Tusk: Polšča nie płanuje adpraŭlać svaich vajskoŭcaŭ va Ukrainu
Premjer-ministr Polščy Donald Tusk 12 śniežnia sustreŭsia ŭ Varšavie z prezidentam Francyi Emanuelem Makronam, jaki, jak miarkujecca, prylacieŭ u polskuju stalicu z metaj abmierkavańnia budučaj miratvorčaj misii krain Zachadu va Ukrainie paśla spynieńnia tam ahniu. Padčas pres-kanfierencyi palityki vykazalisia na hetuju temu.
12.12.2024 / 20:11
Prezident Francyi Emanuel Makron i premjer-ministr Polščy Donald Tusk padčas sustrečy ŭ Varšavie. Fota: AP Photo/Czarek Sokolowski
Paśla sustrečy z francuzskim prezidentam Donald Tusk padkreśliŭ, što Polšča pakul nie płanuje adpraŭlać svaich vajskoŭcaŭ va Ukrainu:
«Ja chaču spynić śpiekulacyi na temu prysutnaści vojskaŭ adnoj ci druhoj krainy na terytoryi Ukrainy paśla zaklučeńnia mahčymaha pieramirja. Rašeńni, datyčnyja Polščy, buduć prymacca vyklučna ŭ Varšavie. Pakul my padobnych dziejańniaŭ nie płanujem».
Tusk taksama padkreśliŭ, što siarod krain Jeŭrasajuza na Polščy lažyć najbolšy ciažar, źviazany z vajnoj va Ukrainie. Akramia taho, polskija vajskoŭcy ŭdzielničajuć u achovie miežaŭ ź Biełaruśsiu i Rasijaj.
Emanuel Makron, u svaju čarhu, padkreśliŭ nieabchodnaść supracoŭnictva pa spravie Ukrainy z novaabranym prezidentam ZŠA Donaldam Trampam:
«Administracyja Trampa vykazała hatoŭnaść źmianić chod hetaha kanfliktu. Tamu my pavinny ciesna supracoŭničać z amierykancami i, viadoma, z Ukrainaj, kab znajści mahčymy šlach, jaki b uličvaŭ intaresy Ukrainy, jaje suvierenitet, a taksama intaresy jeŭrapiejcaŭ i ich biaśpieki».
Pra situacyju va Ukrainie Emanuel Makron razmaŭlaŭ taksama z prezidentam Polščy Andžejem Dudam.
Makron źbirajecca ŭ Polšču dla abmierkavańnia płanaŭ miratvorčaj misii va Ukrainie
Zialenski: My z Trampam havaryli pra zamarozku vajny
Tramp acaniŭ straty Rasii ŭ 600 tysiač zabitych i paranienych i zaklikaŭ Pucina «spynić varjactva»
«Mir dziakujučy sile mahčymy!» Zialenski ŭ Paryžy sustreŭsia z Trampam i Makronam