У Беларусі зноў заўважылі рэдкую качку з Усходняй Азіі
Нетыповую для нашай краіны качку сфатаграфавалі на Бярэзіне.
15.10.2024 / 14:55
Фота: Onliner.by
Жыхар Бабруйска сустрэўся з незвычайнай качкай яркага колеру. Прыгожую птушку мужчына заўважыў на рацэ Бярэзіне. Аказалася, што гэта качка-мандарынка, якую ў Беларусі сустракаюць вельмі рэдка, паведамляе Onliner.
«Яркі самец праяўляў цікавасць да мясцовай качкі. Яны некаторы час плавалі разам, але, мабыць, не знайшлі агульную мову, і качка адплыла. Раней такіх качак я не сустракаў, хоць наведваю Бярэзіну часта», — распавёў мужчына.
Мінулай восенню качка-мандарынка жыла на Дубравенцы ў Магілёве. Увогуле, за апошнія пяць гадоў гэтую птушку ў Беларусі сустракалі ўсяго шэсць разоў.
Радзіма мандарынак — Усходняя Азія. Акрамя таго, частка пярэстых качак жыве ў некаторых краінах Заходняй Еўропы, дзе іх сталі разводзіць як дэкаратыўных птушак дзеля прыгажосці. З цягам часу мандарынкі вярнуліся ў прыроду і адаптаваліся да еўрапейскіх умоў.
Арнітолагі прапануюць дзве версіі таго, як мандарынка магла аказацца ў Беларусі. Яна альбо магла ўцячы з нейкага заасада і апынуцца ў дзікай прыродзе, альбо проста мігравала з Заходняй Еўропы.