Biznes i inviestaraŭ źbirajucca pazbavić ilhot
Na sajcie Nacyjanalnaha pravavoha internet-partała apublikavany zakonaprajekt sa źmienami ŭ Padatkovy kodeks na 2025 hod. Siarod prapanoŭ — skaracić padatkovyja lhoty, jakija šyroka prymianiajucca biznesam i inviestarami, piša partał banki24.by.
13.10.2024 / 13:00
Admiena lhot na raźmierkavańnie prybytku
Prajekt źmienaŭ u Padatkovy kodeks prapanuje paetapnuju admienu lhotnych stavak pa padatku na prybytak u pamiery 6% i 0%. Hetyja staŭki dziejničajuć u dačynieńni da dyvidendaŭ i padachodnaha padatku na raźmierkavańnie prybytku. Źmieny zakranuć situacyi, kali prybytak nie raźmiarkoŭvaŭsia siarod udzielnikaŭ (akcyjanieraŭ) biełaruskich arhanizacyj — padatkovych rezidentaŭ Respubliki Biełaruś na praciahu troch i piaci papiarednich kalandarnych hadoŭ adpaviedna.
Zhodna z pałažeńniami zakonaprajekta, admiena nazvanych ilhot budzie paetapnaj. Staŭka 6% na raźmierkavańnie prybytku, jakaja prymianiajecca paśla trochhadovaha pieryjadu, budzie admieniena z 1 studzienia 2026 hoda, a staŭka 0%, jakaja dziejničaje paśla piacihadovaha terminu, spynić svajo dziejańnie z 1 studzienia 2028 hoda.
Takim čynam, u 2025 hodzie hetyja normy zastanucca ŭ sile, i pieršyja źmieny ŭstupiać u siłu tolki z 1 studzienia 2026 hoda.
Admianiajucca lhoty na vałodańnie dolami bolš za 3 hady
Płanujecca admianić ilhotu, jakaja vyzvalaje ad padachodnaha padatku dachody ad prodažu dolaŭ u statutnym fondzie biełaruskich arhanizacyj, kali ŭładalnik trymaŭ hetyja doli nie mienš za try hady. Taksama heta zakranie akcyi biełaruskich kampanij, jakija možna budzie pradavać nie raniej čym praz try hady paśla kupli. Tym nie mienš, zachavajucca normy, jakija dazvalajuć adymać z padatkaabkładalnaj bazy vydatki na nabyćcio akcyj abo dolaj u kampanii.
Hetaja norma ŭstupić u siłu z 1 studzienia 2025 hoda. Dziejańnie lhoty, jakaja vyzvalaje dachody inviestaraŭ — fizičnych asob ad padatkaabkładańnia pry ŭdziele ŭ zarehistravanych u Biełarusi inviestycyjnych fondach, budzie padoŭžanaje da 1 studzienia 2030 hoda.
Padatkaabkładańnie kryptavaluk i tokienaŭ
Prajekt udakładniaje padatkaabkładańnie ździełak z kryptavalutami i tokienami. Padatki buduć spahaniacca z apieracyj praz zamiežnyja płatformy, ale nie raspaŭsiudziacca na ździełki z rezidentami Parku vysokich technałohij, atrymańnie ŭ spadčynu tokienaŭ i dareńnie, pry hetym ahulnaja suma padarunkaŭ u hod nie pavinna pieravyšać 11 516 rubloŭ.