Змены ў транспартным падатку — з'явіцца больш ільготнікаў, а заможным наадварот давядзецца раскашэліцца
Анансаваныя змены ў падатковым заканадаўстве закрануць многіх аўтамабілістаў.
21.10.2024 / 18:05
Ілюстрацыйны здымак. Фота: «Наша Ніва»
Што хочуць змяніць?
Праект зменаў у Падатковы кодэкс апублікаваны на Нацыянальным прававым партале.
Адно з галоўных новаўвядзенняў па транспартным падатку — пашырэнне спісу льготнікаў. У яго плануюць дадаць ваеннаслужачых тэрміновай службы і тых, хто праходзіць альтэрнатыўную службу.
Цяпер права на зніжку ў 50% маюць:
- інваліды 1 і 2 групы;
- ветэраны ВАВ;
- шматдзетныя бацькі;
- ветэраны баявых дзеянняў на тэрыторыі іншых дзяржаў;
- пенсіянеры.
Права на зніжку ў 25% маюць інваліды 3 групы.
За дарагія аўто давядзецца плаціць больш
Таксама плануюць адмяніць 3-гадовы ўзроставы цэнз для аўто падвышанай камфортнасці, за якія трэба плаціць падатак у 10-кратным памеры.
Узрост аўто, у дачыненні да якіх будуць прымяняць павялічаныя стаўкі (х10), будзе прыведзены ў пераліку, які вызначае ўрад.
То-бок згодна з прапанаванымі зменамі, з уласнікаў пэўных марак і мадэлей аўто змогуць працягваць спаганяць 10-кратны падатак нават пасля таго, як аўто дасягне трохгадовага ўзросту.
Ранейшая рэдакцыя закона такую магчымасць не прадугледжвала, і, напрыклад, за 4-гадовыя Ferrari ці Lamborghini уласнікі плацілі падатак, як і за любое іншае аўто.
Стаўкі вырастуць
Апроч гэтага, з 1 студзеня 2025 года мусяць падрасці самі стаўкі транспартнага падатку.
Для фізічных асоб на легкавыя аўтамабілі масай:
- да 1,5 т — з 66 рублёў да 70 рублёў;
- больш за 1,5 т, але не больш за 1,75 т — з 87 да 92 рублёў;
- больш за 1,75 т, але не больш за 2 т — са 110 да 116 рублёў,
- больш за 2 т, але не больш за 2,25 т — са 131 да 138 рублёў;
- больш за 2,25 т, але не больш за 2,5 т — са 153 да 161 рубля;
- больш за 2,5 т, але не больш за 3 т — са 174 да 183 рублёў;
- больш за 3 т — з 240 да 253 рублёў.
Колькі каштуе перайсці на зімовыя пакрышкі ў Беларусі і ў суседзяў?
Як зняць аўтамабіль з уліку ў Беларусі, нават калі яго даўно ў вас няма ці машына ўжо зарэгістравана ў іншай краіне
Махляры, якія прадаюць танныя шыны праз Instagram, рыхтуюцца да новага сезона. Як не трапіць на падман