Цела кіраўніка ХАМАС Сінвара могуць абмяняць на закладнікаў
Цела кіраўніка групоўкі ХАМАС Ях'я Сінвара могуць абмяняць на ізраільскіх закладнікаў, якія ўтрымліваюцца ў Газе. Аб гэтым паведамляе CNN са спасылкай на крыніцы ў Ізраілі.
20.10.2024 / 12:59
Ях'я Сінвар быў абраны кіраўніком палітбюро ХАМАС у жніўні 2024 года. Фота: AP Photo / Adel Hana, File
Суразмоўцы выдання сцвярджаюць, што вяртанне закладнікаў можа стаць адзіным спосабам для ХАМАС вярнуць цела лідара палесцінскай групоўкі.
Ізраіль аб'явіў аб забойстве Сінвара 17 кастрычніка. На наступны дзень гібель Сінвара пацвердзілі ў ХАМАС.
Сінвар лічыцца арганізатарам нападзення ХАМАС на Ізраіль 7 кастрычніка мінулага года. Ахвярамі тады сталі больш за тысячу чалавек. Больш за 250 чалавек былі захоплены і вывезены ў сектар Газа. Частку з іх абмянялі. На пачатак верасня ў руках ХАМАС заставаліся менш за сотню закладнікаў. Каля 40 з іх Ізраіль лічыць загінулымі.
Ізраіль лічыць, што забойства Сінвара адкрыла «значнае акно магчымасцяў» для вяртання закладнікаў.
У сваім выступе ізраільскі прэм'ер Біньямін Нетаньяху заклікаў членаў ХАМАС, якія ўтрымліваюць ізраільскіх закладнікаў, скласці зброю і вярнуць палонных, паабяцаўшы, што таму, хто гэта зробіць, будзе дазволена «выйсці і жыць».