«Viedajem my vašy internety». Aktyvist pastaviŭ na polska-biełaruskaj miažy płakat ź infarmacyjaj ab represijach u Biełarusi
Biełaruski aktyvist Siarhiej Stalmakoŭ pravioŭ adzinočny pikiet na polska-biełaruskaj miažy. Z polskaha boku, prykładna za 30 mietraŭ ad šłahbauma, 19 kastryčnika jon ustanaviŭ płakat ź infarmacyjaj ab palityčnych spravach u Biełarusi. Takuju akcyju jon patłumačyŭ žadańniem painfarmavać biełarusaŭ ab tym, što adbyvajecca ŭ krainie, piša Most.
21.10.2024 / 14:09
Siarhiej Stalmakoŭ. Fota: archiŭ hieroja
«Papiaredžańnie. Vy zajazdžajecie ŭ Respubliku Biełaruś, dzie za 3 letnija miesiacy hetaha hoda trapili pad palityčnyja represii 468 čałaviek», — napisana na płakacie na ruskaj i anhlijskaj movach.
Pa polskim zakanadaŭstvie ŭzhadnieńnie adzinočnych pikietaŭ adbyvajecca pa paviedamlalnym pryncypie. Siarhiej raskazvaje, što zahadzia nakiravaŭ zajavu z ukazańniem daty i miesca pikietu ŭ miascovuju administracyju — užond.
Aktyvist kaža, što adnoj ź jahonych met było zrazumieć, ci vałodajuć biełarusy dakładnaj infarmacyjaj pra maštaby palityčnaha pieraśledu. Akazałasia, dla mnohich heta infarmacyja ŭ navinku.
— Brestaŭčanka intelihientnaha vyhladu pahladzieła na płakat, padyšła i kaža: «Heta voś stolki ludziej z 2020 hoda?» Ja kažu: «Vy ŭvažliva pačytajcie. Heta tolki za try letnija miesiacy». U jaje, viadoma, vočy… — raskazvaje Siarhiej.
Pavodle jaho słoŭ, mnohija biełarusy, jakija ŭ toj dzień viartalisia dadomu z Polščy, źviartali ŭvahu na płakat, abmiarkoŭvali jaho pamiž saboj, pryhadvali stalinskija represii. Niekatoryja fatahrafavali.
— Ja im kazaŭ: «Hladzicie, bolš aściarožna z hetymi zdymkami. Pry praviercy [telefona] za heta vam u Biełarusi mohuć prylacieć niepryjemnaści, — raspaviadaje jon.
«Viedajem my vašyja internety»
Adnak byli i turysty, jakija stavilisia da pikietu niehatyŭna. Siarhiej nazyvaje ich ludźmi «z elektaratu «Baćka — naš hieroj, baćka, my z taboj». Jany nie vieryli ŭ abjektyŭnaść hetaj infarmacyi i sprabavali jaje asprečvać:
— Adna žančyna na Audi havaryła pravakacyjna: «A vy što, asabista paličyli ŭsich ludziej? Adkul u vas danyja? Viedajem my vašyja internety», — uzhadvaje aktyvist. — [Takija ludzi ŭpeŭnienyja, što] kłasna žyviecca ŭ Biełarusi. Ale čamuści pa televizar, pralnuju mašynu i pyłasos jeduć u Polšču. Nie ŭźnikaje supiarečnaści.
Prablem z palicyjaj z-za akcyi nie było. Palicyjanty padychodzili da Siarhieja, pytalisia, ci ŭzhodnieny pikiet i kolki jon praciahniecca. I navat cikavilisia, ci nie kryŭdziać jaho. U vypadku kanfliktaŭ raili źviartacca da ich. Adnak hetaha nie spatrebiłasia.
Siarhiej ličyć, što takoha rodu likbiez turystam patrebny.
— Absalutna ŭpeŭnieny, što lubyja akcyi pa biesstarońnim infarmavańni nieabchodnyja. Tamu što infarmacyi ŭnutry krainy ŭ ich niama, — tłumačyć Siarhiej. Pavodle jaho padlikaŭ, za čas akcyi jamu ŭdałosia pryciahnuć uvahu niekalkich socień čałaviek da temy represij.