Stała viadoma, jak moh zahinuć načalnik adździeła SIZA-1
U niekrałohu 43-hadovaha majora ŭnutranaj słužby Mikałaja Łaŭrynoviča adznačałasia, što jon «trahična zahinuŭ».
14.10.2024 / 14:08
Mikałaj Łaŭrynovič pracavaŭ u SIZA-1. Fota: baza dakumientaŭ, MUS
Mikałaj Łaŭrynovič byŭ načalnikam režymnaha adździeła SIZA-1 (u narodzie hety śledčy izalatar byŭ viadomy jak Vaładarka, ale niadaŭna jon pierajechaŭ na novy adras u Kaladzičy).
U niekrałohu paviedamlałasia, što jon trahična zahinuŭ. Bolš detalaŭ nie pryvodziłasia.
Pa infarmacyi adnoj krynicy, Łaŭrynovič zahinuŭ pry pažary ŭ łaźni na svaim leciščy.
Na karyść hetaj viersii śviedčyć i inšaja infarmacyja. U zvodkach MNS jość paviedamleńnie ab pažary 5 kastryčnika ŭ žyłym domie ŭ vioscy Mlechava Barysaŭskaha rajona. Dom naležyć piensijaniercy. Na pažary zahinuŭ jaje 43-hadovy syn. Hod naradžeńnia supadaje z hodam naradžeńnia Łaŭrynoviča. A na jaho maci zapisany dom u vioscy Mlechava (pa źviestkach z bazy «Biełpoła»).
Pryčyny pažaru ŭ paviedamleńni MNS nie nazyvalisia.
Zhodna z bazami «Biełpoła», u sistemie papraŭčych orhanaŭ Łaŭrynovič pracavaŭ z 1999 hoda. Pačynaŭ kantraloram u SIZA-1. Pracavaŭ niejki čas taksama ŭ kałonii № 14 (Navasady, Barysaŭski rajon), papraŭčych ustanovach adkrytaha typu № 36 i 34. Z 2016 hoda viarnuŭsia na rabotu ŭ SIZA-1.
Za čas pracy ŭ papraŭčych ustanovach Łaŭrynoviču niekalki razoŭ rabili strohija vymovy. Adna ź ich — za toje, što budučy pad ałkaholem chvaliŭsia słužbovym paśviedčańniem u hramadskim miescy.
Jon prachodziŭ adnym z paciarpiełych pa kryminalnaj spravie ab apubličvańni piersanalnych danych siłavikoŭ, zaviedzienaj u 2020 hodzie.
Trahična zahinuŭ načalnik adździeła SIZA-1