoŭvała ichnija łahiery. Usie jany masava repościli i cytavali jaho dopisy, a ciapier nad kožnym ź ich pavis damokłaŭ mieč.
Na kanale «Biełoruska «topit» Taćciana Sidarovič zajaŭlaje, što pryncypova nie budzie čyścić ekstremisckija dopisy i hatovaja za heta adsiedzieć
Pa svajoj naiŭnaści jany miarkujuć, što kab nie trapić pad palityčnyja represii za raspaŭsiud ekstremisckich materyjałaŭ dastatkova taho, što kanał Šyptenki pierajmienavali ŭ «Miadzielski sud» i pieranieśli pad inšy niknejm. Praktyka palityčnaha pieraśledu kaža, što hetaha niedastatkova.
Častka prychilnikaŭ Bondaravaj upeŭnienyja ŭ svajoj niedatykalnaści i admaŭlajucca vykonvać rašeńni suda. Taćciana Sidarovič, jakaja viadzie kanał «Biełoruska «topit», zajaviła, što pryncypova nie budzie čyścić svoj kanał ad zabaronienych dopisaŭ: «Možacie sudzić, sadzić. Značyć, budzie precedent. Dažyli».
Prabiełaruskija kanały heta ŭsio fiksujuć i pahražajuć, jak kaliści pahražali ŭsim «bondaraŭcy», pieraśledam za parušeńnie biełaruskaha zakona.
Ryhor Azaronak pahražaje abodvum łahieram adrazu
Ryhor Azaronak, jaki i sam pa natury bližejšy da idejaŭ «ruskaha śvietu», vymušany adnoj rukoj pisać źjedlivyja kpiny z prychilnikaŭ zabaronienaha Šyptenki, a inšaj pahražać prabiełaruskim łukašystam.
Ale ŭžo i jaho zapatrabavanaść nie padajecca nastolki harantavanaj.
Ahresiŭnyja napadki na ŭsio biełaruskaje sparadzili reakcyju navat tam, dzie užo nie čakali jaje pabačyć — u łahiery łukašystaŭ.