«Niekatoryja nastaŭniki pramyvajuć mazhi dzieciam, što ich u Jeŭropie nichto nie čakaje». Baćki pra ideałohiju ŭ škołach
Pacikavilisia ŭ baćkoŭ padletkaŭ, jak za apošnija hady źmianiłasia situacyja ź dziaržaŭnaj ideałohijaj u škołach.
30.10.2024 / 08:00
Ilustracyjny zdymak. Fota: ivyenews.by
Členstva ŭ BRSM stała amal abaviazkovym
Byłaja nastaŭnica dzielicca ŭražańniem kaleh: patryjatyčnamu vychavańniu ciapier nadajuć značna bolš uvahi, čym heta było hadoŭ piać tamu.
«Stali aktyŭniej sačyć za tym, kab usie zapisvalisia ŭ pijaniery i asabliva ŭ BRSM. Nielha skazać, što raniej nie było vypadkaŭ, kali ŭ niekatorych škołach pierahibali z dobraachvotna-prymusovym zaličeńniem u BRSM, ale ciapier maštaby inšyja.
Raniej niekatoryja kłasnyja kiraŭniki mahli sabie dazvolić nie prymušać dziaciej ustupać u BRSM, i nijakich nastupstvaŭ, jak dla vučniaŭ, tak i dla nastaŭnikaŭ, nie było. Chočaš — idzi, nie chočaš — nie idzi».
Ciapier ža, pa słovach byłoj nastaŭnicy, z hetym stała stroha. Administracyja ciśnie na nastaŭnikaŭ, a tyja, u svaju čarhu, na vučniaŭ.
Patryjatyzmu vučać navat na baćkoŭskich schodach
Maci dvuch padletkaŭ 13 i 16 hadoŭ adznačaje, što ideałohii prybaviłasia jašče z pačatkam navučalnaha hoda 2021-2022.
«Ciapier navat na baćkoŭskich schodach tema «patryjatyzmu» zajmaje pieršaje miesca. Razmovam pra heta advodziać bolšuju častku času. Sam adukacyjny praces užo na druhim miescy», — kaža žančyna.
Maci školnikaŭ adznačaje, što taksama stała bolš schodaŭ dla dziaciej, na jakich tak ci inakš prasoŭvajuć dziaržaŭnuju ideałohiju.
«Historyja Biełarusi dzieciam padajecca tak, byccam jana pačałasia kali nie z 1994 hoda, to ŭ lepšym vypadku z utvareńnia SSSR. Raniej byccam by ničoha i nie było».
Pa słovach žančyny, ciapier u škołach aktyŭna zmahajucca z tym, kab dzieci nie jechali vučycca za miažu.
«Niadaŭna staršakłaśnikam razdavali ankiety, dzie pytalisia, kudy jany źbirajucca pastupać. Naš syn adkazaŭ, što ŭ Biełarusi, choć heta nie tak. Ale lepš, kab administracyja škoły pra heta nie viedała», — pryznajecca žančyna.
Byli vypadki, kali, daviedaŭšysia, što vučań płanuje pastupać, naprykład, u Polšču, administracyja škoły pačynała jamu pieraškadžać.
«Mohuć marudzić z vydačaj dakumientaŭ, mohuć zanižać bały. Niekatoryja nastaŭniki pačynajuć pramyvać mazhi dzieciam, što ich tam u Jeŭropie nichto nie čakaje i dalej u hetym duchu.
Nastaŭnikam i administracyi prylataje źvierchu, kali ŭ škole vialiki pracent vučniaŭ pastupaje za miažu, tamu heta ciapier zusim nie vitajecca. Z-za hetaha my papiaredzili starejšaha syna, kab nie raskazvaŭ pra svaje płany pa vučobie ŭ Polščy», — pryznajecca žančyna.
Ilustracyjny zdymak. Fota: «Naša Niva»
Pačali adznačać 2 krasavika
Jašče adzin baćka padletka, ź jakim parazmaŭlała «Naša Niva», dzielicca, što školnikam časta raskazvajuć pra Łukašenku.
«Raniej u škołach šmat kazali pra niebiaśpieku ŭžyvańnia narkotykaŭ i ałkaholu. Ciapier heta nie ŭ trendzie, bo dla ich važniej raskazać, jaki ŭ nas kłasny kiraŭnik [krainy] i nakolki važnaje śviata 17 vieraśnia.
Tradycyjna vielmi šmat uvahi nadajuć temie VAV. Na 2 krasavika taksama ładziać niejkija imprezy, choć raniej pra tak zvanaje śviata «jadnańnia narodaŭ Biełarusi i Rasii», zdajecca, navat nie zhadvali», — kaža baćka dzieviacikłaśnika.