Syn Trampa mnohaje vyrašaje. Voś jak tłumačać niavybar Pampiea
Donald Tramp-małodšy stanovicca ŭsio bolš upłyvovym. Havorać taksama pra rost upłyvu miedyjapiersony Takiera Karłsana.
12.11.2024 / 19:48
Majk Pampiea. Fota: AP Photo / Chris Szagola
Donald Tramp u niadzielu abjaviŭ, što były dziaržsakratar i kiraŭnik CRU Majk Pampiea, a taksama byłaja pradstaŭnica ZŠA ŭ AAN Niki Chejli nie buduć častkaj jaho druhoj administracyi.
U vypadku ź Niki Chejli heta moža być źviazana ź jaje ŭdziełam u prajmieryz suprać Trampa — piša The Wall Street Journal (WSJ). Niahledziačy na toje, što jana padtrymała jaho na ahulnych vybarach, Tramp, zdajecca, nie zabyŭsia pra kinuty joju vyklik.
Adnak niavybar Pampiea vyhladaje bolš zahadkava. Jon słužyŭ Trampu vierna na praciahu ŭsiaho pieršaha terminu, zajmajučy pasady dyrektara CRU i dziaržsakratara. Čamu ž jaho vyklučyli?
Pavodle WSJ, heta źviazana z rostam upłyvu Trampa-małodšaha i jaho chaŭruśnikaŭ, uklučajučy miedyjapiersonu Takiera Karłsana. Jany aktyŭna prasoŭvajuć Džej Dzi Vensa jak nastupnika Trampa i chočuć pieraškodzić inšym patencyjnym kandydatam, jak Pampiea, atrymać vysokija pasady, bo heta mahło b uzmacnić ich palityčny ŭpłyŭ.
Akramia taho, jość roznahałośsi ŭ źniešniaj palitycy. Pampiea i Chejli padtrymlivajuć aktyŭnuju rolu ZŠA na mižnarodnaj arenie, uklučajučy padtrymku Ukrainy, NATA i azijackich sajuźnikaŭ. Tramp-małodšy i jaho kamanda chočuć skaracić hetyja abaviazacielstvy.
Vydańnie cytuje adnaho z prychilnikaŭ ruchu MAGA (Make America Great Again — «Zrobim Amieryku znoŭ vialikaj» — asnoŭny łozunh Trampa), jaki napisaŭ u sacsietkach: «Ruch «spynić Pampiea» cudoŭny, ale hetaha niedastatkova. Nam treba maksimalna nacisnuć, kab nie dapuścić nieakonaŭ [nieakansiervataraŭ] i vajennych jastrabaŭ u administracyju Trampa». Tramp-małodšy pierapościŭ heta z kamientarom: «Zhodny na 100% 100% 100%!!! Mienavita hetym ja i zajmajusia».
Hetyja padziei śviedčać pra toje, što ŭnutranaja baraćba za ŭpłyŭ u novaj administracyi Trampa ŭžo pačałasia. Vyhladaje na toje, što syn prezidenta budzie mieć značny ŭpłyŭ na pryniaćcie rašeńniaŭ. Jakija heta budzie mieć nastupstvy dla budučyni ZŠA i rasijska-ŭkrainskaj vajny, pakul što pad vialikim pytańniem.