Мінінфарм заблакаваў у Беларусі Livejournal
Некалі папулярны сайт з блогамі не адкрываецца ў Беларусі. Праблемы з доступам узнікалі і раней, аднак тады заглушкі з паведамленнем Мінінфарма не было.
13.11.2024 / 16:51
Скрыншот Onliner
У Беларусі абмежавалі доступ да некалі вельмі папулярнага сайта Livejournal.
Пры спробе зайсці на сайт з'яўляецца заглушка, якая паведамляе, што доступ абмежаваны па рашэнні Мінінфарма, піша Onliner.
Такая сітуацыя назіраецца ў некалькіх інтэрнэт-правайдэраў. Пры гэтым, як адзначае выданне, адзін раз сайт усё ж адкрыўся — на стацыянарным камп'ютары.
Міністэрства інфармацыі пакуль не паведамляла пра блакаванне Livejournal. Праблемы з доступам да ЖЖ з'явіліся ў Беларусі ў кастрычніку, аднак тады заглушкі з паведамленнем Мінінфарма не было — сайт проста не адкрываўся.
Livejournal (ЖЖ) з'явіўся ў 1999 годзе. Платформа дазваляла весці блогі і мець зносіны. Сайт атрымаў вялікую папулярнасць у 2000-я гады, аднак з развіццём сацсетак яна пайшла на спад.
Чым сёння займаюцца некалі вядомыя героі ЖЖ? Спойлер: многія так і не закінулі блогерства