U Homielskaj vobłaści prajšoŭ «śvinacyd», u niekatorych rajonach vyžyła tolki kožnaja 20-ja śvińnia
Infarmacyja pra rezkaje skaračeńnie pahałoŭja śvińniaŭ u Homielskaj vobłaści stała viadomaja z statystyčnaha daviednika za studzień—kastryčnik, apublikavanaha Homielstatam, zaŭvažyŭ «Fłahštok».
28.11.2024 / 14:27
Pa ŭsioj vobłaści pahałoŭje śvińniaŭ źmienšyłasia na čverć (25,9%) abo na 61,6 tysiačy hałoŭ. Asnoŭnyja straty panieśli Śvietłahorski i Mazyrski rajony. Tam prapała 94,5% i 83,8% pahałoŭja.
Dziaržaŭnyja ŚMI nie zaŭvažyli taho, što adbyłosia. Nijakich paviedamleńniaŭ na praciahu 2024 hoda nie publikavałasia.
Na ŭmovach ananimnaści «Fłahštok» pahutaryŭ z žycharom ahraharadka ŭ Śvietłahorskim rajonie.
Michaił [imia źmieniena] paviedamiŭ, što rabotniki sielskaj haspadarki ŭ kursie taho, što adbyvałasia. Jon upeŭnieny, što epidemija afrykanskaj čumy nie mahła stać pryčynaj rezkaha skaračeńnia pahałoŭja.
«U pryvatnikaŭ AČS nie znachodzili, nidzie čumy nie paćvierdzili.
Pryčynaj zaboju tysiač žyvioł stali prablemy ź finansavaj spravazdačnaściu i strach pierad adkaznaściu», — kaža jon.
«Śpisvajuć na čumu (afrykanskuju čumu śvińniaŭ), ale čumy niama. Takim čynam śpisvajuć straty i vyrašajuć prablemu z adsutnaściu karmoŭ. Prypisvali vielizarnyja pryrosty, atrymlivali premii i zarobki, a ŭ realnaści pracavali ŭ vielizarny minus. Tamu i vyrašyli abviaścić režym AČS — heta samy prosty sposab nie atrymać p***j. Kali idzie likvidacyja zaražanych žyvioł, ich nie ŭzvažvajuć, adpaviedna, i niastačy nichto nie zaŭvažyć».
Michaił upeŭnieny, što bieź viedama kantralujučych orhanaŭ źniščeńnie pahałoŭja nie mahło adbycca: «Biez zmovy ź vietnahladam takoje składana pravieści. Tak što i jany tam zamazanyja».