Siryjskija ŭciekačy masava viartajucca na radzimu paśla źviaržeńnia režymu Bašara Asada
Paśla padzieńnia režymu siryjskaha dyktatara Bašara Asada tysiačy ŭciekačoŭ pačali viartacca ŭ Siryju. Na apublikavanych u sacyjalnych sietkach fotazdymkach i videa možna ŭbačyć, jak na pamiežnych punktach vystrojvajucca vielizarnyja čerhi aŭtamabilaŭ, ludzi radujucca, tančać, niasuć valizki i z honaram pakazvajuć svaje siryjskija pašparty.
09.12.2024 / 15:34
Na fota i videa z drona, zroblenym tureckim telekanałam TRT Haber, dziasiatki tysiač siryjcaŭ, jakija viartajucca ŭ Damask paśla padzieńnia režymu Asada. Uviečary 8 śniežnia na ŭsich darohach u stalicu Siryi ŭtvarylisia ahromnistyja zatory. Mnohija pakidali svaje mašyny na ŭzbočynach, kab zabrać ich paśla, i išli ŭ Damask pieššu
Asabliva mocny napłyŭ nazirajecca z susiedniaha Livana, dzie pražyvaje kala 1,5 miljona siryjskich biežancaŭ. Taksama paviedamlajecca ab masavym viartańni z Turcyi, dzie znachodziacca kala troch miljonaŭ siryjcaŭ. U pamiežnym punkcie Masnaa, jaki złučaje Biejrut i Damask, natoŭpy ludziej prybyvali ŭvieś dzień, a dzieci razmachvali ściahami Siryi, piša BILD.
Siryjcy prybyvajuć, kab pierajści ŭ Siryju z Turcyi praz pamiežny punkt Čyłviehozu, 9 śniežnia 2024 h. Fota: AP Photo / Metin Yoksu
U samoj Turcyi prezident Redžep Taip Erdahan daŭno znachodzicca pad ciskam hramadskaści, jakaja patrabuje viartańnia biežancaŭ. Ciapier, paśla źmianieńniaŭ u Siryi, hety praces moža paskorycca.
Pavodle źviestak tureckaha ŭrada, bolš za 240 tysiač siryjcaŭ užo atrymali hramadzianstva Turcyi. Akramia taho, mnohija dzieci naradzilisia ŭ krainie i nikoli nie byli na radzimie svaich baćkoŭ.
Siryjcy prybyvajuć, kab pierajści ŭ Siryju z Turcyi praz pamiežny punkt Čyłviehozu, 9 śniežnia 2024 h. Fota: AP Photo / Metin Yoksu
Tym časam u Niamieččynie, dzie pražyvaje blizu miljona siryjskich uciekačoŭ, abmiarkoŭvajecca mahčymaść viartańnia mihrantaŭ. Pa zakonie, uciekačy, jakija atrymali abaronu z-za palityčnych pieraśledaŭ abo vajny, mohuć stracić hety status, kali situacyja ŭ Siryi stabilizujecca. Niekatoryja niamieckija palityki ŭžo zaklikajuć da pierahladu statusu takich ludziej i da pačatku ich viartańnia.