U Maskvie za paklop na Łukašenku sudziać palitołaha Suzdalcava. Pahražaje da 5 hadoŭ
Pra sud nad Andrejem Suzdalcavym, jaki maje adbycca 15 kastryčnika, napisaŭ u svaim telehram-kanale jahony vučań, błohier Raman Junieman.
12.10.2024 / 22:45
Andrej Suzdalcaŭ
Junieman, jaki pad kiraŭnictvam Suzdalcava piša kandydackuju dysiertacyju pra Kazachstan, adznačaje, što jahony nastaŭnik 13 hadoŭ pracavaŭ u Biełarusi i nibyta «adzin z najlepšych u RF ekśpiertaŭ pa hetaj krainie». Prytym jon «paśladoŭny krytyk režymu Alaksandra Łukašenki», ale «vyklučna z prarasijskich pazicyj».
«Jon całkam spraviadliva ličyć, što RB tolki imituje intehracyju i stvareńnie Sajuznaj dziaržavy, biaskonca zaciahvaje praces, a na mižnarodnym uzroŭni biełaruskija ŭłady pravodziać chitruju šmatviektarnuju palityku, atrymlivajučy pry hetym ad Rasii vielizarnyja lhoty i źnižki», — piša błohier pra Suzdalcava.
Dziela taho Łukašenka jamu, maŭlaŭ, usialak pomścić, prytym dajšło navat da taho, što jaho buduć sudzić pa kryminalnaj spravie.
Kryminalnaja sprava pa Suzdalcava zaviedziena pavodle pazovu pasolstva Biełarusi ŭ Rasii za paklop (art. 128.1 č. 2 i č. 5 Kryminalnaha kodeksa RF). Sud nad palitołaham projdzie ŭžo 15 kastryčnika ŭ maskoŭskim Lafortaŭskim sudzie.
Pa artykułach, jakija inkryminujucca Suzdalcavu, jamu pahražaje da 5 hadoŭ źniavoleńnia.
«Ale navat kali sprava skončycca nie turmoj, a štrafam abo papraŭčymi rabotami, dla Suzdalcava taki prysud moža aznačać, što jon bolš nie zmoža pracavać u VNU i aficyjna zajmacca navukovaj dziejnaściu. Jon budzie razhromleny jak śpiecyjalist», — haruje jahony vučań.
Andrej Suzdalcaŭ — rasijski palitołah, palityčny kamientatar pa biełaruskaj tematycy. Jon naradziŭsia va Uładzivastoku, u pačatku 1990-ch ažaniŭsia ź biełaruskaj i pierajechaŭ u Biełaruś, dzie staŭ razhortvać prarasijskuju dziejnaść u asiarodku demakratyčnaj apazicyi.
U 2006 hodzie jon byŭ pazbaŭleny dazvołu na žycharstva i vysłany z krainy. Pavodle aficyjnaj farmuloŭki, Suzdalcaŭ staviŭ «pad pahrozu nacyjanalnuju biaśpieku Biełarusi».
Paśla departacyi Suzdalcaŭ asieŭ u Maskvie, dzie staŭ namieśnikam dekana fakulteta suśvietnaj ekanomiki Vyšejšaj škoły ekanomiki.
11 studzienia 2024 hoda MUS RB pryznała «ekstremisckim farmavańniem» telehram-kanał «Andriej Suzdalciev». Paśla taho kanał nieadkładna spyniŭ pracu.
U kancy sakavika 2024 hoda staronka Andreja Suzdalcava źnikła z sajta Vyšejšaj škoły ekanomiki, imavierna, praź pieraśled biełaruskimi ŭładami. U krasaviku rasijskija ŚMI paviedamili pra jahonaje zatrymańnie, što sam palitołah paśla abviarhaŭ i nazyvaŭ «pravakacyjaj».
«Dla jaho Łukašenka — biełaruski nacyjanalist». Čym viadomy rasijski palitołah Andrej Suzdalcaŭ
Rasijskija ŚMI paviedamili pra zatrymańnie Andreja Suzdalcava. Jon abviarhaje
Telehram-kanał Suzdalcava abvieščany ŭ Biełarusi «ekstremisckim farmavańniem»
Eks-siłavik Ihar Makar: Płanavałasia fizičnaje źniščeńnie palitołaha Suzdalcava