U ZŠA mužčyna zabiŭ žonku-biełarusku i jaje syna
Palicyja horada Chiendersana ŭ štacie Nievada zatrymała mužčynu pa imieni Karł Hrošen. Jon sam nabraŭ numar 911 i raskazaŭ palicyjantam, što jany pavinny pryjechać, bo adbyłosia surjoznaje złačynstva. Kali na miesca pryjechali pravaachoŭniki, to ich na parozie doma sustreŭ sam Hrošen i zajaviŭ pra dva trupy, jakija naležali jaho žoncy i pasynku, daviedalisia z amierykanskaj presy «Mocnyja naviny».
17.10.2024 / 20:36
Fota ilustracyjnaje
Paźniej supracoŭniki palicyi adznačać u spravazdačy, što Hrošen trymaŭ u rukach niekalki fłakonaŭ z recepturnymi preparatami, dva telefony, zaradnuju pryładu i niejki napoj. Usio heta mužčyna pakłaŭ na padłohu i zajaviŭ, što jaho pavinny aryštavać, pakolki jon dumaŭ, što žonka i pasynak chočuć jaho zabić.
Palicyja identyfikavała zabitych jak Nastaśsiu Akucinu (joj było 44 hady) i Siarhieja Skohinsa (20 hadoŭ). Susiedka raskazała detektyvam pra toje, što bačyła.
Spačatku, jak padałosia śviedcy, Hrošen vystaviŭ pasynka z domu. Paśla pačuŭsia huk strełaŭ abo chłapkoŭ, padobnych na streły. Paśla hetaha Skohins kinuŭsia da ŭvachodnych dźviarej i zabieh u dom. Dalej znoŭ pačulisia streły, a paśla ich nastupiła cišynia.
Kamiera dźviarnoha zvanka adnaho z susiedziaŭ zapisała huki taho, što ŭ palicyi pryniali za vosiem strełaŭ. Padčas pieratrusu ŭ haražy znajšli pistalet. Akramia taho, byli znojdzienyja recepturnyja preparaty, vypisanyja Hrošenu. U palicejskaj spravazdačy paznačanyja preparaty, jakija vykarystoŭvajucca pry lačeńni tryvožnaści, depresiŭnaha razładu, SDVH i parušeńnia snu.
Pry hetym palicyja padkreślivaje: nie znajšłosia nijakich dokazaŭ taho, što Akucina i Skohins sprabavali zabić Hrošena.
Zahinułaja Nastaśsia Akucina — uradženka Homiela.
«Mocnym navinam» udałosia znajści jaje znajomych, jakija trochi raskazali pra jaje. Nastaśsia vučyłasia ŭ 10-j himnazii, pastajanna ŭdzielničała ŭ školnych alimpijadach i navat pieramahała na respublikanskim etapie. Dziaŭčyna hulała ŭ «Što? Dzie? Kali?» i vielmi dobra viedała anhlijskuju movu.
Znajomyja žančyny kažuć, što dziakujučy svaim dasiahnieńniam i viedam jana zmahła pastupić u linhvistyčny ŭniviersitet biez ekzamienaŭ.
«Ja nie bačyła Naściu bolš za dvaccać hadoŭ, ale my praciahvali mieć znosiny ŭ sacsietkach, zachodzili adzin da adnaho ŭ Facebook, kab daviedacca pra naviny, pahladzieć fatahrafii. Prykładna hod tamu Naścia ź siamjoj pierajechała ŭ Łas-Viehas», — uspomniła surazmoŭca.
Akramia taho, znajomyja Nastaśsi raskazali, što jana vielmi šmat čytała i lubiła knihi.
Studentam, jakoha na mohiłkach zabiła drevam, akazaŭsia 17-hadovy salihorski chakieist