Pravasłaŭny prychod u Słonimie pakarajuć za niezakonna pieramalavany chram XVII stahodździa
Novy jarka-zialony koler Śviata-Troickaj carkvy, u jaki jaje pamalavali ŭ žniŭni hetaha hoda, nie spadabaŭsia navat čynoŭnikam. Z załatymi cybulinami, vidać, taksama daviadziecca raźvitacca.
22.10.2024 / 17:49
Troickaja carkva ŭ Słonimie pafarbavanaja ŭ jarka-zialony koler. Fota: telehram-kanał «Spadčyna»
Adkaz Słonimskaha rajvykankama nakont zakonnaści rabot na pomniku architektury apublikavaŭ telehram-kanał «Spadčyna».
Čynoŭniki paviedamlajuć, što suprać prychoda chrama Śviatoj Žyvanačalnaj Trojcy ŭ Słonimie raspačaty razhlad administracyj spravy za parušeńnie zakanadaŭstva ŭ śfiery achovy historyka-kulturnych kaštoŭnaściej.
Pieramaloŭka Troickaj carkvy ŭ jarka-zialony koler u žniŭni 2024 hoda. Fota: telehram-kanał «Spadčyna»
Nahadajem, što ŭletku Śviata-Troickaja carkva, pabudavanaja jak kaścioł pry klaštary biernardzincaŭ u siaredzinie XVII stahodździa, niečakana była pieramalavanaja ŭ jarka-zialony koler, jakoha, jak adznačajuć śpiecyjalisty, histaryčna nie mahło być na pomniku reniesansu praz adsutnaść ustojlivych pihmientaŭ.
Historyja niezakonnych pierabudoŭ hetaj historyka-kulturnaj kaštoŭnaści ciahniecca ŭžo amal dziesiacihodździe. U 2015 hodzie śviatar samavolna źniaŭ kupały, pastaŭlenyja za niekalki hadoŭ tamu pa prajekcie restaŭrataraŭ, i zamianiŭ ich na vielizarnyja cybuliny z załacistaha nitrydu tytanu. Tady prychod užo byŭ pryciahnuty da adkaznaści za parušeńni zakonu.
Zamiena kupała carkvy na vielizarnuju cybulinu. 2015 hod. Fota: Gs.by
Ale cybuliny dahetul zastajucca na chramie, skažajučy jaho aŭtentyčny vyhlad. Jak adznačajecca ŭ adkazie rajvykankama, jašče ŭ 2020 hodzie navukovym kiraŭnikom na abjekcie była vyznačana Natalla Hołasava z prajektnaha filijała «Biełrestaŭracyi», jakaja musiła pravieści navukova-daśledčyja raboty i ŭzhadnić zamienu kupałoŭ ź Ministerstvam kultury. Ale rabota była prypyniena z-za adsutnaści ŭ prychodzie finansavych srodkaŭ.
Paśla vyjaŭlenaha ciapier čarhovaha parušeńnia na pomniku architektury raboty pa raspracoŭcy i ŭzhadnieńni navukova abhruntavanych kupałoŭ buduć praciahnuty, zapeŭnivajuć čynoŭniki. Jość šaniec, što ŭ chutkim časie reniesansny chram pierastanie być adnym z najhoršych prykładaŭ carkoŭnaj antyrestaŭracyi ŭ krainie.
U Słonimie reniesansny chram XVII stahodździa pafarbavali ŭ jarka-zialony koler
U Žyrovickim manastyry razabrali ikanastas, ź jakoha raniej vykinuli biełaruskija abrazy
Vakoł carkvy-krepaści ŭ Muravancy śpiłavali ŭsie staryja drevy — sumnyja FOTY