Za kraty ŭ 10 hadoŭ: Paŭnočnaja terytoryja Aŭstralija źniziła ŭzrost kryminalnaj adkaznaści
Ułady Paŭnočnaj terytoryi Aŭstralii — adnaho z subjektaŭ aŭstralijskaj fiederacyi — źnizili ŭzrost, ź jakoha možna pryciahvać ludziej da kryminalnaj adkaznaści. U vyniku za kraty znoŭ mohuć trapić dzieci va ŭzroście ad 10 hadoŭ, piša Bi-bi-si.
18.10.2024 / 07:16
Fota: AP Photo/Rick Rycroft
Takaja norma isnavała na hetaj terytoryi i raniej, adnak apošnim časam na ŭłady štataŭ i terytoryj Aŭstralii ŭzmacniaŭsia cisk z metaj prytrymlivacca rekamiendacyj AAN i prykładu inšych raźvitych krain i pavysić uzrost kryminalnaj adkaznaści z 10 da 14 hadoŭ.
U minułym hodzie ŭrad Paŭnočnaj terytoryi pryniaŭ hetyja parady i pavysiŭ uzrost «pasadki» z 10 da 12 hadoŭ. Adnak Ahrarnaja libieralnaja partyja, jakaja pryjšła da ŭłady ŭ žniŭni hetaha hoda, zajaviła, što ŭ intaresach baraćby z padletkavaj złačynnaściu ŭzrost varta znoŭ źnizić da 10 hadoŭ.
U partyi śćviardžajuć, što źnižeńnie ŭzrostu kryminalnaj adkaznaści nasamreč budzie na karyść dzieciam, chacia z takoj łohikaj nie zhodnyja mnohija lekary, pravaabaroncy i pradstaŭniki karennaha nasielnictva. Na ich dumku, vyniki praviedzienych daśledavańniaŭ śviedčać ab tym, što novaje zakanadaŭstva nie źnizić uzrovień złačynnaści, ale niehatyŭna — i niepraparcyjanalna — adabjecca na dzieciach abaryhienaŭ Aŭstralii i miełaniezijcaŭ — žycharoŭ astravoŭ Toresava praliva.
Paŭnočnaja terytoryja i tak u 11 razoŭ čaściej, čym inšyja jurysdykcyi krainy, sadžaje ŭ turmu dziaciej, pryčym bolšaść ź ich — pradstaŭniki karennaha nasielnictva.
Pavodle dadzienych aŭstralijskich uładaŭ, u 2022—2023 hadach u turmach krainy znachodziłasia kala 4,4 tys. dziaciej va ŭzroście ad 10 da 17 hadoŭ, pryčym Paŭnočnaja terytoryja vyniesła 273 takija prysudy. Jak paviedamlaje ŭrad Aŭstralii, na leta 2023 hoda za kratami zastavałasia 41 dzicia va ŭzroście ad 10 da 13 hadoŭ (u 2019 hodzie ich było 52).
Novyja ŭłady Paŭnočnaj terytoryi nastojvajuć na tym, što paśla pierakanaŭčaj pieramohi na vybarach, dzie jany abiacali žorstka zmahacca sa złačynnaściu, urad atrymaŭ narodny mandat na źnižeńnie ŭzrostu adkaznaści. Urad Paŭnočnaj terytoryi śćviardžaje, što kali ŭvieści kryminalnuju adkaznaść dla dziaciej u takim rańnim uzroście, heta dapamoža ŭtrymać ich ad ździajśnieńnia złačynstvaŭ u budučyni.
Padletkavaja złačynnaść
Pra kryzis padletkavaj złačynnaści kažuć ułady mnohich rehijonaŭ Aŭstralii, adnak urad Paŭnočnaj terytoryi pieršym vyrašyŭ pajści na takija miery.
Šerah hvałtoŭnych złačynstvaŭ, ździejśnienych u hetym hodzie, prymusiŭ ułady horada Alis-Sprynhs uvieści kamiendanckuju hadzinu dla padletkaŭ.
«My pajšli na vybary ź vielmi vyraznym płanam pa źnižeńni ŭzrostu kryminalnaj adkaznaści, i my nie źbirajemsia prasić prabačeńnia za vykanańnie našych pieradvybarnych abaviazacielstvaŭ zrabić našu terytoryju bolš biaśpiečnaj», — zajaviła hałoŭny ministr Lija Finakjara.
Urad Paŭnočnaj terytoryi maje namier taksama ŭzmacnić praviły vyzvaleńnia pad zakład.
Tym nie mienš, vyniki daśledavańniaŭ, praviedzienych jak u samoj Aŭstralii, tak i ŭ inšych krainach, śviedčać ab tym, što padletki, jakija patrapili za kraty, schilnyja da recydyvaŭ, a znachodžańnie ŭ turmie niehatyŭna adbivajecca na ich zdaroŭi, adukacyi i budučaj pracy.
U pačatku hetaha hoda Aŭstralijskaja kamisija pa pravach čałavieka — niezaležnaje fiederalnaje ahienctva — apublikavała dakład, u jakim havorycca, što ciapierašniaja palityka kirujecca papulisckaj rytorykaj, jakaja patrabuje žorstkaha padychodu da złačynnaści.
Kamisija ličyć, što zamiest hetaha ŭładam varta było b tracić hrošy nie na dziciačyja turmy, a na słužby padtrymki dziaciej.