U Brytanii idzie sud nad bałharami, jakich padazrajuć u špijanažy na karyść Rasii
Praduhledžvałasia kibierataka na ŭkrainskich vajskoŭcaŭ
04.12.2024 / 08:34
U aŭtorak Centralny kryminalny sud Łondana (Ołd-Biejli), dzie prachodzić praces nad hrupaj hramadzian Bałharyi, jakija padazrajucca ŭ špijanažy na zamovu rasijskich śpiecsłužbaŭ, zasłuchaŭ pakazańni ab maštabnaj apieracyi, jakaja rychtavałasia hrupaj, jakaja mieła pramoje dačynieńnie da vajny va Ukrainie, piša Bi-bi-si.
Pavodle źviestak dziaržabvinavačańnia, padsudnyja adsočvali i rychtavalisia ŭzłamać mabilnyja telefony ŭkrainskich vajskoŭcaŭ, jakija navučalisia pracy z amierykanskim zienitna-rakietnym kompleksam Patriot na avijabazie ZŠA ŭ Hiermanii.
Hetaja apieracyja, jakaja była spynienaja tolki paśla aryštu padazravanych, mieła b surjoznyja nastupstvy dla abarony Ukrainy, zajaviła abvinavačvańnie ŭ sudzie ŭ aŭtorak.
Usiaho na łavie padsudnych piać čałaviek: 33-hadovaja Katryn Ivanova, 30-hadovaja Vania Habierava, 39-hadovy Cichamir Ivančaŭ (usie troje abvinavačvańnia ŭ svoj adras admaŭlajuć), a taksama 46-hadovy Arlin Rusieŭ i 43-hadovy Bizier Džambazaŭ, jakija pryznali, što zajmalisia špijanažam.
Rusieva abvinavačańnie ličyć arhanizataram usioj hrupy. Brytanskaja prakuratura śćviardžaje, što jon atrymlivaŭ instrukcyi ad hramadzianina Aŭstryi Jana Marsaleka, jaki, jak raniej paviedamlałasia ŭ sudzie, źjaŭlaŭsia rasijskim ahientam.
U pryvatnaści, dziaržabvinavaŭca Elisan Morhan śćviardžaje, što Katryn Ivanova z dapamohaj aparata Stealth Catcher IMSI Grabber u kastryčniku—listapadzie 2022 hoda sprabavała zdabyć źviestki asabistych telefonaŭ ukrainskich vajskoŭcaŭ, dysłakavanych na amierykanskaj vajskovaj bazie niedaloka ad Štutharta.
Kali b heta ŭdałosia, Rasija zmahła b vyznačyć raźmiaščeńnie ustanovak Patriot na terytoryi Ukrainy.