Palicyja Ńju-Jorka praciahvaje maštabnyja pošuki zabojcy kiraŭnika najbujniejšaj strachavoj kampanii. Što viadoma
Historyja nahadvaje śviežy sieryjał «Dzień šakała».
05.12.2024 / 15:09
Brajan Tompsan. Fota: United Health Group
Palicyja Ńju-Jorka vykarystoŭvaje technałohii raspaznańnia tvaraŭ i vykinuty mabilny telefon, kab vyśvietlić asobu čałavieka, jaki zastreliŭ vykanaŭčaha dyrektara najbujniejšaj amierykanskaj pryvatnaj strachavoj kampanii UnitedHealthcare Brajana Tompsana, piša Bi-bi-si.
U horadzie idzie maštabnaja pošukavaja apieracyja. Palicyja abviaściła ŭznaharodu 10 tysiač dalaraŭ za infarmacyju ab strałku.
50-hadovy Tompsan byŭ śmiarotna paranieny ranicaj u sieradu kala hatela Hilton na Manchetenie.
Napadnik uciok ź miesca złačynstva. Palicyja miarkuje, što zabojstva Tompsana było zahadzia spłanavanaje.
Stralba adbyłasia ŭ ažyŭlenaj častcy Manchetena, niedaloka ad Tajms-skvier i Centralnaha parku. U hety dzień Tompsan pavinien byŭ vystupić na kanfierencyi dla inviestaraŭ.
Pa danych palicyi, padazravany ŭ mascy čakaŭ Tompsana na praciahu piaci chvilin kala hatela Hilton, dzie prachodziła kanfierencyja.
Tompsan pryjšoŭ tudy pieššu. Kali jon padyšoŭ da hatela, pačulisia streły. Kuli patrapili ŭ śpinu i nahu. Biznesoŭca dastavili ŭ lakarniu, dzie daktary kanstatavali jahonuju śmierć.
Kiraŭnik palicejskaha ŭpraŭleńnia Ńju-Jorka Džozef Kieni raspavioŭ, što zbroja padazravanaha, miarkujučy pa ŭsim, zakliniła, ale jon zdoleŭ papravić niaspraŭnaść i praciahnuć stralbu.
Kamiery videanazirańnia zafiksavali momant stralby, na ich taksama vidać, jak strałok uciakaje ź miesca złačynstva. Apošni raz jaho bačyli ŭ Centralnym parku na elektrarovary.
Rasśledavańnie zabojstva Tompsana zasiarodžana na niekalkich začepkach, jakija palicyja vykarystoŭvaje dla vyśviatleńnia asoby padazravanaha.
Padazravany, u pryvatnaści, trapiŭ na kamiery nazirańnia ŭ bližejšym kafe Starbucks za niekalki chvilin da stralby.
Choć na zdymku jon u mascy, krynicy ŭ palicyi paviedamili telekanału CBS, što jana była naciahnutaja niedastatkova vysoka, kab całkam zakryć jaho tvar, što dazvoliła śledčym prymianić ałharytmy raspaznańnia tvaraŭ.
Akramia taho, palicyja pravodzić DNK-analiz troch hilzaŭ i patronaŭ, znojdzienych na miescy złačynstva.
U zavułku na šlachu ŭciokaŭ padazravanaha byŭ znojdzieny mabilny telefon, jaki taksama vyvučaje palicyja.
Śledčyja zajavili, što praviaduć pieratrus u numary Tompsana ŭ hateli Marriott na susiedniaj ź miescam stralby vulicy.
Matyŭ zabojstva pa-raniejšamu niezrazumieły.
Pa dadzienych palicyi rodnaha horada Tompsana Miejpł-Hroŭv, štat Miniesota — u 2018 hodzie ŭ jaho domie ŭžo byŭ adzin padazrony incydent, adnak palicyja zakryła spravu, nie vyjaviŭšy składu złačynstva.
U ZŠA zastrelili kiraŭnika najbujniejšaj strachavoj kampanii