«U mianie niama kim jaho zamianić». Jakija ciapier nastroi ŭ kiraŭnikoŭ siaredniaha źviana?
«Naša Niva» apytała dastupnych nam rabotnikaŭ dziaržsiektara i dziaržkiravańnia. Niekatoryja adkazy krasamoŭnyja.
19.10.2024 / 14:26
Prapahanda bolš upłyvaje na pavodziny čynoŭnikaŭ, čym na hramadstva ahułam. Ilustracyjnaje fota: Homielskaja praŭda
«Kali nie zrablu ničoha, maksimum vymova. Kali zrablu nie tak — pasadziać», — heta viadomaja maksima biełaruskaha čynoŭnika apošnich dziesiacihodździaŭ. Jakija jašče tendencyi, nastroi, charakternyja prajavy ŭ rehijonach? «Naša Niva» apytała niekalki čałaviek, jakich možna adnieści da liku «miascovych elitaŭ».
Varta adznačyć, što bazavyja zadačy ŭ pradstaŭnikoŭ roznych hrup hetych elitaŭ roznyja.
Intares kiraŭnikoŭ dziaržpradpryjemstvaŭ u tym, kab vykonvać płan pa vytvorčaści i nie davać pry hetym minusu, a taksama vypłačvać zarobki nie nižejšyja za siarednija pa svajoj halinie.
Intares načalnika horada ŭ tym, kab vykonvać płan pa padatkach i źnižać uzrovień datacyjaŭ ź biudžetu vobłaści.
Intares rajonnych kiraŭnikoŭ prakuratury, MUS, KDB i KDK u tym, kab chutčej za inšyja viedamstvy znajści parušeńni ŭ pracy tych ci inšych struktur i arhanizacyj i pieršymi vynieści papiaredžańnie abo pryciahnuć da adkaznaści.
Cikavaść ža kiraŭnikoŭ bujnoha pa mierkach miascovaści biznesu ŭ tym, kab jak maha mieniej pierasiakacca ŭ svajoj dziejnaści z pradstaŭnikami vyšej pieraličanych hrup.
Pavodle acenak našych surazmoŭcaŭ, adnosiny pamiž hetymi halinami elitaŭ nie adroźnivajucca ŭzajemnym davieram.
«Ludzi zaleźli ŭ rakavinki, izalavalisia. Siłaviki sami pa sabie, čynoŭniki sami pa sabie, pramysłoŭcy sami pa sabie, pryvatny biznes taksama sam pa sabie kučkujecca. Zrazumieła niežadańnie mieć znosiny, heta tolki ŭzmacniaje niedavier», — kaža adzin z respandentaŭ.
Pieramoha dvudumstva
Apytanyja kanstatujuć pieramohu dvudumstva. Na ŭsio bolšuju kolkaść temaŭ možna havaryć tolki ź blizkimi znajomymi.
Tamu ŭ publičnaj prastory bačnyja tolki vielmi vyjaŭlenyja pohlady tych ludziej, čyj pohlad supadaje z aficyjnym.
«Najlepšaj reakcyjaj na start palityčnaj dyskusii ličycca pakinuć pamiaškańnie», — adznačaje surazmoŭca «Našaj Nivy».
I nichto z respandentaŭ nie naziraje «supracivu na miescach» pastanovam ź Minska. Sabatažu nie nazirajecca, roŭna jak, zrešty, i inicyjatyvy.
«Kali nie zrablu ničoha, maksimum vymova. Kali zrablu nie tak — pasadziać», — heta maksima biełaruskaha čynoŭnika.
Respandenty pryvodziać prykłady kansultacyj ź Minskam pa pytańniach, jakija hadoŭ piać tamu jany vyrašali samastojna, a ciapier pierastrachoŭvajucca.
Słužba ŭ orhanach — samy lohki karjerny šlach
Słužba ŭ orhanach na siońnia ŭsprymajecca jak samy lohki karjerny šlach, deficyt kadraŭ u siłavych strukturach znachodzicca na zvyčajnym uzroŭni.
Tyja, chto byŭ najbolš niazhodny z dyktaturaj, užo zvolnilisia. Niekatoryja nieachvotna dasłužvajuć da kanca kantraktu, tamu što zvalnieńnie da zakančeńnia kantraktu siońnia, u 2024-m, u vajenny čas, abaviazkova pryciahvaje ŭvahu orhanaŭ kontrvyviedki. Kali i zvalniajucca — to chitrymi, vakolnymi šlachami.
A što Zachad moža prapanavać?
Adnosinami z Zachadam apytanyja pradstaŭniki dziaržsiektara i dziaržaparatu nie cikaviacca, ličačy, što Zachad pakul ničoha kankretnaha nie zdolny prapanavać ni im, ni Biełarusi ŭ cełym.
Respandenty ź dziaržsiektara ličać, što prapahanda bolš upłyvaje na pavodziny čynoŭnikaŭ, čym na hramadstva ŭ cełym. Jany tatalna pracujuć z ahladkaj na toje, jak ich rašeńni mohuć być acenieny naviersie.
Čystki ładna praredzili administracyjnyja kadry na roznych uzroŭniach. Asnoŭnyja padstavy dla zvalnieńnia — źviazanaja z Ukrainaj bijahrafija abo ŭdzieł svajakoŭ u pratestach.
Dla prasoŭvańnia pa słužbie abo pracaŭładkavańnia na dziaržsłužbu, iranizujuć surazmoŭcy, daviedka z KDB ciapier nastolki ž abaviazkovaja, jak daviedka ź psichdyspansiera.
Pry hetym apytanyja ličać, što deficyt kadraŭ vyćvieražaje kiraŭnictva i ŭpłyvaje na tempy represij. U kiraŭnikoŭ usio ž jość mahčymaść adstojvać patrebnych śpiecyjalistaŭ, arhumientujučy heta słovami «ŭ mianie niama kim jaho zamianić».
Ale takija pryvatnyja vypadki nie ŭpłyvajuć na ahulnuju karcinu, tamu što, na dumku apytanych, prajava cikavaści da losaŭ čužych rabotnikaŭ budzie ŭspryniata jak simpatyja da apazicyjanieraŭ. Čałavieka, hatovaha ad svajho imia ŭnieści prapanovu ab spynieńni represij, ličać apytanyja, u krainie niama. Tamu jany buduć praciahvacca.
Kali vam važnaja praca, jakuju robiać žurnalisty «Našaj Nivy», padtrymajcie nas danatam praz «Patreon».