Vučyłasia na nastaŭnicu biełaruskaj movy, stroiła pałkoŭnikaŭ. Šeść faktaŭ pra Volhu Čamadanavu, jakaja idzie na vybary
Siońnia stała viadoma, što hałoŭny ideołah Minska Volha Čamadanava budzie sparynh-partniorkaj Łukašenki na čarhovych vybarach. Heta niečakanaść. Moža tak stacca, što jaje vyłučyli prosta dla taho, kab jana ŭrešcie źniałasia na jahonuju karyść. Tym nie mienš, heta ŭsio adno znak vialikaha davieru sistemy da jaje. Zhadvajem, čym adznačyłasia hetaja milicyjantka.
30.10.2024 / 22:43
Volha Čamadanava. Fota ź jaje instahrama
Mahła stać nastaŭnicaj, ale pajšła ŭ milicyju
Volha Čamadanava, u dziavoctvie Prystrom, naradziłasia ŭ Astrašyckim Haradku ŭ 1977 hodzie ŭ prostaj siamji. Dziaciej u baćkoŭ Volhi było troje (jana starejšaja), a hrošaj uvieś čas nie chapała. U adnym ź intervju žančyna raskazvała, što ŭ siamji nie było finansaŭ dla taho, kab kupić joj bajan — a jana chacieła zajmacca muzykaj. U vyniku dziciaci daviałosia zarablać na muzyčny instrumient samastojna. Volha kaža, što vykonvała pasilnuju pracu ŭ kałhasach.
U 1999 hodzie skončyła BDU pa śpiecyjalnaści «biełaruskaja mova i litaratura». Łahičny dalejšy šlach z takoj adukacyjaj — pajści pracavać nastaŭnicaj. Jana navat prajšła praktyku ŭ Licei BDU, ale zrazumieła, što vučyć dziaciej — heta nie jaje.
Ale ž Volha praz paru miesiacaŭ paśla atrymańnia dypłoma pracaŭładkavałasia ŭ milicyju. Jaje ŭziali ŭčastkovym inśpiektaram pa spravach niepaŭnaletnich u Baraŭlanski adździeł.
Dziakujučy hetamu Volha nie tolki prystroiła pracoŭnuju knižku, ale i atrymała štamp u pašparcie. Bo na pracy jana paznajomiłasia sa svaim mužam, ciapier užo pałkoŭnikam milicyi Dzianisam Čamadanavym, vysokapastaŭlenym supracoŭnikam HUBAZiKa. U šlubie naradziłasia dvoje dziaciej.
Pajšła na pavyšeńnie dziakujučy pomniku haradavomu
Atrymać pavyšeńnie Volha zmahła vypadkova. Niahledziačy na toje, što ŭ inśpiekcyi pa spravach niepaŭnaletnich jaje ličyli starannym supracoŭnikam, jaje asabliva nie prasoŭvali pa karjernaj leśvicy. 12 hadoŭ žančyna ŭznačalvała inśpiekcyju pa spravach niepaŭnaletnich Upraŭleńnia ŭnutranych spraŭ Minskaha rajvykankama.
Fota: BiełTA
Stać pres-sakratarkaj MUS Čamadanavaj dapamahła čužaja pamyłka i pomnik haradavomu. Pamiatajecie historyju z padletkam, jaki daŭ poŭchu pomniku, a potym byŭ vymušany vybačacca na kamieru? Heta ciapier takimi videa naŭrad ci ździviš kaho, a ŭ 2018 hodzie toj rolik vyklikaŭ chvalu abureńnia.
Tahačasny ministr Ihar Šunievič, choć potym i raspaviadaŭ, što ideja z vybačeńniem na kamieru naležała jamu, zvolniŭ pres-sakratara Hieorhija Jeŭčara.
Čarhi z achvotnych zaniać volnuju pasadu nie było ni siarod supracoŭnikaŭ, ni siarod ideołahaŭ. Tamu i ŭspomnili pra aktyŭnuju Čamadanavu z rajonnaj milicyi. Zrešty, da publičnaj ideałohii i miedyja jana ŭžo mieła niekatoraje dačynieńnie: u 2011-m atrymała dypłom za «najlepšy karpunkt» u konkursie MUS na najlepšy materyjał u ŚMI pa aśviatleńni dziejnaści ministerstva.
Raspaŭsiudžvała fejk pra zabojstva Tarajkoŭskaha
Paśla vybaraŭ u 2020 hodzie ŭ pieršyja dni siłavoha cisku Čamadanava navat abiacała žurnalistam pres-kanfierencyju ź ministram nakont taho, jak siabie pavodzili siłaviki padčas razhonu pratestaŭ. Ale abiacańni nie vykanała. Ni adnoj pres-kanfierencyi ź ministram unutranych spraŭ paśla žniŭnia 2020 hoda nie było.
Mienavita pry Čamadanavaj u telehram-kanałach siłavych struktur (a ich było stvorana dosyć šmat) stali źjaŭlacca videa «pryznańniaŭ» i «raskajvańniaŭ». Taksama pry joj prapahandysty pačali pravodzić amal što dopyty zatrymanych na akcyjach pratestu.
Adkazvała ŭ toj čas Volha i za telehram-kanał MUS. U dzień śmierci Alaksandra Tarajkoŭskaha tam apublikavali infarmacyju, što pratestoviec zahinuŭ, bo nibyta sprabavaŭ kinuć u śpiecnazaŭcaŭ vybuchoŭku, jakaja razarvałasia ŭ jaho rukach.
Ale chutka źjaviłasia videa momantu śmierci Tarajkoŭskaha, na jakim było bačna, što ŭ jahonaj ruce nie było nijakaj vybuchoŭki. Rodzičy paśla taksama abvierhli hetu infarmacyju ad MUS.
Kali praŭda vypłyła, staruju navinu nie vydalili.
«Maralna pakutavała» na 5 tysiač rubloŭ
U tym ža 2020 hodzie Volha padała ŭ sud za kamientaryj, jaki joj nie spadabaŭsia. Jana paličyła, što 43-hadovy mužčyna napisaŭ niešta «ŭ nieprystojnaj i hrubaj formie pra pasadu i pahony».
Svaje «maralnyja pakuty» ad čytańnia taho samaha kamientaryja Volha acaniła ažno ŭ 5 tysiač rubloŭ. Sud daŭ mužčynu dva hady chatniaj chimii i abaviazaŭ vypłacić Čamadanavaj hrošy. Pres-sakratarka zajaviła, što addała ich u dziciačy dom.
Stała hierainiaj źlivaŭ
Niekalki hadoŭ tamu ŭ siecivie źjaviŭsia aŭdyjazapis, u jakim hałasy padobnyja da tahačasnych namieśnika načalnika HUUS Minharvykankama Ihara Padvojskaha i pieršaha namieśnika načalnika UUS Minabłvykankama Vitala Kazłova, abmiarkoŭvajuć pres-sakratarku MUS Volhu Čamadanavu i jaje pavodziny. Paviedamlałasia, što razmova adbyłasia 2 lipienia 2020 hoda.
«Učora ž u ministra byŭ, ja tabie kazaŭ? (…) P**dy atrymlivaŭ. Nu tak, bł***, rolik adzin vykładzieny byŭ. Čamadanicha, u**** lasnoje, bł***, znajšła. Pajšła, usio pierakruciła, bł***», — kaža pieršy hołas, padobny na Padvojskaha.
«Bł***, jana dumaje, što ŭ jaje 9 žyćciaŭ, jak u kata, bł***, nach***», — adkazvaje druhi, padobny da hołasa Vitala Kazłova.
U chutkim časie paśla taho źlivu Čamadanava pakinuła pasadu pres-sakratarki MUS. Jaje pieraviali na cyvilnuju rabotu — načalnicaj upraŭleńnia pa ideałohii i spravach moładzi Minskaha harvykankama.
Žurnalisty dziaržaŭnych ŚMI kažuć pra tatalny kantrol z boku Čamadanavaj. Taja lubiła ŭmiešvacca ŭ ich pracu i kazać, ab čym i jak treba pisać. «Kažučy pa-prostamu, vynosiła mozh usim», — dzielacca suraŭmoŭcy.
Volha Čamadanava z dačkoj Lizavietaj
Dačka — aktyvistka BRSM i ŭdzielnica prapahandysckich šou
Dačka Čamadanavaj Lizavieta vučycca na jurfaku. Spačatku jaje abrali pieršym sakratarom BSRM jurydyčnaha fakulteta BDU, a ŭ chutkim časie dziaŭčyna stała druhoj sakratarkaj Pieršamajskaha rajonnaha kamiteta BRSM.
Zdajecca, maci moža hanarycca dačkoj: Liza aktyŭna ŭdzielničaje va ŭsich mierapryjemstvach pad čyrvona-zialonym ściaham, a taksama vinšuje padpisčykaŭ svajho instahrama z usimi dziaržaŭnymi śviatami.
Dziaŭčyna lubić pastralać i časam praktykujecca ŭ hetym razam z maci. Jašče adno ich supolnaje «chobi» — udzieł u prapahandysckich šou. Naprykład, Volha i Lizavieta razam chadzili na tok-šou «DaNo», jakoje viadzie Ryhor Azaronak, kab pahutaryć pra kanflikt pakaleńniaŭ.
Dziaŭčyna zapeŭniła, što i ŭ ich siamji jość kanflikt pakaleńniaŭ. «Jość mierkavańni, pa jakich my razychodzimsia», — skazała Lizavieta. Na heta jaje maci adreahavała: «Tak, my taksama spračajemsia. Ale jość toje, što dla nas nie padlahaje abmierkavańniu». Ale ŭdakładniać nie stała.
Lizie taksama padabajecca tvorčaść Maksa Karža, jakomu niadaŭna pahražaŭ HUBAZiK.
Darečy, pierad tym, jak stała viadoma, što Čamadanava budzie sparynh-partnioram Łukašenki na vybarach u 2025 hodzie, Lizavieta zakryła svoj ideałahična vyvierany instahram.
Sama ž Čamadanava lubić kazać: «Siamja — heta taksama ideałohija».
Volha Čamadanava taksama budzie sparynh-partnioram na vybarach