Zatrymanych u Biełarusi miljarderaŭ z «Urałkalija» vypuścili na svabodu
U pačatku kastryčnika pabyvali za kratami Jaŭhien Šaviel i Dźmitryj Łobiak — byłyja partniory pa «Urałkalii», a taksama blizkija siabry Dźmitryja Maziepina. Jany vyjšli na svabodu, imavierna, paśla 10 dzion zatrymańnia.
15.10.2024 / 12:47
Źleva naprava: Jaŭhien Šaviel i Źmicier Łobiak. Fota: bazy Biełpoła
Zatrymańni ŭ kampanii Jaŭhiena Šaviela i Dźmitryja Łobiaka «Juras-Ojł» adbylisia 5—6 kastryčnika. Razam z ułaśnikami byli zatrymanyja i mieniedžary kampanii. Pavodle papiaredniaj infarmacyi, pretenzii da ich mieli padatkovuju pryrodu. Ci było ŭ vyniku vystaŭlenaje abvinavačvańnie, nieviadoma. Nijakaj aficyjnaj infarmacyi nie publikavałasia.
«Juras-Ojł» — heta biełaruskaja kampanija, dyler pramysłovaj chimii i ŭhnajeńniaŭ, u jakoj Łobiak i Šaviel — suakcyjaniery.
Šaviel i Łobiak — biełarusy karaniami, jakija zarabili svaje asnoŭnyja hrošy ŭ Rasii. Jak možna mierkavać, i žyli jany zbolšaha tamsama.
Jany byli najbližejšymi biznes-partniorami byłoha ŭładalnika «Urałkalija» Dźmitryja Maziepina. Usie troje razam vučylisia ŭ 5-j rocie Minskaj suvoraŭskaj vučelni 29-ha vypusku.
Čym ciapier vałodajuć hetyja biznesoŭcy, my nie viedajem praz ahulny trend na zašyfroŭvańnie aktyvaŭ u Rasii.
Na siońnia «Urałkalijem» na 100% vałodaje kampanija «Urałchim». Da sakavika 2022 hoda «Urałchimam» na 100% vałodaŭ Dźmitryj Maziepin. Ciapier struktura ŭłasnaści kampanii nie raskryvajecca.
Raniej Dźmitryj Łobiak vałodaŭ 20% «Urałkalija» i byŭ daradcam hienieralnaha dyrektara. Paśla hetaja dola pierajšła Maziepinu. Šaviel byŭ top-mieniedžaram u toj samaj kampanii, imavierna, i z dolaj u biznesie.
Akramia taho, Šaviel i Łobiak vałodali pa 17% akcyj Vierchniakamskaha elektramiechaničnaha zavoda. Šaviel i na siońnia saŭładalnik «Kazfasfata» — adnaho z najbujniejšych vytvorcaŭ fosfarnych uhnajeńniaŭ u śviecie.
Biełaruskaja kampanija partnioraŭ zajmałasia dylerstvam chimičnych praduktaŭ, i heta, jak možna mierkavać, daloka nie asnoŭny i nie hałoŭny dla ich biznes.
Zatrymańni pa padatkovym artykule ŭ Biełarusi niaredka vykarystoŭvajucca, kab «padstryhčy» paśpiachovych biznesmienaŭ. Zvyčajna ludzi takoha kalibru vypłačvajuć vykup za svaju svabodu, jaki patrabujecca, a spravy čaściej za ŭsio nie dachodziać da suda.
Padatkovaje zakanadaŭstva časta dvuchsensoŭnaje, i tamu lohka vykarystoŭvajecca dla vystaŭleńnia pretenzij.
Vykuplać siabie ŭ biełaruskich siłavikoŭ tolki za apošnija hady pryjšłosia mnohim: krynicy «NN» paviedamlali, što Hienadź Kirejkaŭ, ułaśnik «Green», vyjšaŭ na svabodu za 5 miljonaŭ dalaraŭ, za 10 miljonaŭ — ułaśnik «Sihmaplus» Vital Sinicki, za stolki ž eks-kiraŭnik Pryjorbanka Siarhiej Kaściučenka i hetak dalej.
Varta nahadać, što Raman Pratasievič u intervju ANT paśla svajho pryziamleńnia śćviardžaŭ, što telehram-kanał «Niechta» spansiravaŭ niejki rasijski miljarder, źviazany z Urałam i zdabyčaj karysnych vykapniaŭ. Pad hetaje apisańnie padpadaje Dźmitryj Maziepin. Tady heta, adnak, padałosia zrežysavanaj zajavaj ź niejkimi nievidavočnymi metami. Sam Maziepin paśla zajaviŭ, što jon i jaho kampanii nikoli nie finansavali telehram-kanał «Niechta».
Šaviel i Łobiak, pa našaj infarmacyi, majuć i biełaruskija, i rasijskija pašparty adnačasova.
Kali vy viedajecie pra hetuju spravu bolš, pišycie redaktaru «Našaj Nivy» ŭ TH ci na nivanasha@proton.me. Abo lubomu redaktaru ci žurnalistu «Našaj Nivy», jakoha viedajecie asabista.