Katedž u Minsku z saŭnaj i basiejnam pradajuć amal za 400 tysiač dalaraŭ
U Minsku na prodaž vystavili dom z ułasnym basiejnam, pryhožymi kałonami, kavanymi leśvicami. Znachodzicca jon zusim nie ŭ Drazdach i navat nie na Cniancy, a ŭ Kurasoŭščynie, na vulicy Bresckaj, piša Onliner.by.
27.11.2024 / 15:44
Budynak pabudavali jašče ŭ 2007 hodzie. Padmurak zrobleny z žalezabietonnych błokaŭ, ścieny — z hazasilikatu, dach pakryty mietaładachoŭkaj. Płošča la katedža vielmi navat salidnaja — 432 «kvadraty». Vyšynia stolaŭ — 3 mietry.
Dom trochuzroŭnievy, ź niekalkimi prastornymi bałkonami. Na cokalnym paviersie možna znajści basiejn z padahrevam i ŭłasnym vychadam na vulicu, saunu, pakoj adpačynku, sanvuzieł i niekalki haspadarčych pamiaškańniaŭ. Taksama tut raźmiaščajecca haraž na dva mašynamiescy.
Na pieršym paviersie znachodzicca harderobnaja zona, vialikaja haścioŭnia pamieram z trojku ŭ panelcy (jaje płošča — 64 kv.m), stałovaja, u jakoj možna pasadzić bolš za 10 čałaviek, kuchnia, haścioŭnia i vannaja.
Na druhim uzroŭni schavalisia haspadarskaja spalnia, jašče adna harderobnaja, sanvuzieł z džakuzi i dva pamiaškańni, jakija možna pieraabstalavać pad dziciačyja, kabiniet i t. d.
Interjer sučasnym nazvać nielha. Ale zatoje jon vydatna adlustroŭvaje duch času, u jakim byŭ pabudavany. Azdableńnie i mebla vyhladajuć jakasna, tamu, kali vam nie tak važny dyzajn i trendy, vy možacie razhledzieć hety varyjant. Nu, abo zrabić ramont na svoj hust.
U katedžy jość usie nieabchodnyja kamunikacyi:
- centralnaje vodazabieśpiačeńnie ź sistemaj źmiakčeńnia vady i jaje ačystki ad žaleza, a taksama dadatkovym nasosam dla padtrymańni cisku;
- centralnaja kanalizacyja;
- elektryčnaść z mahčymaściu ŭstaloŭki zaradnaj stancyi dla aŭtamabila;
- hazavaje aciapleńnie;
- sistema kandycyjanavańnia i prymusovaj vientylacyi;
- sistema ekaŭborki (ustanoŭleny śpiecyjalny pyłasos, jaki advodzić zabrudžanaje pavietra za miežy žyłych pamiaškańniaŭ);
- achoŭnaja sihnalizacyja.
Sam učastak zajmaje 5,5 sotki. Na zadnim dvary ŭładalnik uładkavaŭ nievialiki aazis z traŭnikam, alpijskaj horkaj, arelami i nievialikim staŭkom z presnaj vadoj (tam navat žyvie alihatar, praŭda, niesapraŭdny). Pa pierymietry doma vysadžany tui i jełki.
Za ŭsio heta bahaćcie ŭłaśnik prosić $379 000 pa kursie.