Razburalny cykłon udaryŭ pa francuzskim archipiełahu Majota: imavierna, zahinuli sotni ludziej
Jak miarkujecca, udar «Šydo» pryvioŭ da razbureńnia cełych nasielenych punktaŭ. Chutkaść vietru dasiahała 225 km u hadzinu.
16.12.2024 / 07:59
Etat Major des Armées via AP
Na archipiełahu Majota ŭ Indyjskim akijanie (hetaja terytoryja naležyć Francyi i raźmieščana kala Kamorskich vyspaŭ pamiž Mazambikam i Madahaskaram) praciahvajecca vyratavalnaja apieracyja paśla ŭdaru cykłona «Šydo», jaki vyklikaŭ maštabnyja razbureńni, piša Bi-bi-si.
Kiraŭnik miascovaj administracyi Fransua-Ksaŭje Bjevil zajaviŭ miascovym ŚMI, što kolkaść zahinułych moža značna vyraści, kali ŭładam udasca acanić maštab razbureńniaŭ.
Jon papiaredziŭ, što ŭ vyniku ŭdaru stychii «vyznačana zahinuli niekalki sotniaŭ» čałaviek, adnak ich moža być i niekalki tysiač.
Zaraz supracoŭniki vyratavalnych słužbaŭ pa-raniejšamu sprabujuć dabracca da niekatorych paciarpiełych rehijonaŭ.
Jak miarkujecca, udar «Šydo» pryvioŭ da razbureńnia cełych nasielenych punktaŭ. Chutkaść vietru dasiahała 225 km u hadzinu.
Na Majocie žyvie niamała mihrantaŭ bieź nieabchodnych dakumientaŭ, jakija prybyli na francuzskuju terytoryju ŭ pošukach prytułku. Miarkujecca, što mienavita hetyja ludzi paciarpieli bolš za ŭsio: mnohija ź ich žyvuć va zbudavanych z padručnych srodkaŭ chovankach.
Nasielnictva hrupy astravoŭ Majota składaje 320 tys. čałaviek, mnohija miascovyja žychary kažuć pra niedachop charčavańnia, pitnoj vady i dachu nad hałavoj.
Bi-bi-si
Adzin z žycharoŭ administracyjnaha centra terytoryi, horada Mamudzu, raspavioŭ, što staić u čarzie pa dapamohu. «U nas niama vady ŭžo try dni, tak što my ŭžo nie vytrymlivajem. Sprabujem atrymać choć by trochi, kab možna było žyć, bo my nie viedajem, kali znoŭ daduć vadu», — kaža hety čałaviek.
Jašče adzin žychar Mamudzu skazaŭ ahienctvu Reuters: «Adčuvańnie takoje, što pieražyŭ jadziernuju vajnu. Na maich vačach źnik ceły rajon»»
Majota praktyčna całkam zaležyć ad finansavaj dapamohi Francyi, kala 75% nasielnictva hetaj terytoryi žyvie za rysaj biednaści, kožny treci źjaŭlajecca biespracoŭnym.