Aŭtarku łozunha «Stop tarakan» adrazu asudzili zavočna, a potym vyzvalili pa amnistyi
U sakaviku Śledčy kamitet pačaŭ śpiecvytvorčaść suprać piensijanierki z Hłybokaha Ludmiły Barejki. 8 traŭnia sud Hłybockaha rajona zavočna pryznačyŭ joj dva hady źniavoleńnia pavodle artykuła 188 Kryminalnaha kodeksa (paklop). Jak piša «Viciebskaja Viasna», 9 kastryčnika Viciebski abłasny sud «vyzvaliŭ» Ludmiłu pa amnistyi i źniaŭ sudzimaść.
14.10.2024 / 11:40
Zhodna z pastanovaj abłasnoha suda, žančynu amnistavali padstavie abz. 5 art. 1 Zakona Respubliki Biełaruś ad 07.12.2022 № 220-3 «Ab amnistyi ŭ suviazi z Dniom narodnaha adzinstva». Taksama ŭ jaje źniali sudzimaść.
24 traŭnia 2024 hoda žančynu ŭnieśli ŭ pieralik hramadzian Biełarusi, zamiežnych hramadzian i asob biez hramadzianstva, jakija majuć dačynieńnie da ekstremisckaj dziejnaści.
U sakaviku 2020 hoda Ludmiła Barejka dała intervju błohieru Siarhieju Cichanoŭskamu, jaki zavitaŭ tady ŭ Hłybokaje. U hutarcy ź im jana pryhadała kazku Karnieja Čukoŭskaha «Tarakanišča» pra tarakana, jaki ŭsich trymaŭ u strachu. Ale vyśvietliłasia, što jaho možna prosta raścisnuć. Heta videa na kanale «Kraina dla žyćcia» pahladzieli amal 1,6 młn čałaviek. «Stop tarakan!» staŭ łozunham palityčnaj kampanii Cichanoŭskaha.
U traŭni 2020 hoda za heta intervju žančyna atrymała štraf u 270 rubloŭ — za parušeńnie č.1 art. 23.34 KaAP. Pavodle abvinavačańnia, jana ažyćciaviła «pikietavańnie šlacham publičnaha vykazvańnia svaich hramadska-palityčnych intaresaŭ i asabistaha staŭleńnia da dziejučaj ułady ŭ režymie anłajn». Pad pahrozaj kryminalnaha pieraśledu žančyna vymušana była pakinuć Biełaruś.