Svajak Viktara Łukašenki zajmaje vysokija pasady ŭ KDB. Heta vyśvietliłasia, kali zabrali budynak dziciačaj palikliniki
Digital intelligence team padrychtavaŭ rasśledavańnie pra toje, jak budynak Minskaj palikliniki pryznali «avaryjnym» i biaspłatna pieradali KDB. Paśla taho, jak budynak adyšoŭ śpiecsłužbam, hrošy na jaho rekanstrukcyju chutka znajšlisia.
13.11.2024 / 12:16
Budynak dziciačaj palikliniki ŭ 2017 hodzie. Fota: onliner.by
«Avaryjnaja paliklinika»
Kamanda Digital intelligence team atrymała źviestki pra toje, što biełarusaŭ vyklikajuć na dopyty ŭ budynak byłoj dziciačaj palikliniki pobač ź mietro Aŭtazavodskaja ŭ Minsku. Ale što heta za budynak?
Znachodzicca jon na vulicy Siadova, 8 u Minsku. Nasuprać — škoła, pobač — Pałac kultury MAZ i stancyja mietro «Aŭtazavodskaja». Raniej tam byŭ filijał 10-j dziciačaj palikliniki. Miascovyja žychary raskazvali «Anłajnieru», što tam absłuhoŭvalisia sotni dziaciej, a budynak byŭ zaŭždy pierahružany.
Naprykancy 2017 hoda miascovyja žychary daviedalisia, što paliklinicy terminova patrebny kapitalny ramont. Ich zasmuciła toje, što ŭ budynku cełaje leta dla čahości prachodziŭ kaśmietyčny ramont. Zrešty, skarhi i zvaroty da ŚMI ničoha nie dali. Budynak zakryli, ale rekanstrukcyju tak i nie pačali. Usich dziaciej pieranakiravali ŭ hałoŭny budynak 10-j palikliniki.
Pierałomny 2020-y
U śniežni 2020 hoda było vyrašana, što budynak biare sabie KDB. Budynak i płošču pobač uziali biaspłatna z ułasnaści Minzdaroŭja i addali KDB. Płanavaje zadańnie, jakoje pryvodzić Digital intelligence team, paćviardžaje hetuju schiemu.
Skrynšot płanavaha zadańnia, jakoje pryvodzić Digital intelligence team
Padpisaŭ zadańnie na prajektavańnie pad «raźmiaščeńnie abjekta inšaha pryznačeńnia» Alaksandr Harusaŭ, jaki tady byŭ namieśnikam kiraŭnika ŭpraŭleńnia KDB. Bijahrafija hetaha 50-hadovaha čekista maje važnuju tajamnicu.
Siamja Harusavych
Alaksandr i Ina Harusavy. Fota z bazy «Kibierpartyzanaŭ»
Žonka Harusava — 50-hadovaja Ina. Jany ziemlaki, aboje sa Škłoŭščyny. Ina Harusava pracuje ŭ Apieratyŭna-analityčnym centry pry prezidencie Biełarusi na pasadzie viadučaha śpiecyjalista. Jana siastra Lilii Łukašenka, žonki Viktara Łukašenki.
Ina i Alaksandr, zhodna sa źviestkami «Aljansa rasśledavalnikaŭ Biełarusi», šmat padarožničali razam ź siamjoj Viktara Łukašenki i ichnimi siabrami. Heta adbyvałasia z 2008 pa 2020 hady.
Naprykład, u 2011 Harusavy jeździli ŭ Bodrum razam ź Miłankaj Karyč, žonkaj saŭładalnika Dana Holdings Bahaluba Karyča i adnym z kiraŭnikoŭ Dana Holdinds Zielanka Silikovicam. U 2016 adpačyvali miesiac u Hrecyi razam z Bahalubam Karyčam i jaho siamjoj. Taksama ŭ 2016, 2017 i 2020 hadach Ina ź Lilijaj Łukašenka dy dziećmi jeździli ŭ Katar i AAE ŭ toj ža čas, kali tam byŭ Alaksandr Łukašenka.
Usie sumiesnyja padarožžy Harusavych z Łukašenkami adbyvalisia na pryvatnych samalotach.
Tajamnicy KDB
U dakumientacyi, jakuju prajekt atrymaŭ ad «Biełpoła», budynak KDB paŭsiul padpisany jak «abjekt inšaha pryznačeńnia». Ahulnaja płošča budynka — 335,2 kvadratnaha mietra. Raźličany jon na 21 supracoŭnika KDB.
Skrynšot z płana pa rekanstrukcyi budynka
Voś, jak jon raźmiaščajecca adnosna vulic Siadova i Šasiejnaj. Dla KDB stvaryli parkoŭku na 13 miescaŭ.
Skrynšot z płana rekanstrukcyi budynka
U padvale budynka ničoha admietnaha: haspadarčyja pakoi.
Skrynšot z prajektnaj dakumientacyi budynka
Na pieršym paviersie — 8 kabinietaŭ dla 12 supracoŭnikaŭ. Tam ža pamiaškańnie dziažurnaha, vokny jakoha vychodziać na vulicu Siadova i škołu pobač. Taksama jość pakoj dla naviedvalnikaŭ. Jość pakoj adpačynku i charčavańnia.
Skrynšot z prajektnaj dakumientacyi budynka
Fota z sajta Digital intelligence team. Skrynšot ź Jandeks.Kart
Na druhim paviersie jość jašče 7 kabinietaŭ. Taksama tam jość dva pakoi dla adpačynku i dušavaja. U kožnym z takich pakojaŭ jość kanapy i možna navat paspać. Navošta try pakoi adpačynku na 21 čałavieka, niezrazumieła.
Skrynšot z prajektnaj dakumientacyi budynka
Taksama ŭ budynku nie mienš za 20 kandycyjanieraŭ, a na pieršym paviersie ŭstalavanaja sihnalizacyja. Pa konturu budynka raźmieščanyja 25 kamier nazirańnia.
Kamiery dy sihnalizacyja ŭ budynku
Rekanstrukcyja budynka skončyłasia ŭ červieni 2023 hoda. U budynak, zhodna z tendarami, ukali 3,6 miljona rubloŭ ci kala $1,5 miljona.
Paraŭnajcie, jak budynak vyhladaŭ da i paśla taho, jak pierajšoŭ pad kryło KDB:
Finansavaŭsia ramont, viadoma, ź dziaržaŭnych srodkaŭ — ź biudžetu Minska i ŭpraŭleńnia kapitalnaha budaŭnictva i ramontu Zavadskoha rajona Minska.