Byłoha palitviaźnia, jaki letaś adbyŭ termin pa «spravie Zielcara», znoŭ buduć sudzić
Chajrulina znoŭ buduć sudzić 26 listapada.
14.11.2024 / 13:52
Pieršy raz Cimura Chajrulina zatrymali 30 vieraśnia 2021 hoda ŭ miežach kryminalnaj spravy, raspačataj za kamientary ŭ internecie paśla hibieli supracoŭnika KDB Dźmitryja Fiedasiuka i IT-śpiecyjalista Andreja Zielcara.
Tady jaho abvinavacili pavodle art. 369 KK (abraza pradstaŭnika ŭłady) i art. 130 KK (raspalvańnie inšaj sacyjalnaj varožaści). 5 žniŭnia 2022 hoda ŭ Minskim haradskim sudzie jamu pryznačyli 2,5 hoda pazbaŭleńnia voli. Pa padlikach pravaabaroncaŭ, u kastryčniku 2023 hoda Cimur vyjšaŭ na volu pa zakančeńni terminu, piša «Viasna».
Ciapier stała viadoma, što Chajrulina znoŭ buduć sudzić 26 listapada. Hetym razam jaho abvinavačvajuć u «abrazie pradstaŭnika ŭłady» (art. 369 KK). Spravu buduć razhladać u sudzie Frunzienskaha rajona Minska, sudździa — Julija Bliźniuk. Pakul nieviadoma, ci znachodzicca Cimur pad vartaj.