Rybak začapiŭ vudaj ŁEP i pamior ad udaru tokam. Udava zaprasiła vielizarnuju kampiensacyju i adsudziła dobryja hrošy
Trahičny incydent adbyŭsia 3 lipienia 2023 hoda na ŭskrainie ahraharadka Bostyń u Łuninieckim rajonie.
04.12.2024 / 14:12
U hetym miescy jość doŭhaja i šyrokaja kanava, jakaja ŭpadaje ŭ raku Cnu. Mima prachodzić čyhunka, a na sutyku kanavy i rejek — nievialiki most. Tut i lubiŭ rybačyć mužčyna, piša 1prof.by.
Uzdoŭž čyhunki prachodzili dźvie pavietranyja linii elektrapieradačy (ŁEP). Ad ich idzie napružańnie da 10 kiłavolt. Rybak, chutčej za ŭsio, začapiŭ ich vudaj, što i stała pryčynaj hibieli.
Cieła mužčyny znajšli ŭ toj ža dzień. Pa vynikach ekśpiertyzy, śmierć nastupiła ad udaru elektryčnym tokam, što prajšoŭ praz pravuju ruku. Ekśpierty taksama ŭdakładnili, što zahinuły rybak nie byŭ pjany.
Pravierku pa fakcie hibieli pravodziŭ Śledčy kamitet i nie znajšoŭ pryčyn pačynać kryminalnuju spravu. Tady žonka viaskoŭca vyrašyła źviarnucca ŭ sud. Jana padała pazoŭ suprać Baranavickaj dystancyi elektrazabieśpiačeńnia Baranavickaha adździaleńnia Biełčyhunki.
Mienavita na bałansie hetaha pradpryjemstva stajać linii elektrapieradačy kala čyhunki. Jaho načalnik u liku inšaha adkazvaje za infarmavańnie nasielnictva ab niebiaśpiecy ŁEP.
Padčas pravierki Śledčaha kamiteta vyśvietliłasia jašče cikavaja detal.
Za paru tydniaŭ da trahičnaha zdareńnia načalnik Łuninieckaha rajona elektrazabieśpiačeńnia Baranavickaj dystancyi atrymaŭ znaki ab zabaronie rybnaj łoŭli ŭ achoŭnaj zonie linij elektrapieradačy.
Hetyja znaki pavinny byli zamacavać na padviedamasnych arhanizacyi aporach ŁEP pablizu vadajomaŭ. Adnak da 3 lipienia na słupach nad toj złaščasnaj kanavaj papiaredžańnia ŭsio jašče nie było.
U vyniku ŭ SK pryjšoŭ da vysnovy, što kryminalnaha złačynstva niama, adnak majecca skład administracyjnaha pravaparušeńnia. Havorka idzie pra artykuł 21.2 KoAP (parušeńnie praviłaŭ achovy elektryčnych sietak). Heta značyć, vina načalnika ŭsio ž prysutničała.
Na hetaj padstavie ŭdava rybaka zapatrabavała ad pradpryjemstva kampiensacyju maralnaj škody.
Žančyna zajaviła, što śmierć muža i baćki stała niezamiennaj strataj dla siamji, jakaja pieražyła mocnaje ŭzrušeńnie. Pa słovach viaskoŭki, jana pačuvajecca adzinokaj, pakutuje ad depresii, biassonicyi i inšych prablem sa zdaroŭjem.
Taksama žančyna raspaviała, što zahinuły byŭ vydatnym baćkam, vielmi kłapaciŭsia pra dziaciej. Jon chadziŭ na mierapryjemstvy i schody: usio heta było paćvierdžana charaktarystykaj z ustanovy adukacyi. Ciapier synam vielmi nie chapaje taty, i nichto nie zmoža pakryć im hetuju stratu.
Viktoryja zapatrabavała pa 50 tysiač rubloŭ dla siabie i dla kožnaha z synoŭ u jakaści hrašovaj kampiensacyi maralnaj škody.
Orhany apieki, jakija byli zaklikany abaraniać intaresy dziaciej, padtrymali pazoŭ u poŭnym abjomie.
Pradstaŭniki pradpryjemstva na sudzie zajavili, što jany nie spračajucca z pazovam u pryncypie. Tam zhodnyja, što ŭ žonki zahinułaha jość padstavy dla kampiensacyi škody. Adnak, na dumku adkazčyka, suma 150 tysiač rubloŭ zanadta vialikaja: jaje varta «maksimalna pamienšyć».
Što vyrašyŭ sud?
Sud pryznaŭ, što pazoŭ udavy rybaka padlahaje zadavalnieńniu. Adnačasova byli pryniatyja dovady ŭładalnikaŭ ŁEP i pamienšanaja suma škody.
Udava zahinułaha atrymała 15 tysiač rubloŭ, a syny — pa 10 tysiač rubloŭ kožny. Takim čynam, usiaho siamji dastałosia 35 tysiač rubloŭ.
Taksama Baranavickuju dystancyju elektrazabieśpiačeńnia abaviazali pakryć pazoŭniku 1369 rubloŭ vydatkaŭ na jurysta i vypłacić 333 rubli dziaržpošliny.