Асад у 2014 годзе: Я не Януковіч, я нікуды не з'еду
На трэці год вайны Башар Асад запэўніваў Уладзіміра Пуціна, што не збяжыць з Сірыі. Але часы змяніліся.
08.12.2024 / 21:39
Фота: kremlin.ru
Дзесяць гадоў таму Башар Асад заявіў Уладзіміру Пуціну, што не пакіне краіну на фоне грамадзянскай вайны.
У 2014 годзе, ужо пасля ўцёкаў Віктара Януковіча з Украіны, з Асадам сустракаўся былы дырэктар ФСБ Сяргей Сцяпашын. Паводле яго слоў, сірыйскі кіраўнік тады запэўніў, што не будзе браць прыклад з украінскага прэзідэнта.
«Перадайце Уладзіміру Уладзіміравічу Пуціну, што я не Януковіч, я нікуды не з'еду», — цытаваў тады Сцяпашын словы Асада.
У 2014 годзе вайна ў Сірыі працягвалася ўжо тры гады, з пераменным поспехам для Асада. Падтрымка Расіі і Ірана дапамагла яму ўтрымацца ва ўладзе, аднак праз 10 гадоў Асад усё ж паўтарыў шлях Януковіча і ўцёк у Маскву, дзе папрасіў палітычнага прытулку.
Дарэчы, напярэдадні выбараў 2020 года тое ж самае казаў Аляксандр Лукашэнка ў інтэрв'ю Дзмітрыю Гардону.
«Лукашэнка ніколі нікуды не пабяжыць, і мае дзеці нікуды не пабягуць. Вы разумееце? Вось гэта мая асаблівасць. А ведаеце, чаму яшчэ? Бягуць тыя, у каго кішэні набітыя. Ну і што? Я пабягу, добра. Я пабег — куды я пабег? Нават у Кітай. Не дай Бог, вядома. Гэта зусім іншы клімат, іншая краіна — я так…
[…] Ды я пра Маскву ўжо нават не кажу. Без грошай там рабіць няма чаго. А ў мяне грошай няма. Вы разумееце? У мяне няма грошай, каб пабегчы і там жыць, як Януковіч. Ведаеце, у мяне гэтага няма», — сказаў тады Лукашэнка.
Асад уцёк у Расію і папрасіў палітычны прытулак
Ізраіль нанёс авіяўдары па Дамаску. І заняў частку тэрыторыі Сірыі на Галанскіх вышынях
З’явілася відэа люксавых аўто з гаража Башара Асада
МЗС Расіі перастала называць сірыйскіх паўстанцаў тэрарыстамі — цяпер кажуць пра апазіцыю
Башар Асад пакінуў пасаду прэзідэнта Сірыі і краіну — МЗС Расіі
Фрыдман: Лёс Асада паказвае, што Лукашэнку «арэшнікі» не дапамогуць