Турцыя заблакавала пастаўкі амерыканскай электронікі расійскаму ВПК
Турцыя без афіцыйнага абвяшчэння забараніла сваім экспарцёрам перапраўляць у Расію амерыканскую прадукцыю вайсковага прызначэння. Гэта адбылося пасля таго, як Вашынгтон прыгразіў Анкары, якая не далучылася да заходніх санкцый і імкнецца захоўваць нейтралітэт у расійска-ўкраінскім канфлікце, «наступствамі» за падтрымку расійскага ВПК, піша The Moscow Times.
22.10.2024 / 20:23
Прэзідэнт Турцыі Рэджэп Таіп Эрдаган. Фота: Mikhail Klimentyev, Sputnik, Kremlin Pool Photo via AP
У апошнія тыдні турэцкія ўлады ўнеслі змены ў нацыянальную электронную мытную сістэму, расказалі Financial Times тры чалавекі, якія маюць пра гэта непасрэдную інфармацыю. Цяпер экспарцёрам будзе забаронена пастаўляць у Расію амерыканскую прадукцыю, уключаную ў спіс з 50 «высокапрыарытэтных» тавараў, якія ЗША, ЕС, Вялікабрытанія і Японія вызначылі як крытычна важныя для расійскай вайсковай прамысловасці.
У іх ліку перадавая электроніка, уключаючы працэсары і карты памяці, якія выкарыстоўваюцца ў ракетах і дронах, сістэмы дыстанцыйнага кіравання, станкі і іншае абсталяванне, якое ўжываецца пры вытворчасці ўзбраенняў.
Пастаўка аналагічных тавараў з ЕС была заблакаваная раней, расказалі дзве крыніцы FT. Са слоў адной з крыніц, публічна пра ўведзеныя абмежаванні не паведамляецца, бо гэта «палітычна адчувальнае» пытанне.
Адміністрацыя Джо Байдэна прыклала значныя намаганні, каб спыніць пастаўкі ў Расію праз Турцыю прадукцыі, якая выкарыстоўваецца для выпуску ўзбраенняў. У жніўні з турэцкімі чыноўнікамі і топ-менеджарамі ў Анкары і Стамбуле сустракаўся памочнік міністра гандлю ЗША Мэцью Акселрод, які імкнецца не дапусціць трапляння перадавых амерыканскіх тэхналогій праціўнікам ЗША.
Акселрод папярэдзіў прадстаўнікоў Турцыі пра непрыемныя «наступствы», калі яна не заблакуе пастаўку такой прадукцыі ў Расію.
«Мы лічым, што турэцкі ўрад пачуў нашы асцярогі і разумее іх, — паведаміў Акселрод у адказ на запыт FT. — Мы не без падстаў лічым, што супрацоўніцтва будзе ўмацоўвацца».
Пастаўкі заходняй прадукцыі ў Расію праз Турцыю ўжо моцна скараціліся пасля таго, як ЗША ў снежні 2023 года абвясцілі пра магчымасць увядзення другасных санкцый супраць банкаў іншых краін, якія абслугоўваюць здзелкі з падсанкцыйнымі таварамі. У выніку турэцкія банкі сталі адмаўляцца ад правядзення падобных транзакцый.
Да пачатку вайны ва Украіне месячны экспарт высокапрыярытэтных тавараў з Турцыі ў Расію складаў толькі каля $3 млн у месяц, але да снежня 2022 года ён узляцеў да $37,6 млн, згодна з турэцкай статыстыкай. Незадоўга да абвяшчэння пра другасныя санкцыі ЗША ён быў $26,5 млн, а ў ліпені 2024 года — ужо толькі $4,5 млн.
Галоўным перавалачным пунктам па-ранейшаму застаецца Кітай (уключаючы Ганконг). Яны ў мінулым ліпені прадалі Расіі прадукцыі вайсковага прызначэння на $377,7 млн, паводле даных Trade Data Monitor, прычым у снежні 2023 года гэты паказчык перавышаў $680 млн.
Турцыя следам за Расіяй заблакавала Discord
Расію западозрылі ў маштабнай фальсіфікацыі эканамічнай статыстыкі