Vyjšaŭ biełaruski pierakład hulni Mass Effect 2
Entuzijast zrabiŭ nieaficyjny pierakład znakamitaj kaśmičnaj opiery na łacinku, ale na toje byli pryčyny.
09.11.2024 / 23:09
Kapitan Šepard, hałoŭny pratahanist sieryi, ciapier havoryć pa-biełarusku. Fota: Biełaruski hiejmier
Biełaruskamoŭny hiejmier pad nikam Źmitrok S. na praciahu vaśmi miesiacaŭ aktyŭna pracavaŭ nad pierakładam lehiendarnaj hulni Mass Effect 2, uklučajučy ŭsie dadatkovyja DLC. Pra heta paviedamlaje kanał «Biełaruski hiejmier».
Apošniaj zadačaj, jakaja stajała pierad hiejmieram, byŭ pierakład kodeksa — vialikaj unutryhulniavoj encykłapiedyi pra Mlečny Šlach budučyni, ci dakładniej Darohi Ptušynaj, jak ciapier jon nazyvajecca ŭ pierakładzie, adsyłajučy da tradycyjnaj biełaruskaj nazvy našaj hałaktyki.
Daroha Ptušynaja — karta hałaktyki ŭ Mass Effect 2. Fota: Biełaruski hiejmier
Mass Effect 2 — heta navukova-fantastyčnaja rolevaja hulnia, vypuščanaja studyjaj BioWare ŭ 2010 hodzie, jakaja stała adnoj z klučavych hulniaŭ svajho času. Hulnia źjaŭlajecca druhoj častkaj tryłohii Mass Effect i praciahvaje historyju kapitana Šeparda, jaki pavinien abaranić hałaktyku ad tajamničaj pahrozy — inšapłanietnaj rasy Žniacoŭ.
Hałoŭnaje mieniu hulni. Fota: Biełaruski hiejmier
Mass Effect 2 vyłučajecca hłybokim siužetam, składanym vybaram i šmatuzroŭnievymi adnosinami pamiž piersanažami, što nadaje hulcu vialikuju svabodu ŭ farmiravańni siužetu. Značeńnie Mass Effect 2 ŭ śviecie hulniaŭ ciažka pieraacanić.
Asablivaść biełaruskaha pierakładu zaklučajecca ŭ tym, što jon zrobleny łacinkaj. Heta źviazana z techničnymi abmiežavańniami Mass Effect 2, jakija nie dazvalajuć karektna pracavać ź biełaruskim kiryličnym ałfavitam. Adnak Źmitrok S. płanuje adaptavać subcitry i na kirylicu, asabliva kali hetaja mahčymaść budzie zapatrabavanaja bolšaściu hulcoŭ.
Pierakład pryznačany dla ŭstanoŭki na ruskuju viersiju hulni. Instrukcyju pa instalacyi možna znajści na Steam.
Płan pałuby karabla Šeparda. Fota: Biełaruski hiejmier