Śviet

Suśvietnyja ceny na kavu abnavili maksimum za 13 hadoŭ

Kava hatunku arabika padaražeła da maksimumu z 2011 hoda. Pra heta śviedčać danyja tarhoŭ na biržy ŭ Ńju-Jorku.

Zdymak ilustracyjny. Fota: freepik.com

Cana fjučarsaŭ na arabiku na Ńju-jorkskaj biržy ICE Futures vyrasła na 1,2%, da $3,0575 za funt. Heta prykładna da $6 720 za tonu. Tym časam fjučarsy na hatunak rabusta padskočyli na 4,1%, da $5191 za tonu.

Uvohule rost cany na zialonuju kavu, jakaja pradajecca na suśvietnym rynku, skłaŭ kala 30%.

Niahledziačy na niadaŭnija daždžy ŭ Brazilii, vilhotnaść hleby zastajecca niedastatkovaj, adznačyli ekśpierty. Heta pieraškadžaje raźvićciu pładoŭ, što moža pastavić pad pahrozu ŭradžaj nastupnaha hoda.

Ministerstva sielskaj haspadarki ZŠA sprahnazavała, što ŭradžaj kavy ŭ Brazilii ŭ 2024/25 sielskahaspadarčym hodzie składzie 66,4 młn standartnych 60-kiłahramovych miaškoŭ, tady jak raniej uradžaj čakaŭsia na ŭzroŭni 69,9 młn miaškoŭ.

Pavodle danych mietearałahičnaj słužby Cemaden, biahučy siezon u Brazilii źjaŭlajecca samym zasušlivym z 1981 hoda.

Vytvorcy ź inšych krain taksama vykazvajuć zaniepakojenaść z nahody ŭtrymańnia cenaŭ. Tak, u Vjetnamie mohuć pavysić ceny na kavu śledam za brazilskimi vytvorcami.

Vjetnam — klučavy vytvorca hatunku rabusta. Z-za daždžoŭ i tajfunaŭ ŭ Vjetnamie ŭradžaj rabusty ŭ nastupnym hodzie moža być na 7% nižejšym za papiaredni hod.

Cana na kavu rasła štomiesiac z krasavika pa vierasień biahučaha hoda, a ŭ vieraśni cana arabiki dasiahnuła 6 tysiač dalaraŭ za tonu ŭpieršyniu ź vieraśnia 2011 hoda.

Kamientary da artykuła