U Minsk pryvieźli vakcynu ad niebiaśpiečnaj dla dziaciej infiekcyi. Adna doza kaštuje 2400 rubloŭ
Minski abłasny centr imunaprafiłaktyki abviaściŭ, što dla ŭsich achvotnych ciapier dastupnaja vakcyna, jakaja abaraniaje ad adnoj z raspaŭsiudžanych virusnych infiekcyj — RSV. Pa košcie preparat, zdajecca, moža stać rekardsmienam siarod pryščepak, dastupnych siońnia ŭ Biełarusi, piša Onliner.by.
12.11.2024 / 14:54
Preparat pryznačany dla siezonnaj imunaprafiłaktyki reśpiratorna-sincycijalnaj virusnaj infiekcyi ŭ dziaciej, paviedamili ŭ centry imunaprafiłaktyki.
Mierkavany košt adnoj dozy — 2400 rubloŭ. U adkaz na ŭdakładniajučyja kamientary ŭ centry adznačyli, što košt adnoj vakcyny sapraŭdy kala $700 u ekvivalencie. Uvohule, treba pamnažać hetuju sumu na piać, bo ŭ siezon uzdymu zachvorvańniaŭ RSV (reśpiratorna-sincycijalny virus) zvyčajna patrabujecca da 5 doz ź intervałam adzin miesiac.
Žurnalisty źviazalisia z doktaram-piedyjatram, infiekcyjanistam Aksanaj Doŭnar-Zapolskaj, i paprasili rastłumačyć, čym niebiaśpiečny reśpiratorna-sincycijalny virus (RSV) i ci apraŭdany taki košt vakcynacyi.
Miedyk paćvierdziła, što heta raspaŭsiudžany virus, jaki vyklikaje siezonnyja ŭspyški zachvorvańniaŭ pa ŭsim śviecie. U nas jon najbolš aktyŭny z kastryčnika-listapada pa krasavik-maj, ź pikam u studzieni ci lutym. Pieradajecca pavietrana-kapielnym i kantaktnym šlacham.
Navukovyja daśledavańni dakazali, što zaražeńnie małych dziaciej čaściej za ŭsio adbyvajecca ad starejšych bratoŭ i siaścior. Śpiecyfičnaha supraćvirusnaha lačeńnia niama.
— RSV — najbolš častaja pryčyna infiekcyj nižnich dychalnych šlachoŭ (naprykład, branchijalitu, kali ŭražvajucca samyja małyja bronchi) u dziaciej va ŭzroście da adnaho hoda, — tłumačyć Aksana Doŭnar-Zapolskaja. — Bolš taho, pa acenkach SAAZ, heta jašče i samaja častaja infiekcyjnaja pryčyna śmierciaŭ siarod maleńkich dziaciej (da 2% śmierciaŭ niemaŭlat — va ŭzroście da 28 dzion, da 7% śmierciaŭ — va ŭzroście ad 28 dzion da 1 hoda žyćcia i da 2% śmierciaŭ dziaciej — va ŭzroście ad 1 da 4 hadoŭ).
Ale panikavać absalutna ŭsim maładym baćkam nie treba, padkreślivaje miedyk. Ciažka RSV moža praciakać u dziaciej, jakija znachodziacca ŭ hrupie ryzyki:
- dzieci da 6 miesiacaŭ, asabliva tyja, chto naradziŭsia ŭ pieršaj pałovie siezonu RSV (kastryčnik—listapad), pry hetym u ich jość starejšyja braty i siostry, jakija naviedvajuć sad/škołu;
- małyja i dzieci z spadarožnymi chraničnymi zachvorvańniami lohkich, naprykład, bronchalehaničnaja dyspłazija, mukaviscydoz;
- niedanošanyja dzieci, narodžanyja da 35 tydniaŭ ciažarnaści;
- dzieci z prablemami serca;
- VIČ-infikavanyja dzieci;
- dzieci ź sindromam Daŭna;
- dzieci ź pieršasnymi i druhasnymi imunadeficytami;
- dzieci sa złajakasnymi zachvorvańniami;
- dzieci ź piersistujučaj branchijalnaj astmaj.
— Majo mierkavańnie jak śpiecyjalista i jak budučaj babuli: viadoma, praviadzieńnie takoj vakcynacyi metazhodna, kali havorka idzie pra dziaciej z hrupy ryzyki. Infiekcyja raspaŭsiudžanaja. I ŭ minułym hodzie, i ŭ hetym u Biełarusi byli ciažkija vypadki paśla RSV, tamu vakcynu i zavieźli, — miarkuje miedyk.
U śviecie vakcynu ad RSV u jakaści prafiłaktyki zvyčajna atrymlivajuć ciažarnyja žančyny. Tady dzicia, narodžanaje raniej za termin, stanovicca aŭtamatyčna abaronienym ad hetaha virusa. U Biełarusi ŭ 2025 hodzie taksama razhladajecca ŭvoz vakcyny dla imunizacyi ciažarnych, raskazali ŭ centry imunaprafiłaktyki. Takaja pryščepka dapamoža ŭ dalejšym abaranić dziaciej da 6 miesiacaŭ ad RSV.