Alaksiej Protas pryznany pieršaj zorkaj matča «Vašynhtona»
U ramkach rehularnaha čempijanatu Nacyjanalnaj chakiejnaj lihi (NCHŁ) «Vašynhton Kepitałz» doma pierajhraŭ «Manreal Kanadyjens» — 6:3.
01.11.2024 / 09:13
Alaksiej Protas i Trevar Van Rymsdajk (nhl.com)
U składzie staličnaj kamandy biełaruski forvard Alaksiej Protas hulaŭ na levym fłanhu pieršaha źviana. Jaho partniorami stali Alaksandr Aviečkin i Dyłan Stroum, piša «Biełaruski chakiej».
U druhim pieryjadzie była admieniena šajba Protasa ŭ mienšaści. Biełarus zalez u afsajd padčas kontrataki, adnak pryhoža razabraŭsia z bramnikam supiernika Kiejdenam Pryma.
Na 45-j chvilinie Protas zakinuŭ hoł. Paśla pieradačy Alaksieja šajba trapiła ŭ klušku supiernika i zaskočyła ŭ bramu.
Na 53-j chvilinie Protas asistavaŭ Aviečkinu na jaho 858 šajbu ŭ rehularkach NCHŁ. Da rekordu Uejna Hrecki rasijaninu zastałosia 36 šajbaŭ.
U vyniku Protas pravioŭ na lodzie 14:47, nabraŭ 2 (1+1) bały, nanios 2 kidki (1 ź ich mima), zrabiŭ 1 siłavy pryjom, atrymaŭ 2 chviliny štrafu, dapuściŭ 1 stratu i zarabiŭ pakazčyk karysnaści «+2».
Jon staŭ pieršaj zorkaj matča.
U siezonie ŭ Protasa 9 hulniaŭ, 9 (3+6) bałaŭ, pakazčyk karysnaści «+6».
«Vašynhton» atrymaŭ piatuju pieramohu zapar na svajoj arenie. Kamanda z 14 bałami ŭ 9 hulniach zajmaje 4-je miesca ŭ tablicy Uschodniaj kanfierencyi.