Rasijskija chakiery hadami sačyli za Hruzijaj — Bloomberg
Siarod najbolš paciarpiełych ad rasijskich chakierskich atak — Ministerstva zamiežnych spraŭ, Ministerstva finansaŭ, Centralny bank, a taksama klučavyja pastaŭščyki enierhii i telekamunikacyj.
21.10.2024 / 13:20
Kartlis Deda abo Maci Hruzii, pomnik-statuja ŭ stalicy Hruzii Tbilisi. Fota: Supachai Panyaviwat / Getty Images
Dakumienty i techničnyja spravazdačy, ź jakimi aznajomiŭsia Bloomberg, raskryvajuć šyroki maštab rasijskich chakierskich atak na Hruziju, jakija achapili klučavyja ŭradavyja struktury i važnyja infrastrukturnyja abjekty krainy. Apieracyi pravodzilisia Hałoŭnym upraŭleńniem Hienieralnaha štaba Uzbrojenych sił Rasii (HRU) i Fiederalnaj słužbaj biaśpieki Rasii (FSB) u pieryjad z 2017 pa 2020 hod.
Jak piša ahienctva, siarod najbolš paciarpiełych viedamstvaŭ — Ministerstva zamiežnych spraŭ, Ministerstva finansaŭ, Centralny bank, a taksama klučavyja pastaŭščyki enierhii i telekamunikacyj.
Maštab i surjoznaść atak, apisanych u dakumientach, akazalisia značna bolšymi, čym mierkavałasia raniej. Niekatoryja chakiery dziejničali naŭprost z maskoŭskich ofisaŭ, dzie ŭ režymie realnaha času adsočvali celi.
Adpaviedna dakumientam, HRU ŭzłamała Centralnuju vybarčuju kamisiju Hruzii, imavierna, atrymaŭšy dostup da ŭlikovych zapisaŭ elektronnaj pošty. Siarod paciarpiełych taksama niekalki miedyjaarhanizacyj, u tym liku papularnyja telekanały Imedi i Maestro. Akramia taho, HRU bolš za dva hady mieła dostup da IT-sistem nacyjanalnaj čyhunačnaj kampanii Hruzii.
Chakierskaja hrupa Turla, źviazanaja z padraździaleńniem Centr 16 FSB, na praciahu niekalkich miesiacaŭ pravodzili tajemnuju apieracyju ŭ Ministerstvie zamiežnych spraŭ Hruzii. Pavodle zapisaŭ u sietkavych žurnałach, z krasavika 2020 hoda pa studzień 2021 hoda chakiery zasiarodzilisia na kradziažy danych siami hruzinskich čynoŭnikaŭ, u tym liku ciapierašniaha namieśnika ministra zamiežnych spraŭ i pasłoŭ u ZŠA i ES.
Jany taksama nieadnarazova atakavali kampjutary, źviazanyja z hruzinskimi konsulstvami abo pasolstvami, u tym liku raźmieščanymi na Kipry, u krainach Bałtyi, Rasii, Paŭdniovaj Karei, Azierbajdžanie i Kanadzie. Členy Turla ažyćciaŭlali sačeńnie stroha ŭ pracoŭny čas z paniadziełka pa piatnicu.
Adpaviedna dakumientam, tolki na praciahu adnaho miesiaca ź listapada pa śniežań 2020 hoda Turla ŭzłamała sietku MZS i ździejśniła 114 kradziažoŭ danych ahulnym abjomam kala 2,1 hihabajta.
Da kanca 2019 hoda i ŭ pačatku nastupnaha rasijskija chakiery atrymali dostup da elektronnaj pošty supracoŭnikaŭ kampanii Telasi, jakaja zajmajecca raźmierkavańniem elektraenierhii ŭ Tbilisi. Jany nie tolki čytali ich listy, ale i nazirali za imi praz unutranyja kamiery, ustalavanyja na pracoŭnych miescach. Adpaviedna dakumientam, HRU vykarystała dla hetych met škodnasnaje prahramnaje zabieśpiačeńnie GreyEnergy.
Druhaja hrupa chakieraŭ zmahła atrymać dostup da sistem inšaj dziaržaŭnaj enierhietyčnaj kampanii, što dało im mahčymaść adklučać elektryčnaść u niekatorych rehijonach Hruzii.
Chakiery z HRU taksama atrymali dostup da sietki Batumskaha naftavaha terminała. Akramia hetaha, pa słovach jeŭrapiejskich čynoŭnikaŭ, jak minimum dva inšyja nienazvanyja naftapierapracoŭčyja zavody, a taksama niekalki kampanij i dziaržaŭnych ustanoŭ taksama stali abjektami napadaŭ HRU. Dla ŭzłomaŭ chakiery časam vykarystoŭvali škodnasnaje prahramnaje zabieśpiačeńnie X-Agent, jakoje raniej užo źviazvałasia z rasijskaj raźviedkaj.
Adnoj z najbolej składanych i niebiaśpiečnych apieracyj stała ataka na hruzinskaha telekamunikacyjnaha apieratara Skytel. Chakiery atrymali dostup da administracyjnych sistem kampanii i sietkavych maršrutyzataraŭ, što dało im mahčymaść patencyjna adklučyć telekamunikacyjnyja pasłuhi nie tolki Skytel, ale i jaho subpravajdaraŭ.
Jak piša vydańnie, hruzinskija ŭłady byli prainfarmavanyja zachodnimi kalehami ab niekatorych rasijskich chakierskich atakach. Adnak, pa słovach jeŭrapiejskich čynoŭnikaŭ, niezrazumieła, ci pradpryniali jany jakija-niebudź dziejańni.
Jeŭrapiejskija ŭradavyja krynicy zajaŭlajuć, što Rasija praciahvaje aktyŭnyja kibierapieracyi i ich maštab nie pamianšajecca. Heta stavić pad pahrozu biaśpieku Hruzii na fonie budučych parłamienckich vybaraŭ.
Pradstaŭniki dziaržaŭnych orhanaŭ i kampanij Hruzii, jakija zhadanyja ŭ materyjale Bloomberg, admovilisia ad prośbaŭ prakamientavać situacyju. HRU i FSB nie adkazali na zvaroty.
«Biełaruś i Hruzija ŭžo stracili niezaležnaść» — Valeryj Załužny
Kiraŭniki raźviedki krain Zachadu ŭstryvožanyja «dzikimi pavodzinami» rasijskich śpiecsłužbaŭ