Ci zmoža ŭtrymacca Litva? U ZŠA sprahnazavali chod vajennych dziejańniaŭ u pieršyja 10 dzion paśla ŭvarvańnia Rasii ŭ Jeŭropu
Pavodle scenara, Rasija ŭ 2027 hodzie atakuje krainy Bałtyi ź niekalkich fłanhaŭ, u tym liku ź Biełarusi i Kalininhrada. Asnoŭny ŭdar prymuć niamieckija siły ŭ rehijonie. Jakija prahnozy nakont vyniku kanfliktu?
19.10.2024 / 21:29
Fota ź mierapryjemtsva pa simulacyi «najhoršaha scenara» rasijskaha ŭvarvańnia ŭ Jeŭropu. Madelavańnie ładziłasia Centram vajennych dziejańniaŭ novaha pakaleńnia ZŠA (Center on New Generation Warfare). Fota: Bild
Vajennaja hulnia, jakaja apisvaje «najhoršy scenar» mahčymaha napadu Rasii na ŭschodni fłanh NATA ŭ 2027 hodzie, była arhanizavanaja Centram vajennych dziejańniaŭ novaha pakaleńnia ZŠA (Center on New Generation Warfare). U hetaj kampjutarnaj vajennaj «hulni» analizavałasia reakcyja NATA na hipatetyčnaje nastupleńnie Rasii, kab lepš zrazumieć mahčymaści aljansu i vypracavać stratehii abarony krain Bałtyi, piša vydańnie Bild.
Pa scenary vajennaj hulni Rasija spačatku ŭryvajecca ŭ Łatviju i zachoplivaje jaje za niekalki dzion, a potym na čaćviorty dzień ź jaje terytoryi napadaje na Litvu — adnačasova z poŭnačy z Łatvii, z uschodu — ź Biełarusi i z zachadu, z Kalininhrada, sprabujučy zachapić Vilniu i adrezać Litvu ad Polščy šlacham zachopu Suvałkskaha kalidora.
U najhoršym scenary NATA prymaje rašeńnie pra aktyvizacyju 5-ha artykuła ab kalektyŭnaj abaronie tolki na 10-y dzień rasijskaha ŭvarvańnia. Da hetaha momantu armijam krain Bałtyi istotnuju dapamohu moža akazać tolki dysłakavany ŭ Litvie kantynhient uzbrojenych sił Hiermanii, pieradaje Bild.
Na hety momant kala 800 niamieckich sałdat słužać u Litvie ŭ składzie «bajavoj hrupy eFP» NATA. Jany asnaščanyja značnaj kolkaściu transpartnych srodkaŭ i sistem uzbrajeńnia, uklučajučy niekalki tankaŭ Leopard 2. Da kanca 2027 hoda kolkaść niamieckaha kantynhientu pavinna pavialičycca da cełaj bryhady (4800 sałdat i 200 hramadzianskich supracoŭnikaŭ) i 44 tankaŭ Leopard 2.
Pavodle scenara, niamiecki tankavy bataljon da kanca čaćviortaha dnia vajny dysłakujecca ŭ centralnaj Litvie ŭ jakaści reziervu.
Na piaty dzień bajavych dziejańniaŭ 44 niamieckija tanki Leopard 2 razam ź piachotaj robiać kidok na poŭnač krainy, chutka vychodziać za miežy Litvy i na siomy dzień vajny zachodziać u fłanh asnoŭnym rasijskim siłam, jakija nastupajuć z Łatvii.
«Z 7-ha pa 10-y dzień vajny niamieckija siły raźbivajuć kolkasna pieraŭzychodziačuju rasijskuju armiju i nienadoŭha spyniajuć jaje nastupleńnie z Łatvii. Pa skančeńni dziasiataha dnia ahulnyja straty litoŭskaj armii ŭ zmadelavanaj vajnie skłali b 17 tankaŭ, 145 broniemašyn i 3650 sałdat. Straty Rasii, pavodle simulacyi, akazalisia b značna vyšejšymi: 411 tankaŭ, 1019 broniemašyn i 11420 adzinak žyvoj siły.
Tym nie mienš, Litva była b spustošanaja i častkova akupavanaja Rasijaj», — paviedamlaje amierykanski Centr vajennych dziejańniaŭ novaha pakaleńnia.
Arhanizatary simulacyi padkreślivajuć, što padobnaha raźvićcia padziej možna było b paźbiehnuć, kali b Zachad reahavaŭ chutčej, abaronny biudžet kožnaha čalca NATA byŭ b pavialičany da 4% VUP, a ŭ krainach Bałtyi było b razhornuta bolš sił aljansu.
Situacyja ŭ Litvie padčas hipatetyčnaha rasijskaha ŭvarvańnia ź niekalkich frantoŭ na čaćviorty dzień simulacyi (žoŭtym paznačany niamiecki tankavy bataljon). Fota: Bild
Situacyja ŭ Litvie padčas hipatetyčnaha rasijskaha ŭvarvańnia ź niekalkich frantoŭ na siomy dzień simulacyi (žoŭtym paznačany niamiecki tankavy bataljon). Fota: Bild
Situacyja ŭ Litvie padčas hipatetyčnaha rasijskaha ŭvarvańnia ź niekalkich frantoŭ na dziasiaty dzień simulacyi (žoŭtym paznačany niamiecki tankavy bataljon). Fota: Bild
NATA čakaje napadu Rasii praź Biełaruś užo ŭ pačatku 2025 — Bild