Łakalizavali dakładnaje miesca znachodžańnia rasijskaha filtracyjnaha łahiera ŭ Naroŭli, u jakim katavali ŭkrainskich pałonnych
U pačatku poŭnamaštabnaha ŭvarvańnia va Ukrainu rasijskija vajskoŭcy stvaryli na terytoryi Biełarusi filtracyjny łahier. Umovy ŭtrymańnia i staŭleńnie da pałonnych u im pravaabaroncy nazvali adnymi z najbolš žorstkich. Praź niedastatkovuju kolkaść źviestak vyznačyć dakładnaje miesca znachodžańnia łahiera zdavałasia niemahčymym, ale žurnalistam BRC pry dapamozie spadarožnikavych zdymkaŭ i videa rasijskaha telekanała ŭdałosia heta zrabić.
28.11.2024 / 20:49
Kałaž BRC: Dyrektarka pradpryjemstva «Paleski aljans» Zinaida Mirucienka, staršynia Naraŭlanskaha rajvykankama Uładzimir Antonienka, Alaksandr Łukašenka. Krynicy: mazyr.by, gp.by. Kałaž stvorany z vykarystańniem ŠI
Pry apytańniach ukraincaŭ, jakim daviałosia praz hety łahier prajści, zvyčajna hučała nazva biełaruskaha rajcentra Naroŭla, jaki raźmiaščajecca niedaloka ad miažy z Ukrainaj.
Tak, Uładzisłaŭ Jahadzinski z ukrainskaj vioski Aranaje niepadalok ad miažy ź Biełaruśsiu, jaki na toj čas byŭ niepaŭnaletnim, raskazaŭ, jak jaho sa starejšym bratam rasijskija vajskoŭcy vyvieźli ŭ aŭtazaku na terytoryju Biełarusi:
«Ja ŭžo zrazumieŭ, kali mianie pieraviali na pamiežnuju słužbu. Tam byli pamiežniki, i ja ich zapytaŭ [dzie my znachodzimsia]. I jany skazali: «Biełaruś, Naroŭla».
Pałonnych utrymlivali na terytoryi, jakaja nahadvaje zakinuty kałhas. Padobna apisaŭ žurnalistam BRC miesca, dzie jaho ŭtrymlivali, i ŭkrainski vajskoviec Viktar (imia źmieniena pa jahonaj prośbie). Jon trapiŭ u pałon da rasiejcaŭ prykładna ŭ toj ža čas, što i braty Jahadzinskija. Viktara abmianiali ŭ 2024 hodzie.
«U nas byli zaviazanyja vočy. U aŭtazakach nas vieźli. I voś taksama tavaryš, [ź jakim] my razam byli, kaža, što byccam «Naroŭla» čuŭ», — raspavioŭ jon.
Sa słovaŭ Viktara, tam, u Naroŭli, ich raźmiaścili ŭ «niejkim bujnym kałhasie»:
«Terytoryja była vialikaja. Stajała vielmi šmat techniki, to bok tanki tam stajali, saŭki ZUški [savieckija zienitnyja ŭstanoŭki], voś, mienavita pobač… To bok prajazdžali: ramontnaja baza ŭ ich tam ci pieravałačnaja baza była, tamu što techniki było šmat».
Pra łahier u Naroŭli, kudy zvozili jak vajskovych, tak i cyvilnych ukrainskich pałonnych, taksama raniej kazali ŭkrainskija pravaabaroncy i žurnalisty. Prytym zachoplenych ukraincaŭ tam nie prosta trymali ŭ niavoli, ale i padviarhali žorstkim katavańniam.
Majučy dźvie padkazki — horad Naroŭla i apisańnie miascovaści «bujny kałhas», rasśledavalniki z BRC šukali kankretnaje miescaznachodžańnie hetaha łahiera, pravodziačy analiz spadarožnikavych zdymkaŭ Planet Labs, datavanych pačatkam 2022 hoda.
Vialikaja kolkaść vajskovaj techniki była raskidanaja pa ŭsim horadzie. Pry hetym amal usie ŭčastki, na jakich stajali mašyny, pavodle dadzienych kadastravaha rejestru, naležali kampanijam, jakija byli zasnavanyja dziaržaŭnymi pradpryjemstvami. Kancentracyja rasijskaj vajskovaj techniki adznačałasia na terytoryi parkoŭki Naraŭlanskaha dziaržaŭnaha kaledža, filijała aŭtobusnaha parku № 2, dziaržaŭnaha pradpryjemstva «Naraŭlanskaja pierasoŭnaja miechanizavanaja kałona № 107» i pradpryjemstva «Prypiacki aljans», jakoje ŭvachodzić u strukturu Biełkaapsajuza.
Kałaž BRC. Spadarožnikavy zdymak Google Maps, dzie paznačanyja łakacyi, jakija zajmali rasijskija vajskoŭcy ŭ pačatku 2022 hoda: 1) terytoryja pradpryjemstva «Prypiacki aljans» (naležała arhanizacyi da 16.06.2022); 2) terytoryja DP «Žyłkambud» (da studzienia 2022 — «Naraŭlanskaja pierasoŭnaja miechanizavanaja kałona № 107»); 3) terytoryja «Naraŭlanskaha dziaržaŭnaha kaledža»; 4) terytoryja filijała aŭtobusnaha parku № 2 DP «Homielabłaŭtatrans»
Filtracyjny łahier u Naroŭli mahli arhanizavać u luboj z hetych łakacyj, a vyznačyć dakładnaje miescaznachodžańnie dapamahła infarmacyja z rasijskaha miedyja.
Naprykancy kastryčnika 2024 hoda žurnalisty BRC sustrelisia z Bahdanam Łysienkam, vajskoŭcam USU, jaki trapiŭ u pałon da rasiejskich vajskoŭcaŭ u kancy sakavika 2022 hoda. Jon raskazaŭ, što jaho razam z hrupaj sasłužyŭcaŭ-suviazistaŭ schapili paśla šturmu vajskovaj častki, a potym vyvieźli ŭ Naroŭlu i zdymali tam prapahandysckaje videa.
Vykarystaŭšy hetuju začepku, Bahdana Łysienku nieŭzabavie ŭdałosia znajści na videa rasijskaha telekanała NTV: jaho, paranienaha padčas šturmu, rasijskija vajskoŭcy transpartujuć na nasiłkach, a potym na kamieru akazvajuć miedyčnuju dapamohu. Kali spasyłku na videa dasłali Uładzisłavu Jahadzinskamu i byłomu vajennapałonnamu Viktaru, jany paćvierdzili, što jano było zroblena ŭ tym samym «kałhasie», u jakim byli źniavolenyja i jany.
Paśla taho, dziakujučy charakternamu budynku z razburanym dacham, raźmiaščeńniu namiotaŭ i KamAZaŭ, žurnalistam udałosia dakładna łakalizavać heta miesca. Filtracyjny łahier znachodziŭsia na terytoryi, jakoj vałodaje TAA «Prypiacki aljans», na vulicy Kamsamolskaj.
Kałaž BRC. Spadarožnikavy zdymak 2024 Planet Labs PBC (pa stanie na krasavik 2022 hoda): 1) budynak z charakterna razburanym dacham i palavy namiot sprava ŭnizie ad jaho; 2) palavy namiot ź videa «RIA Novosti»
Miarkujučy pa spadarožnikavych zdymkach, rasijskija vajskoŭcy byli tut jak minimum da pačatku traŭnia 2022 hoda. Kali USU deakupavali Kijeŭskuju vobłaść, vierahodna, maršruty transparciroŭki pałonnych źmianilisia.
Kali žurnalisty BRC patelefanavali ŭ «Prypiacki aljans», dyrektarka pradpryjemstva Zinaida Mirucienka paraiła źviarnucca z pytańniami ŭ vykankam. Kiraŭnik Naraŭlanskaha vykankama Uładzimir Antonienka — były siłavik sa słužby biaśpieki Alaksandra Łukašenki. Čałaviek, jaki adkazaŭ na zvanok na jahony numar, skazaŭ, što žurnalisty nie tudy trapili.
Jak ahienty biełaruskaha HRU ŭkaranilisia ŭ apazicyju: novaje rasśledavańnie