Maskva abiacaje dapamohu Minsku na vybarach 2025 hoda «ŭ vypadku destabilizacyi»
Rasija akaža Minsku dapamohu ŭ vypadku sprob destabilizacyi situacyi padčas prezidenckich vybaraŭ u 2025 hodzie, kali Biełaruś pra heta paprosić, zajaviŭ u intervju RIA Novosti pasoł RF u Minsku Barys Hryzłoŭ. Taksama jon padtrymaŭ masavyja represii ŭ krainie paśla 2020 hoda.
22.10.2024 / 08:14
Cyrymonija ŭznaharodžańnia Alaksandra Łukašenki ordenam Andreja Pieršazvanaha ŭ Kramli. Padčas jaje Łukašenku daviałosia nizka schilicca pierad kiraŭnikom Rasii. Fota: Sergei Ilnitsky Pool Photo via AP
«Niama nijakich padstaŭ mierkavać, što biełaruskim pravaachoŭnikam i śpiecsłužbam spatrebicca dadatkovaja dapamoha, jak pryniata havaryć, «na ziamli». Jany vydatna spraŭlajucca sa svaimi zadačami. Ale kali spatrebicca — Rasija ŭ ramkach svaich abaviazacielstvaŭ, biezumoŭna, akaža dapamohu i padtrymku, pra jakuju nas paprosić naš bližejšy sajuźnik i stratehičny partnior», — skazaŭ Hryzłoŭ.
Jon zaznačyŭ, što «profilnyja viedamstvy Rasii i Biełarusi viaduć pastajanny abmien infarmacyjaj pa apieratyŭnych kanałach». «My ŭ režymie realnaha času dzielimsia źviestkami ab lubych patencyjnych pahrozach», — padkreśliŭ jon.
Pry hetym Hryzłoŭ, jaki raskazaŭ pra hatoŭnaść Rasii ŭmiašacca ŭ biełaruskija vybary, zajaviŭ pra «niezdarovuju cikavaść», jakuju krainy Zachadu prajaŭlajuć da ŭnutrypalityčnych i, u pryvatnaści, elektaralnych pracesaŭ u Rasii i Biełarusi.
«Było b dziŭna, kali b našy ahulnyja sapierniki nie płanavali niejkich pravakacyjnych dziejańniaŭ (u pieryjad prezidenckich vybaraŭ u Biełarusi ŭ 2025 hodzie — red.), — ličyć Hryzłoŭ. Viadoma, my zychodzim z taho, što takija sproby buduć pradprymacca».
Hryzłoŭ zajaviŭ, što «paśla sproby tak zvanaj apazicyi zachapić uładu ŭ 2020 hodzie pravaachoŭnyja orhany i śpiecsłužby Respubliki Biełaruś praviali kałasalnuju rabotu, jakaja nakiravana na spynieńnie takoha rodu złačynnych dziejańniaŭ u budučym».
«Vinavatyja — tyja, chto nie paśpieli haniebna biehčy ŭ Polšču i Prybałtyku — byli chutka identyfikavany i panieśli zasłužanaje pakarańnie. Pry hetym vyjavilisia litaralna ŭsie ich płany, schiemy finansavańnia, struktura kiravańnia, sietka ahientaŭ upłyvu, sposaby i kanały suviazi, mietadyčki i instrukcyi pa arhanizacyi niezakonnych pratestaŭ, dyviersij z vykarystańniem uzryŭčatki i zbroi, a taksama siłavych akcyj», — skazaŭ jon.
Jon dadaŭ, što heta «nie značyć, što zachodniki nie pasprabujuć zładzić čarhovuju pravakacyju». «Takija namiery spynialisia biełaruskimi śpiecsłužbami i paśla 2020 hoda», — nahadaŭ pasoł.
Masavyja palityčnyja represii ŭ Biełarusi praciahvajucca z 2020 hoda, kali vybary supravadžalisia nierehistracyjaj i aryštami praciŭnikaŭ Łukašenki i naziralnikaŭ na vybarčych učastkach. Niahledziačy na heta, Alaksandr Łukašenka, miarkujučy sa źviestak z učastkaŭ, dzie vybarčyja kamisii dazvolili naziralnikam sačyć za padlikam hałasoŭ, prajhravaŭ Śviatłanie Cichanoŭskaj, ale nie addaŭ ułady.
Režym pieraśleduje ŭsich, chto publična vystupaŭ suprać ich kiravańnia i suprać rasijskaha kantrolu nad Biełaruśsiu. Z 2022 hoda, paśla napadu Rasii na Ukrainu, biełarusaŭ pačali pieraśledavać taksama za antyvajennyja vykazvańni abo simpatyi da Ukrainy.
Zhodna ź infarmacyjaj pradstaŭnika Abjadnanaha pierachodnaha kabinieta Paŭła Łatuški, z 2020 hoda represii zakranuli 136 tysiač čałaviek.