U Hrodnie zapuścili bot padboru praktykavańniaŭ lačebnaj fizkultury, jaki zamianiaje daktaroŭ
Udzielniki i łaŭreaty konkursu Social Weekend u 2017 i 2019 hadach, hrodziency Dzianis i Darja Cišyny niadaŭna zapuścili novy prajekt — «Fizijabot». Heta čat-bot u telehramie, jaki padbiraje praktykavańni ŁFK i vučyć karystalnikaŭ pravilna ich vykonvać, piša Devby.io.
19.10.2024 / 19:23
Pradprymalnik i biznes-analityk Dzianis Cišyn i jahonaja žonka Darja — doktar-nieŭrołah i reabilitołah — nie pieršy hod zajmajucca prajektami dapamohi ludziam, jakija majuć patrebu ŭ reabilitacyi paśla insultu, traŭmaŭ i apieracyj.
U 2017 i 2019 hodzie prajekty Dzianisa i Darji pryznavalisia najlepšymi ŭ naminacyi «Zdaroŭje i adukacyja» na konkursie Social Weekend. Adnym z hetych prajektaŭ była płatforma «feezio — praktykavańni pa recepcie».
Šmat hadoŭ feezio byŭ dastupny vyklučna dla prafiesijanałaŭ — daktaroŭ i instruktaraŭ pa reabilitacyi. Z dapamohaj płatformy tyja składali prahramy praktykavańniaŭ dla svaich pacyjentaŭ. Adnak sam pacyjent nie moh samastojna vybrać praktykavańni ŭ prahramie — tolki pa pramoj spasyłcy ad śpiecyjalista.
«Ale popyt na reabilitacyju značna vyšejšy, čym prapanova, — kaža Darja. — U Biełarusi znajści instruktara abo reabilitołaha — ceły kvest.
Tamu ludzi vymušanyja šukać praktykavańni sami — u internecie, zabivajučy ŭ pošuk «prahramy pry bolu ŭ śpinie» abo «kurs praktykavańniaŭ paśla insultu», naprykład. U vyniku jany znachodziać kursy ad amataraŭ, «jakija my, śpiecyjalisty-reabilitołahi, časta pamiž saboj vielmi łajem», — dadaje dziaŭčyna.
U niejki momant Dzianis i Darja vyrašyli: treba adkryć achvotnym dostup da svaich prahram. Jakraz hetym časam u Rasii pačali błakavać YouTube — i para vyrašyła, što heta znak: bot z praktykavańniami ŁFK patrebny ruskamoŭnaj aŭdytoryi jak nikoli.
«Usio samaje składanaje na toj momant było zroblena: kantent — a heta tysiačy videa z praktykavańniami — my źniali na niekalki hadoŭ raniej dla feezio. Tady ž skłali nie adzin dziasiatak prahram — jak šabłony dla śpiecyjalistaŭ. Zastavałasia tolki zrabić sam bot i zalić tudy videa».
U vyniku ad idei da hatovaha praduktu prajšło ŭsiaho dva miesiacy. «Fizijabot» zarelizili paru tydniaŭ tamu, i ŭ pieršy ž tydzień na jaho padpisałasia 2000+ čałaviek, nie mienš za 10% karystalnikaŭ — heta daktary.
U pieršaj viersii bota byŭ tolki śpis praktykavańniaŭ. Paźniej dadali «simptamatar» u vyhladzie čałavieka — klikaješ na lubuju zonu na jaho ciele i bačyš pieralik prahram.
Da botu prykručany «Fizijačat»: kali karystalnik nie moža zaryjentavacca ŭ śpisie, jon moža napisać tudy. Na pytańni ŭ čacie adkazvaje sama Darja, a taksama jaje kalehi — fizičnyja terapieŭty i reabilitołahi.
Ale raspracoŭščyki chočuć z časam ad hetaha adyści, dadaŭšy ŭ bocie mahčymaść šukać i znachodzić daktaroŭ abo instruktaraŭ pa reabilitacyi — kab karystalniki źviartalisia niepasredna da ich.
Ciapier u bocie bolš za 80 prahram, ale nieŭzabavie płanujuć dadać jašče kala 15-20 — pa zapytach, jakija pryjšli ŭ «Fizijačat».
«My ź Dzianisam dniami abmiarkoŭvali: doktaru treba chutkaja mahčymaść znajści kankretnuju prahramu praktykavańniaŭ, kab tak ža chutka rekamiendavać jaje svajmu pacyjentu. Tamu my vyrašyli zrabić katałoh prahram z numarami — dadamo na hetym tydni», — kaža Darja.
Cišyny jašče płanujuć pracavać nad interfiejsam, kab «Fizijabot» staŭ intuityŭna zrazumiełym. Ale ŭžo ciapier hałoŭny fidbek ad kaleh — słovy padziaki: alternatyvy botu ŭ vyhladzie płatformy, na jakoj byli b sabranyja ŭsie praktykavańni dla reabilitacyi pry roznych zachvorvańniach, u ruskamoŭnym asiarodździ prosta niama.
Na pytańnie pra toje, kolki ŭkładziena ŭ raspracoŭku, Dzianis i Darja adkazvajuć, što pierastali ličyć hrošy jašče paru hadoŭ tamu — kali rabili feezio. Na toj momant suma ŭkładańniaŭ składała kala $70 tysiač.
«My apłačvali i zdymku ŭ studyi, i ahučku, i mantaž, i pracu prahramistaŭ», — kaža Darja.
Dzianis dadaje, što ŭ prajekt było taksama ŭkładziena niamała ich ułasnaj pracy:
«Naprykład, usie scenary videa i apisańnie Darja raspracoŭvała sama, — a heta zadača składaniejšaja navat, čym raspracoŭka softu. Treba było apisać usio da drobiaziaŭ: jak vykonvać praktykavańni (heta ž važna), pakazać rakurs — dzie pastavić kamieru. Tamu što, kali zdymać biez scenara, pradukcyjnaść — 1 praktykavańnie na hadzinu, a ŭ nas ich — paradku 1100. My navat rabili pakadravyja zamaloŭki — jak u vialikim kino».
«Paśla traŭmy muž kinuŭ — ja da hetaha była hatova». Historyja Dašy, jakaja vyžyła ŭ strašnaj avaryi