58-hadovy Majk Tajsan rychtujecca da boju z papularnym błohieram. Pajadynak nazyvajuć bojem mary

Tajsan vyjdzie na rynh upieršyniu za 19 hadoŭ, i boj moža stać dla jaho apošnim.

14.11.2024 / 15:36

U noč na 16 listapada lehienda boksu ŭ ciažkaj vazie Majk Tajsan sustreniecca na rynhu z bajcom-błohieram Džejkam Połam, Arhanizatary nazvali boj «pajadynkam mary», jaki zdarajecca raz u žyćci, piša Bi-bi-si.

Boj adbudziecca na arenie AT&T Stadium u Arlinhtanie ŭ amierykanskim Techasie. Były absalutny čempijon śvietu ŭ ciažkaj vazie Tajsan vyjdzie na rynh upieršyniu za 19 hadoŭ, i hety vychad moža stać apošnim. Zaraz spartoŭcu — 58 hadoŭ, a jaho supiernikam budzie małady 27-hadovy bajec. Tajsan atrymaje za boj 20 miljonaŭ dalaraŭ, a jaho supiernik — udvaja bolš.

Ale sprava nie ŭ hrošach. Lehiendarny spartoviec zajaviŭ, što hatovy pamierci ŭ bai z Połam. «Dla mianie heta vielmi važna, kali ja vyjhraju — ja stanu bieśśmiarotnym, — skazaŭ jon u trejlery da dakumientalnaha filma Netflix pra boj. — Kali ja vystuplu drenna, ja nie chaču pamirać u balnicy, ja chaču pamierci na rynhu».

Heta pieršy baksiorski boj, jaki tranśluje videaservis Netflix. Pahladzieć boj zmohuć usie, chto maje padpisku na płatformu.

Spartyŭnaja kamisija Techasa pahadziłasia pryznać spabornictva jak prafiesijny boj, i jaho vynik budzie ŭličvacca ŭ zalik abodvuch spartsmienaŭ. Ale kamisija dadała niekalki ŭmoŭ z ulikam vieku Tajsana. Raŭndy mohuć praciahvacca tolki dźvie chviliny, a boj nie moža być daŭžejšy za vosiem raŭndaŭ.

Inšaja važnaja detal — heta pamier palčatak. U Tajsana i Poła buduć palčatki pa 14 uncyj (prykładna 400 h), a nie tradycyjnyja — pa 10 uncyj, jakija vykarystoŭvajucca ŭ prafiesijnym boksie. Nakaŭty dazvolenyja, i pieramožcu abvieściać paśla vaśmi raŭndaŭ.

Šou pačniecca a čaćviertaj nočy pa minskim časie 16 listapada. Adnak sam boj pamiž Tajsanam i Połam čakajecca nie raniej za piataju ranicy.

Rekordy Tajsana i Poła

Rekordy Tajsana i Poła — heta dva roznyja śviety, kali nie skazać — dva roznyja adrezki času.

Tajsan debiutavaŭ u prafiesijnym sporcie ŭ 1985 hodzie, za 12 hadoŭ da naradžeńnia Poła. Za 20-hadovuju karjeru Tajsan vyjhraŭ 50 bajoŭ, prajhraŭšy tolki šeść z 44 nakaŭtami. Jon — najmaładziejšy čempijon śvietu ŭ ciažkaj vazie. Jon atrymaŭ čempijonski pojas u 20 hadoŭ i staŭ absalutnym čempijonam śvietu ŭ 21.

Akramia taho, jon — adziny baksior u historyi, jakomu ŭdałosia šeść razoŭ zapar abaraniać tytuł absalutnaha čempijona śvietu.

Tajsan pakinuŭ rynh na piku svajoj karjery ŭ 2005 hodzie paśla niekalkich paraz. Ale z taho času pravioŭ niekalki vystavačnych bajoŭ, u tym liku suprać Roja Džonsa-małodšaha ŭ 2020 hodzie.

Ale Džejk Poł źjaŭlajecca favarytam hetaha spabornictva pa niekalkich pryčynach.

Pa-pieršaje, jon bolš čym u dva razy maładziejšy za svajho supiernika. Połu 27 hadoŭ, navat kali heta i aznačaje vialikuju prahalinu ŭ dośviedzie. Jon pabudavaŭ svaju karjeru na rynhu, staŭšy adnym z samych viadomych karystalnikaŭ YouTube u śviecie. U 2018 hodzie jon padchapiŭ trend boksu na YouTube, a ŭ 2020 hodzie pravioŭ svoj pieršy prafiesijny boj.

Poł biŭsia z mnohimi viadomymi spartsmienami, ale mnohija ź ich źjaŭlajucca bajcami MMA (źmiašanych bajavych mastactvaŭ), jakija ŭpieršyniu sprabavali siabie ŭ boksie. U jaho 9 pieramoh u 10 baksiorskich bajach i adna paraza ŭ bai z baksioram i zorkaj telešou «Astravy kachańnia» Tomi Fjury. U lipieni Poł u baksiorskim bai pieramoh byłoha bajca UFC Majka Piery nakaŭtam u šostym raundzie.

Poł nikoli nie biŭsia bolš za vosiem raŭndaŭ i maje siem spynienych bajoŭ u svaim pasłužnym śpisie. Dla paraŭnańnia, Poł ahulna pravioŭ 52 raŭndy, a Tajsan — 215.

Nashaniva.com