U 85% pačalisia prablemy ź mienstruacyjaj, srodki hihijeny nie vydavali ŭ jakaści pakarańnia. Pravaabaroncy raskazali pra zdaroŭje žančyn za kratami
Arhanizacyja «Lekary za praŭdu i spraviadlivaść» pradstaviła vyniki apytańnia byłych palitźniavolenych žančyn.
29.11.2024 / 14:29
U apytancy, pra jakuju idzie havorka, udzielničała 20 žančyn. Pierš za ŭsio eks-palitźniavolenyja adznačajuć prablemy ź miedyčnaj dapamohaj za kratami. Naprykład, praktyčna ŭsie žančyny prachodzili praź miedahlad, kali traplali ŭ SIZA i kałoniju, ale bolšaść adznačaje farmalny charaktar ahladu i toje, što ich skarhi na zdaroŭje ihnaravalisia, a infarmacyju pra stan zdaroŭja davali ź nieachvotaj ci ŭvohule nie davali. Jość prablemy z dostupam da vuzkich śpiecyjalistaŭ i atrymańniem stamatałahičnaj dapamohi.
U 17 z 20 apytanych žančyn za kratami pačalisia prablemy ź mienstrualnym cykłam, ale ŭ bolšaści vypadkaŭ jany traplali na hiniekałahičny ahlad tolki tady, kali ich pryvozili ŭ papraŭčuju ŭstanovu. Usie apytanyja adznačyli, što nie mieli za kratami mahčymaść padtrymlivać naležnuju hihijenu. 65% žančyn taksama raskazali, što supracoŭniki papraŭčych ustanoŭ vykarystoŭvali zabaronu na duš i vydaču srodkaŭ hihijeny dziela pakarańnia asudžanych.
Pa narmatyvach źniavolenyja majuć prava tolki na 10 chvilin dušu raz na tydzień, i ŭ SIZA ŭ hety čas zakładzieny taksama šlach da dušavych.
U pačatku pandemii kavidu ŭsie źniavolenyja i supracoŭniki papraŭčych ustanoŭ atrymali mahčymaść pryščapicca ad kavidu. Ale ŭžo z 2021-ha z vakcynacyjaj uźnikli prablemy, i žančynam, jakija chacieli atrymać pryščepku, daviałosia hetaha patrabavać. Z 20 apytanych eks-palitźniavolenych tolki 4 žančyny atrymali vakcynu, i miedpiersanał ihnaravaŭ skarhi na zdaroŭje adrazu paśla pryščepki «Sputnikam».
Žančyny taksama adznačajuć prablemy z charčavańniem za kratami. U turemnym racyjonie zanadta mała harodniny i sadaviny, zielaniny, małočnych praduktaŭ, zanadta mała białkovych praduktaŭ i nadta šmat vuhlavodaŭ. Nie było dostupu da jakasnaj pitnoj vady, a taja ježa, jakaja ŭsio ž traplaje da źniavolenych, časta byvaje nizkaj jakaści.
Jašče adna prablema — toje, što sami ŭmovy ŭtrymańnia pad vartaj paharšajuć zdaroŭje źniavolenych. Pavodle danych apytańnia, u kamierach SIZA źmiaščałasia adnačasova ad 4 da 16 žančyn. U SIZA niama padzialeńnia na žančyn, jakija kurać, i tych, chto nie kuryć, tamu apošniaja katehoryja žančyn była vymušanaja štodzień udychać cyharetny dym.
U SIZA niama ŭmovaŭ dla naturalnaha, dzionnaha aśviatleńnia, tamu šmat u jakich źniavolenych surjozna pahoršyŭsia zrok. Žančyny myjuć i sušać adzieńnie ŭ kamierach, tamu vymušanyja žyć va ŭmovach syraści.
14 z 20 apytanych žančyn adznačyli, što ź imi za kratami pracavaŭ psichołah, 7 žančyn udzielničali ŭ hrupavych zaniatkach ź psichołaham. Ale šmat chto sa źniavolenych nie daviaraje psichołaham, bo nie ŭpeŭnienyja ŭ kanfidencyjnaści dapamohi: naprykład, psichołah moža pieradać infarmacyju apieratyŭnikam abo tyja mohuć prasłuchoŭvać hutarku źniavolenaj i psichołaha. U hetym niedaviery jość sens, bo psichołah — supracoŭnik papraŭčaj ustanovy, časam jon jašče i maje zvańnie aficera. Źviarnucca da hramadzianskaha psichołaha ci psichijatra źniavolenyja nie mohuć.
«Antoškina — heta piekła». Strašny manałoh palitźniavolenaj
«Začyniš dźviery i pacałuješ jaje, bo jość takaja mahčymaść». Jak žančyny kachajuć žančyn u kałonii