Novaja era płastyčnaj chirurhii: halivudskija zorki zaŭvažna źmianili vyhlad
Sacyjalnyja sietki i zachodnija tabłoidy abmiarkoŭvajuć pamaładziełych Lindsi Łochan, Demi Mur i Kryścinu Ahilera. A śpiecyjalisty śćviardžajuć, što nastupiła novaja era płastyčnaj chirurhii. Čym jana admietnaja?
12.12.2024 / 22:45
Aktrysy Demi Mur i Lindsi Łochan i śpiavačka Kryścina Ahilera ŭ 2024 hodzie. Fota: Getty Images
Apošnim časam sacyjalnyja sietki aktyŭna abmiarkoŭvajuć istotnyja źmieny ŭ źniešnaści halivudskich zorak. Nielha nie zaŭvažyć, jak pamaładzieli aktrysy Lindsi Łochan, Demi Mur i śpiavačka Kryścina Ahilera. Ludzi hublajucca ŭ zdahadkach, što mahło być pryčynaj takich źmien.
Daily Mail piša, što adzin z płastyčnych chirurhaŭ ź Ńju-Jorka vykazaŭ zdahadku, što pieraŭtvareńnie źniešnaści Lindsi Łochan — vynik šerahu kaśmietyčnych apieracyj, u tym liku padciažki tvaru. Ale sama aktrysa śćviardžaje, što heta vynik dobraha dohladu skury.
U toj ža čas inšyja śpiecyjalisty havorać pra novy trend, jaki atrymaŭ nazvu «undetectable era» («era nieprykmietnaści»). Heta značyć, što niemahčyma zrazumieć, jakija pracedury mieli miesca, źmieny hladziacca arhanična.
Jak tłumačyć u svaim padkaście adzin z kaśmietyčnych chirurhaŭ i dermatołahaŭ Entani Rosi, novaja era nasamreč maje dastatkova daŭniuju historyju, prosta ciapier stali nadavać bolš uvahi nie płastyčnym apieracyjam, a kaśmietyčnym praceduram. Minimalistyčnyja, ale rehularnyja pracedury pa dohladzie tvaru prynosiać zaŭvažnyja źmieny.
Što za pracedury?
Sami zorki nie raskryvajuć sakrety svajho novaha źniešniaha vyhladu. Ale voś što chirurhi i kaśmietołahi majuć na ŭvazie, kali kažuć pra «eru nieprykmietnaści» ŭ płastyčnaj chirurhii.
Z kaśmietyčnych preparataŭ — heta daŭno viadomyja filery dva ŭ adnym z polimałočnaj kisłatoju ŭ składzie. Ličycca, što jany prybirajuć defiekty skury, takija jak marščyny ci ŭpadziny, i adnačasova stymulujuć vypracoŭku kałahienu — białku, jaki adkazvaje za pruhkaść i ełastyčnaść skury. Efiekt ad takich fileraŭ nie tolki imhnienny, ale i praciahły.
Druhim srodkam źjaŭlajucca bijarevitalizanty — preparaty dla amaładžeńnia skury z hiałuronavaj kisłatoju, — u jakich kancentracyja hetaj kisłaty ŭ 8 razoŭ vyšejšaja, čym u standartnych.
Kryścina Ahilera ŭ 2020 (źleva) i 2024 hodzie. Fota: Gregg DeGuire/FilmMagic via Getty Images, Kayla Oaddams/WireImage via Getty Images
Hiałuronavaja kisłata pryciahvaje vadu, u vyniku skura stanovicca bolš uvilhotnienaj i pruhkaj. Dziakujučy vysokaj kancentracyi efiekt ad pracedury bolš zaŭvažny i bolš praciahły. Dermatołahi śćviardžajuć, što takija preparaty stymulujuć rehienieracyju skury, palapšajuć jaje teksturu i ton.
U adroźnieńni ad standartnych pracedur, dzie moža spatrebicca značnaja kolkaść injekcyj dla raŭnamiernaha efiektu, pry ŭžyvańni bijarevitalizantaŭ z vysokaj kancentracyjaj hiałuronavaj kisłaty ich patrabujecca značna mienš. A vynik budzie bolš dakładnym i naturalnym, bieź pierahruzki skury.
Treci kirunak u kaśmietałohii — heta vykarystańnie faktaraŭ rostu i ekzasom. Hetyja kampanienty ŭjaŭlajuć saboj «mini-kurjeraŭ», jakija dapamahajuć kletkam arhanizma aktyvavać pracesy amaładžeńnia.
Faktary rostu — heta malekuły, jakija stymulujuć kletki da rehienieracyi i palapšeńnia funkcyj. A ekzasomy — heta mikraskapičnyja viezikuły (burbałki), jakija vydzialajucca kletkami i mohuć pieranosić karysnyja rečyvy, uklučajučy białki i RNK. Ekzasomy mohuć dziejničać jak «pakiety ź infarmacyjaj», jakija dapamahajuć kletkam hłybiej uździejničać na pracesy amaładžeńnia skury.
Lindsi Łochan u 2019 (źleva) i 2024 hadach. Fota: Nathan Congleton/NBCU Photo Bank/NBCUniversal via Getty Images, skrynšot The Tonight Show Starring JimmyFallon
Ekzasomy zaraz možna atrymlivać nie tolki z kryvi pacyjentaŭ, ale i sa stvałavych kletak, naprykład, z tłuščavaj tkaniny abo kaściavoha mozhu. Heta pašyraje mahčymaści lačeńnia i dohladu skury.
Jašče adnoj papularnaj praceduraj źjaŭlajucca injekcyi siemievaj vadkaści łasosia, jakaja byccam by moža pamienšyć kolkaść marščyn. U svoj čas hetu praceduru raschvalvali Kim Kardašjan i Dženifier Enistan.
Nie tolki pracedury, ale i ład žyćcia
Dermatołahi spadziajucca, što «era nieprykmietnaści» źmienić adnosiny ludziej da płastyčnaj chirurhii. Pa słovach dermatołaha Bruk Džefi, jakuju cytuje vydańnie USA Today, novaja era natchnić ludziej užyvać bolš naturalny i tonki padychod nie tolki da kaśmietyčnych pracedur, ale i da pryhažości ŭ cełym.
Pa słovach Džefi, raniej ludzi imknulisia da peŭnaha źniešniaha vyhladu. Kali vy vyhladali peŭnym čynam, heta pakazvała, što vy možacie dazvolić sabie takija pracedury. Heta było jak by prykmietaj statusu. Ale zaraz ludzi žadajuć vyhladać značna bolš naturalna.
Demi Mur u 2019 (źleva) i 2024 hadach. Fota: Jean Baptiste Lacroix/WireImage via Getty Images, Daniele Venturelli/WireImage via Getty Images
Pry hetym śpiecyjalist padkreślivaje, što tak zvanaja «era nieprykmietnaści» — heta nie tolki vynik kaśmietyčnych pracedur, ale i zdarovaha ładu žyćcia:
«My bačym, što ŭsio bolš uvahi nadajecca ŭśviedamleńniu taho, što niedastatkova prosta niešta zrabić z tvaram. Važna kłapacicca pra ŭsio cieła. Važna, jakuju ježu vy jaścio, ci ŭžyvajecie ałkahol, ci kurycie. Dumaju, heta krok u pravilnym kirunku, jaki padšturchoŭvaje nas da bolš kompleksnaha kłopatu ab svaim arhaniźmie».
Sa svajho boku śpiecyjalisty pa psichičnym zdaroŭi zaŭvažajuć, što navat u epochu «ery nieprykmietnaści» zastajecca aktualnaj prablema prazrystaści. Važna, kab znakamitaści adkryta raskazvali ab tym, jakija kaśmietyčnyja pracedury jany vykarystoŭvajuć. Heta dapamahaje ludziam farmavać zdarovyja i realistyčnyja standarty pryhažości, razumieć, što za pryvabnym voblikam zorak chavajecca vialikaja praca śpiecyjalistaŭ.
Treba razumieć, što kaśmietyčnyja pracedury nie vyrašać prablemu z samaacenkaj. Nieabchodna navučycca lubić siabie. A heta idzie znutry.
Vučonyja adkryli novy naturalny srodak ad pryščoŭ
Dvuchfaznaje ačyščeńnie tvaru: pravierany karejski sposab zrabić skuru pryhožaj
Jak skinuć dziesiać hod z dapamohaj adnoj pracedury
Całkam aholenaja Lindsi Łochan ŭ časopisie Playboy
Micelarnuju vadu — zmyvać, tonik — mieć abaviazkova. Pamyłki, jakija nie daruje naš tvar
«Substancyja»: novy chorar z Demi Mur nie škaduje nikoha