Hramadstva

Cichanoŭskaja: Z mužam užo bolš za 600 dzion niama suviazi, ale Siarhiej — adzin z samych mocnych ludziej, jakich ja sustrakała

U intervju TVP World biełaruskaja lidarka padzialiłasia dumkami nakont ciapierašniaha stanu muža Siarhieja ŭ turmie.

«U samym pačatku my ŭsie vieryli, što Siarhiej chutka vierniecca dadomu. Tamu ja kazała dzieciam, što ich tata ŭ kamandziroŭcy. Ale potym ja vyrašyła raskazać im praŭdu:

Siarhiej u turmie, ale nie tamu što jon złačyniec, a tamu što ich tata — sumlenny čałaviek, jaki advažyŭsia kinuć vyklik režymu. Jon zrabiŭ heta dziela ich budučyni. Jany płakali niekalki dzion, ale pryniali heta.

I z tych časoŭ maja zadača — zrabić tak, kab tata ŭsio roŭna prysutničaŭ u žyćci maich dziaciej: my ŭvieś čas hladzim videa ź jaho błoha na YouTube, a naša dačka piša listy tatu na kožnaje śviata».

Śviatłana raskazała pra ciapierašni stan Siarhieja:

«Bolš za 600 dzion ź im niama suviazi. Moj muž užo čatyry hady nie atrymlivaŭ nijakich pasyłak. Ujavicie sabie hetuju turemnuju ježu, bieź vitaminaŭ. Dumaju, jon mocna schudnieŭ.

Viadoma, što va ŭsich palitviaźniaŭ uźnikajuć prablemy sa zdaroŭjem, z zubami, z vačyma. Ich vielmi časta sadžajuć u karcary, u ich niama ni padušak, ni koŭdraŭ, ničoha. Ale, viedajecie, Siarhiej — adzin z samych mocnych ludziej, jakich ja sustrakała.

Jon zaŭsiody byŭ maim aryjenciram u śviecie i žyćci. Jon spraŭlaŭsia sa šmatlikimi ciažkaściami ŭ našym žyćci. Tamu ja vieru, što my razam projdziem i praz heta».

Zaŭtra, 29 listapada, budzie roŭna čatyry z pałovaj hady, jak zatrymali Siarhieja Cichanoŭskaha.

Kamientary da artykuła