Kiraŭniki raźviedki krain Zachadu ŭstryvožanyja «dzikimi pavodzinami» rasijskich śpiecsłužbaŭ
Paśla vysyłki sotniaŭ špijonaŭ, jakija vydavali siabie za dypłamataŭ, Kreml prymianiaje bolš ryzykoŭnyja i mienš tradycyjnyja mietady — padpały, dyviersii i navat zmovy z metaj zabojstva.
17.10.2024 / 14:28
Uładzimir Pucin vystupaje na sustrečy z aficerami Hałoŭnaha raźviedvalnaha ŭpraŭleńnia Hienieralnaha štaba Uzbrojenych sił Rasii, 2018 hod. Fota: Alexei Druzhinin, Sputnik, Kremlin Pool Photo via AP
Jak piša The Guardian, u apošni hod zachodnija raźviedki fiksujuć značnuju aktyvizacyju dziejnaści rasijskich śpiecsłužbaŭ paśla šoku, vyklikanaha vysyłkaj ź Jeŭropy 450 ahientaŭ, jakija vydavali siabie za dypłamataŭ, u adkaz na ŭvarvańnie va Ukrainu.
Što asabliva tryvožyć kiraŭnikoŭ raźviedki, dyk heta poŭnaja biezrazvažnaść rasijskaj aktyŭnaści.
«Rasijskija śpiecsłužby, ščyra kažučy, pavodziać siabie krychu dzika», — cytuje vydańnie słovy kiraŭnika MI-6 Ryčarda Mura.
Mišeńniu rasijskich špijonaŭ stali kiraŭniki abaronnaj pramysłovaści pa ŭsioj Jeŭropie. Niadaŭna była raskryta zmova z metaj zabojstva hienieralnaha dyrektara niamieckaj abaronnaj kampanii Rheinmetall, jakaja ažyćciaŭlaje pastaŭku ŭzbrajeńnia Ukrainie, Armina Papierhiera.
Ciapier padraździaleńni palicyi pa baraćbie z teraryzmam niekalkich krain Jeŭropy rasśledujuć, ci źviazany vypadki ŭzharańniaŭ pasyłak na składzie DHL u Birminhiemie i Lejpcyhu ŭ kancy lipienia z bolš maštabnaj kampanijaj, jakuju rasijskija špijony pravodziać pa ŭsioj Jeŭropie ŭ hetym hodzie. Kiraŭniki raźviedki ŭ Vialikabrytanii i inšych krainach asudzili jaje jak biezrazvažnuju.
Niamieckaja hazieta Tagesspiegel paviedamiła, što pasyłka zaharełasia ŭ Lejpcyhu, kali jaje źbiralisia pahruzić na hruzavy samalot. Rejs byŭ zatrymany. Kali b samalot uźlacieŭ svoječasova, jana b zaharełasia ŭ pavietry, što mahło mieć vielmi surjoznyja nastupstvy.
Da hetaha ŭ sakaviku adbyŭsia pažar va ŭschodnim Łondanie na składzie kampanii, źviazanaj z Ukrainaj. A ŭ mai ŭ Varšavie hareŭ handlovy centr. U abodvuch vypadkach padazrajuć rasijskija śpiecsłužby.
Metaj padobnych napadaŭ, na dumku zachodnich čynoŭnikaŭ, jość imknieńnie pasiejać chaos siarod partnioraŭ Ukrainy, parušyć vajennyja pastaŭki ŭ Kijeŭ i ŭzmacnić raskoł u hramadstvie. Ale pryčyna, pa jakoj prynamsi niekatoryja ź ich vyhladajuć bolš chaatyčnymi, zaklučajecca ŭ tym, što mahčymaści Rasii dla tradycyjnaha špijanažu skaracilisia.
Jak piša vydańnie, biez tradycyjnaj sietki pasolskich špijonaŭ Rasija była vymušana źviartacca da bolš ryzykoŭnych i mienš tradycyjnych mietadaŭ, spadziajučysia na złačyncaŭ i inšych asob jak vykanaŭcaŭ svajoj brudnaj pracy.
Na minułym tydni kiraŭnik MI5 Kien Makkałum papiaredziŭ, što rasijskaje HRU pravodzić kampaniju pa «stvareńni chaosu na vulicach Vialikabrytanii i Jeŭropy» z vykarystańniem davieranych asob, što «jašče bolš źnižaje prafiesijanalizm ich apieracyj».
Inšyja prykłady mierkavanaj rasijskaj aktyŭnaści vyhladajuć dyletanckimi i niaznačnymi. Francuzskija supracoŭniki raźviedki miarkujuć, što Rasija minułaj vosieńniu naniała hrupu małdavan dla praviadzieńnia małabiudžetnaj antysiemickaj hrafici-kampanii z vykarystańniem trafaretaŭ Zorki Davida pa ŭsim Paryžy, kab uzmacnić raskoł u hramadstvie na fonie vajny Izraila i CHAMAS.
Letam Francyja sarvała čarhovuju amatarskuju zmovu 26-hadovaha ŭradženca Danbasa, jaki mieŭ namier napaści na haspadarčuju kramu na poŭnač ad Paryža pierad letnimi Alimpijskimi hulniami. Jon byŭ aryštavany paśla taho, jak vypadkova ŭzarvaŭ vybuchovaje prystasavańnie ŭ svaim haściničnym numary niedaloka ad aeraporta Šarl de Hol.
Mietady viarboŭki, vidać, nosiać bieśsistemny charaktar: dla viarboŭki i apłaty pracy maładych ludziej, jakija simpatyzujuć Maskvie, vykarystoŭvajucca takija sacyjalnyja sietki, jak Telegram, choć, miarkujučy pa niekatorych siužetach, pastanoŭka zadač časta vyhladaje ŭ lepšym vypadku śpiekulatyŭnaj.
Pakul što kampanija sabatažu i zapałochvańnia nie akazała istotnaha ŭpłyvu dziakujučy efiektyŭnym dziejańniam jeŭrapiejskich raźviedvalnyjach i antyterarystyčnych ahienctvaŭ.
Sama Rasija časta admaŭlaje svoj udzieł u zmovach i akcyjach pa ŭsioj Jeŭropie, śćviardžajučy, što takija abvinavačvańni źjaŭlajucca nie bolš čym kanśpirałahičnymi teoryjami, prydumanymi jaje apanientami.
«Sprava vielmi surjoznaja». U Polščy praciahvajecca sprava padazravanych u dyviersijach i sabatažy
FT: Rasija płanuje terakty i dyviersii ŭ Jeŭropie